អ្នកនាំពាក្យ៖ ៥ឆ្នាំនេះ អត្រាកុមារី និងសិស្សស្រីសិក្សា​ចាប់ពីមតេ្តយ្យដល់ឧត្តមសិក្សាមានការ​កើនឡើង

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី៣មីនានេះថា ក្នុងរយៈពេល៥ឆ្នាំចុងក្រោយនេះ អត្រាកុមារី និងសិស្សស្រីសិក្សាចាប់ពីកម្រិតមតេ្តយ្យរហូតដល់កម្រិតឧត្តមសិក្សាមានការកើនឡើងជាបន្តបន្ទាប់ដែលបង្ហាញថា គម្លាតយេនឌ័រក្នុងវិស័យអប់រំត្រូវបានកាត់បន្ថយគួរជាទីកត់សម្គាល់។

លោកស្រីបានបន្តថា ចាប់ពីឆ្នាំសិក្សា ២០១៨-២០១៩ រហូតមកដល់ឆ្នាំសិក្សា ២០២២-២០២៣ កុមារីទទួលបានការអប់រំនៅកម្រិតអប់រំកុមារតូចកើនពី ៣៩.១២% ដល់ ៤៥.៥% លើក្រុមអាយុកុមារតូចកម្រិតមត្តេយ្យសិក្សានៅទូទាំងប្រទេស។ ចំណែកកុមារីនៅកម្រិតបឋមសិក្សាកើនពី ៤៧.៨% ដល់ ៥១.៨៨% នៃចំនួនសិស្សបឋមសិក្សាសរុប។ នៅមធ្យមសិក្សាបឋមភូមិ និងមធ្យមសិក្សាទុតិយភូមិ ចំនួនសិស្សស្រី និងសិស្សប្រុសមានចំនួនប្រហាក់ប្រហែលគ្នា។ ជាការកត់សម្គាល់ បេក្ខជននារី ដែលបានប្រឡងជាប់សញ្ញាប័ត្រមធ្យមសិក្សាទុតិយភូមិមានកំណើនពី ៤១.៥% ដល់ ៥២.៦២%។ 

រីឯនៅកម្រិតឧត្តមសិក្សាវិញ ចំនួននិស្សិតស្រីក៏មានការកើនឡើងជាលំដាប់ ក្នុងនោះ ថ្នាក់បរិញ្ញាបត្ររងកើនពី ៣៣.៦៩% ដល់ ៤៥.៥៦%, ថ្នាក់បរិញ្ញាបត្រកើនពី ៤៨.៧២% ដល់ ៥៦.៨៩%, ថ្នាក់បរិញ្ញាបត្រជាន់ខ្ពស់ កើនពី២៤.៣៨% ដល់ ៤១.៦៣%, និងថ្នាក់បណ្ឌិតស្ថិតក្នុងរង្វង់ ៧.៣៤ %។ សិស្ស និងនិស្សិតស្រី ដែលបានជ្រើសរើសមុខវិជ្ជាវិទ្យាសាស្រ្ត បច្ចេកទេស វិស្វកម្ម សិល្បៈច្នៃប្រឌិត និងគណិតវិទ្យា (STEAM) មានកំណើនទ្វេរដង ស្មើនឹង ៣៨.២៥%។ នេះបើតាមការបញ្ជាក់របស់លោកស្រី ឃួន វិច្ឆិកា។

ទន្ទឹមនេះ តាមរយៈកម្មវិធីអប់រំក្រៅប្រព័ន្ធ ចំនួនសិស្សស្រីដែលបានបញ្ចប់ការសិក្សាដោយជោគជ័យមានកំណើនជាបន្តបន្ទាប់ក្នុងរង្វង់៦៧%នៃចំនួនសិស្សអក្ខរកម្មសរុប។ សិស្សស្រីក្នុងកម្មវិធីសមមូលទាំង២កម្រិតមាន ក្នុងរង្វង់ ៤៥.៧៩% ទៅ៥០% នៃចំនួនសរុបជារៀងរាល់ឆ្នាំ។ សិស្សអក្ខរកម្មវិជ្ជាជីវៈតាមកម្មវិធីបង្កើនចំណូល មានសិស្សស្រីច្រើនជាងសិស្សប្រុសក្នុងរង្វង់ ៦៥.៤២%។

លោកស្រីបានបន្ថែមថា តាមរយៈគោលនយោបាយលើកកម្ពស់សមធម៌យេនឌ័រ និងគោលការណ៍កំណត់អាទិភាពនារី ក្នុងការជ្រើសរើសមន្រ្តីអប់រំ ធ្វើឱ្យបុគ្គលិកអប់រំជាស្រ្តីមានកំណើនពី ៤៥,៥៨ % ដល់ ៤៧.១៣%នៃចំនួនបុគ្គលិកអប់រំសរុប ១២៥.៥៦១ នាក់ក្នុងឆ្នាំ ២០២២។ ក្នុងនោះ បុគ្គលិកជាស្រ្តីនៅតាមអង្គភាពក្រោមឱវាទទីស្តីការក្រសួងអប់រំ យុវជន និងកីឡា នាឆ្នាំ២០២២ បានកើនដល់ ៣៤.៤៨% លើចំនួនសរុប ៥១១៥ នាក់៕

អត្ថបទ៖ សំអឿន