តារាកំប្លែង ពែកមី សន្យាឈប់ផ្សព្វផ្សាយល្បែងអនឡាញពីពេលនេះទៅ  

តារាកំប្លែងលោក ចែម ចាន់រ៉ា ដែលគេស្គាល់ថាជានាយពាក់មី បានប្រកាសថានឹងឈប់ផ្សព្វផ្សាយល្បែងអនឡាញចាប់ពីពេលនេះទៅត។​ នេះបើតាមវីដេអូ ដែលគេផ្សព្វផ្សាយពាសពេញបណ្ដាញទំនាក់ទំនងសង្គមហ្វេសប៊ុក ។

តាមវីដេអូនោះ នាយពែកមី បានអះអាងថា ខ្លួនត្រូវបាននាយកដ្ឋានប្រឆាំងបទល្មើសល្បែងពាណិជ្ជកម្មនៃក្រសួងមហាផ្ទៃកោះហៅឱ្យចូលខ្លួនទៅបំភ្លឺជុំវិញការចូលរួមផ្សព្វផ្សាយល្បែងអនឡាញនាពេលកន្លងមក។

នាយពែកមី បានបំភ្លឺថា កន្លងមកខ្លួនពិតជាបានផ្សព្វផ្សាយឱ្យល្បែងអនឡាញពិតមែន។ បានចូលរួមផ្សព្វផ្សាយព្រោះជឿតាមពាក្យអះអាងរបស់ភ្នាក់ងារល្បែងអនឡាញទាំងនោះថា វេបសាយល្បែងអនឡាញរបស់ពួកគេ គឺស្របច្បាប់ និងអាជ្ញាបណ្ណត្រឹមត្រូវ។

ជាមួយគ្នានេះ នាយពែកមី បានស្នើឱ្យសិល្បករ និងបុគ្គលដែលមានឥទ្ធិពលលើបណ្ដាញទំនាក់ទំនងសង្គម ឈប់ផ្សព្វផ្សាយឱ្យល្បែងអនឡាញនានា។ បន្ថែមពីនេះ នាយពែកមី​ ក៏បានស្នើពលរដ្ឋកម្ពុជាមេត្តាកុំលេងល្បែងស៊ីសង ព្រោះល្បែងតែងតែវិនាស។

គួររំលឹកថានៅថ្ងៃទី១២ ខែកុម្ភៈ ឆ្នាំ២០២៤ ប្អូនប្រុសរបស់នាយពាក់មីផ្ទាល់ គឺនាយគ្រឿន ក៏បានប្រកាសជាសាធារណៈថាលោកឈប់ផ្សាយស្រា និងល្បែងអនឡាញពេញមួយជីវិតរបស់លោក បន្ទាប់ពីសាធារណមតិបានរិះគន់មិនសំចៃមាត់ ក្រោយផ្សព្វផ្សាយល្បែងអនឡាញ៕​