ខេត្តសៀមរាបដង្ហែរជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលឆ្នាំ២០២៣

នៅរសៀលថ្ងៃទី ២៩ ខែ កុម្ភៈ ឆ្នាំ២០២៤នេះ រដ្ឋបាលខេត្តសៀមរាប រួមជាមួយមន្ទីរអប់រំយុវជននិងកីឡាខេត្ត មន្ទីរ សុខាភិបាលខេត្ត បានរៀបចំពិធីអបអរសាទរជ័យលាភីអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាលឆ្នាំ២០២៣ ដោយដង្ហែពានជ័យលាភីនៅតាមដងវិថីនានា ក្នុងក្រុងសៀមរាប ។

សម្រាប់ខេត្តសៀមរាប អង្គភាពដែលទទួលបានជ័យលាភីចំនួន៤អង្គភាព រួមមានទី១/អនុវិទ្យាល័យមិត្ត ភាពខ្មែរ ជប៉ុន ព្រះឥន្ទកោសា ទទួលបានចំណាត់ថ្នាក់លេខ២។​  ទី២.មណ្ឌលសុខភាព គោកចក ទទួលបានចំណាត់ថ្នាក់លេខ២។  ទី៣/ សាលាបឋមសិក្សា វត្តបូព៌ ទទួលបានចំណាត់ថ្នាក់លេខ៣  និងទី៤ សាលាបឋមសិក្សាក្រវ៉ាន់ ទទួលបានចំណាត់ថ្នាក់លេខ៦។

ក្នុងុំឱកាសនោះ អភិបាលខេត្តសៀមរាប លោកស្រី ម៉ន នីរងី្ស  បានគូសបញ្ជាក់ថា ការបង្កើនភាពទុកចិត្តចំពោះសុខភាពរបស់សិស្ស តាមរយៈការអនុវត្តកម្មវីធីអាហាររូបត្ថម្ភដល់កុមារ និងការពិនិត្យគុណភាពចំណីអាហារនៅតាមសាលារៀន  ហើយការជំរុញលើកទឹកចិត្តដល់ មាតាបិតា អាណាព្យាបាល សហគមន៍និងការចូលរួមការអប់រំសិស្ស ។ ដើម្បីបន្តជំរុញលើកំណែទម្រង់លើកកម្ពស់លើការសិក្សា រួមចំណែកក្នុងការអភិវឌ្ឍធនធានមនុស្ស ដែលជាវិស័យអទិភាពដំណាក់កាលទី១ នៃយុទ្ធសាស្ត្របញ្ជកោណ រាជរដ្ឋាភិបាលកម្ពុជា បានបន្តផ្តល់ការយកចិត្តទុកដាក់ និងជំរុញបន្ថែមចលនានៃការប្រឡងប្រណាំងតាមរយៈការវាយតម្លៃ និង ទទួលស្គាល់អង្គភាពផ្តល់សេវាសាធារណៈគំរូក្នុងវិស័យអប់រំនិងវិស័យសុខាភិបាលសម្រាប់ឆ្នាំ២០២៤បន្តទៀត។

លោកស្រីបានបញ្ជាក់ថា ការមានបញ្ហាថ្នាំងថ្នាក់ក្នុងការបម្រើសេវាពីប្រជាពលរដ្ឋ ត្រូវដោះស្រាយដោយភាពទន់ភ្លន់ ម៉ឺងម៉ាត់ ពន្យល់ហេតុផល និងអាចទទួលយកបាន គឺ ត្រូវមានគំនិតផ្តួចផ្តើមថ្មីៗ និងនវានុវត្តន៍ ដើម្បីធ្វើឲ្យអង្គភាពមានដំណើរកាន់តែល្អប្រសើរជាងមុន ៕

អត្ថបទ៖  គឿន វេត