ក.ប.ប ដុតចោលឆ្អឹងជំនីរ និងជើងជ្រូកបង្កក ចំនួន ២ ៣៥២Kg

នៅថ្ងៃទី០១ ខែមីនា ឆ្នាំ២០២៤នេះ មន្រ្តីស៊ើបអង្កេតនៃសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) ខេត្តបាត់ដំបង បានដុតកម្ទេចចោលនូវឆ្អឹងជំនីរ និងជើងជ្រូកបង្កកចំនួន ២តោន ៣៥២គីឡូក្រាម។ នេះបើតាមសេចក្ដីជូនដំណឹងនៅលើទំព័រហ្វេសប៊ុកផ្លូវការរបស់ក.ប.ប។

តាមសំណេរដដែល ក.ប.ប សហការជាមន្រ្តីជំនាញគយចល័តតំបន់៤ ស្ថិតនៅតំបន់អូរតាគី បានធ្វើការត្រួតពិនិត្យលើឆ្អឹងជំនីជ្រូក និងជើងជ្រូកបង្កកដែលបាននាំចូល ហើយមន្រ្តីជំនាញសាខា ក.ប.ប. ខេត្តបាត់ដំបង ពិនិត្យរួចឃើញថាសាច់បង្កកនេះមានលក្ខណៈមិនសមស្របតាមស្តង់ដាសាច់បង្កកឡើយ។

បន្ទាប់ពីបានពិនិត្យលើសាច់បង្កករួចបានរកឃើញថាមិនមានលក្ខណៈសមស្រប មន្រ្តីជំនាញសាខា ក.ប.ប. ខេត្តបាត់ដំបង និងមន្រ្តីជំនាញគយចល័តតំបន់៤ បានដុតកម្ទេចនូវឆ្អឹងជំនីរជ្រូក និងជើងជ្រូកបង្កកចោលតាមនីតិវិធី។

គួរឱ្យដឹងថា ការដុតកម្ទេចនេះ គឺស្ថិតក្រោមការសម្របសម្រួលពីលោក ទុត វីនីត ព្រះរាជអាជ្ញារង នៃអយ្យការអមសាលាដំបូងខេត្ត និងមានការចូលរួមពីមន្រ្តីជំនាញគយចល័តតំបន់៤ និងអាជ្ញាធរដែនដីផងដែរ៕

ដោយ៖ ង៉ិល ណារ៉ាត់