ព័ត៌មានជាតិ

អតីតរដ្ឋមន្រ្តីក្រសួងសាធារណការ ស្នើឲ្យមន្រ្តីចុះតាមដានគុណភាពផ្លូវជាតិកំពុងដំណើរការសាងសង់

បានផុស

១១ ខែ មុន

នៅ

ថ្ងៃសុក្រ ១ មីនា ២០២៤

ដោយ

ថ្លែងនៅក្នុងពិធីចូលរួមបិទសន្និបាតបូកសរុបលទ្ធផលការងារក្រសួងសាធារណការកាលពីរសៀលម្សិលមិញនេះ លោក ស៊ុន ចាន់ថុល ឧបនាយករដ្ឋមន្ត្រី បានស្នើឲ្យមន្ត្រីក្រសួងសាធារណការចុះពិនិត្យតាមដានកំណាត់ផ្លូវជាតិដែលកំពុងដំណើរការសាងសង់ ដើម្បីធានាបានគុណភាពនិងស្តង់ដាបច្ចេកទេស។

ទាក់ទងការដ្ឋានផ្លូវជាតិកំពុងដំណើរការសាងសង់ លោក ស៊ុន ចាន់ថុល អតីតរដ្ឋមន្ត្រីក្រសួងសាធារណការនិងដឹកជញ្ជូន បានលើកពីកំណាត់ផ្លូវជាតិមានផ្លូវជាតិលេខ ៣១ លេខ ៣៣ លេខ ៤១ លេខ ១០ លេខ ៧១សេ និងផ្លូវល្បឿនលឿនភ្នំពេញបាវិត ដោយលោកជំរុញឲ្យមន្រ្តីបច្ចេកទេសត្រូវចុះត្រួតពិនិត្យតាមដានជាប់ជាប្រចាំ ដើម្បីធានាបានគុណភាពស្របតាមស្តង់ដាបច្ចេកទេស។

ជាមួយគ្នានេះ លោកក៏ស្នើឲ្យពិនិត្យលើកកម្រិតផ្លូវជាតិលេខ ៥៧ លេខ ៥៨ និងលេខ ៥៩ ពីកូនដំរី ទៅ ម៉ាឡៃ ទៅសំពៅលូន ភ្នំព្រឹក្ស កំរៀង ដោយសារខេត្តបន្ទាយមានជ័យ បាត់ដំបង ប៉ៃលិន ពោធិ៍សាត់ ដែលសម្តេចតេជោអតីតនាយករដ្ឋមន្រ្តីបានដាក់ចេញជាច្រករបៀងមច្ឆា និងអង្ករ។

លោកស៊ុន ចាន់ថុល ថ្លែងយ៉ាងដូច្នេះថា៖ «តើគួរលើកកម្រិតពី DBST ទៅ AC? ដោយសារផ្លូវទាំងនេះស្ថាបនាយូរឆ្នាំដែលគួរដល់ពេលលើកកម្រិតគុណភាពដើម្បីធានាការប្រើប្រាស់យូរអង្វែង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល អតីតរដ្ឋមន្រ្តីក្រសួងសាធារណការនិងដឹកជញ្ជូន នៅអណត្តិទី ៧ នៃរដ្ឋាភិបាលទទួលបានការតែងតាំងជាឧបនាយករដ្ឋមន្រ្តី និងអនុប្រធានទី ១ ក្រុមប្រឹក្សាអភិវឌ្ឍន៍កម្ពុជា។

លោក ស៊ុន ចាន់ថុល ត្រូវបានគេដឹងជាមន្រ្តីកណ្តាប់ដៃដែក កាលកាន់ជារដ្ឋមន្រ្តីក្រសួងសាធារណការនិងដឹកជញ្ជូន លោកធ្លាប់បានព្រមានក្រុមហ៊ុនសាងសង់ផ្លូវមួយចំនួន ដែលសាងសង់គ្មានគុណភាពដាក់ក្នុងបញ្ជីខ្មៅ។ ទាក់ទងការធានាគុណភាពផ្លូវថ្នល់ លោកក៏តែងតែងចុះតាមដានត្រួតពិនិត្យការសាងសង់ជាប់ជាប្រចាំដោយប្រកាសលែងទទួលយកផ្លូវធ្វើមុខខូចក្រោយធ្វើក្រោយខូចមុខតទៅទៀត៕