អគ្គមេបញ្ជាការ៖ ក្រសួងការពារជាតិផ្ដល់តំណែងធំៗដល់យោធិននារី ព្រោះបានរួមចំណែកបម្រើជាតិ  

ក្នុងពេលអញ្ជើញជាអធិបតីនៅក្នុងពិធីអបអរសាទរទិវានារីអន្តរជាតិ ៨ មីនា នៅអគ្គបញ្ជាការដ្ឋាននៅព្រឹកថ្ងៃសុក្រ ទី១ ខែមីនា ឆ្នាំ២០២៤នេះ នាយឧត្តមសេនីយ៍ វង្ស ពិសេន បានអះអាងថា ក្រសួងការពារជាតិបាន ឱ្យរៀបចំយោធិននារី មានតួនាទីក្នុងជួរថ្នាក់ដឹកនាំ ដោយសារតែយោធិននារីទាំងនោះ បានបំពេញបេសកកម្មប្រកបដោយភាពអំណត់ព្យាយាម ពុះពារគ្រប់ឧបសគ្គ ដើម្បីចូលរួមចំណែកក្នុងបុព្វហេតុការពារឯករាជ្យ សន្តិភាព បូរណភាពទឹកដី និងសេចក្តីសុខរបស់ប្រជាពលរដ្ឋ។

អគ្គមេបញ្ជាការ នៃកងយោធពលខេមរភូមិន្ទរូបនេះ ក៏បានផ្ដាំឱ្យយោធិននារីបន្តពង្រឹងសាមគ្គីភាព រួមគ្នាថែរក្សាសន្តិភាព និងប្រតិបត្តិឱ្យបានខ្ជាប់ខ្ជួននូវប្រពៃណីដ៏ល្អផូរផង់របស់នារីខ្មែរ ដែលជាកេរ្តិ៍ដំណែលពីដូនតា បន្តលើកកម្ពស់តម្លៃស្ត្រី និងពង្រឹងសីលធម៌រស់នៅឱ្យបានសមស្របតាមការវិវឌ្ឍជឿនលឿនរបស់សង្គមជាតិ។

លោក វង្ស ពិសេន ក៏បានគូសបញ្ជាក់ទៅកាន់យោធិននារីថា  រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេច ហ៊ុន ម៉ាណែត បានកំណត់ការលើកកម្ពស់សមភាពយេនឌ័រនិងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យ ជាអាទិភាពក្នុងរបៀបវារៈគោលនយោបាយ និងយុទ្ធសាស្ត្របញ្ចកោណដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ប្រកបដោយ សីលធម៌ សមធម៌ និងបរិយាបន្ន ដែលក្នុងនោះស្ត្រីគឺជាស្នូល។

បន្ថែមពីនេះ លោក ក៏បានជំរុញឲ្យយោធិននារីយកចិត្តទុកដាក់អភិវឌ្ឍន៍មូលធនមនុស្ស និងឌីជីថល តាមរយៈការបង្កើនការវិនិយោគលើការអប់រំ និងការអភិវឌ្ឍជំនាញក្នុងវិស័យបច្ចេកវិទ្យាឌីជីថល ពង្រឹងសមត្ថភាពជំនាញស្របតាមបច្ចេកវិជ្ជាទំនើប គោរពឱ្យបានម៉ឺងម៉ាត់លក្ខន្តិកៈទូទៅចំពោះកងយោធពលខេមរភូមិន្ទ និងបទបញ្ជានានា ដើម្បីចូលរួមចំណែកក្នុងភារកិច្ចការពារជាតិ និងការអភិវឌ្ឍជាតិឲ្យរីកចម្រើន។

គួរឱ្យដឹងថា នៅក្នុងក្របខណ្ឌក្រសួងការពារជាតិមានយោធិននារីដែលពាក់ផ្កាយបួនរួមមាន លោកស្រី ម៉ី មនដារី ,លោកស្រី ដាំ ដារិនី  និងពាក់ផ្កាយបីរួមមានលោកស្រី ជុំ ស៊ីណា, លោកស្រី អ៊ុក ដារ៉ា, លោកស្រី ម៉ាលី សុជាតា ព្រមទាំងយោធិននារីដែលទទួលបានតំណែងធំៗមួយចំនួនទៀតដែលមិនអាចរាប់ឈ្មោះអស់ ៕

ដោយ៖ ង៉ិល ណារ៉ាត់