ពិព័រណ៍សៀវភៅចុងសប្តាហ៍នេះ មានការប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រ

ដើម្បីអបអរសាទរទិវាជាតិអំណានលើកទី៩ ក្រសួង និងស្ថាប័នពាក់ព័ន្ធ បានសម្រេចរៀបចំពិព័រណ៍សៀវភៅលើកនេះ ដោយបញ្ចូលការប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រ ដើម្បីជាចំណែកក្នុងការលើកស្ទួយដល់ការអាន និងតែងនិពន្ធសៀវភៅនៅកម្ពុជា។ បើតាមការផ្សព្វផ្សាយឱ្យដឹង ពីអ្នករៀបចំកម្មវិធី ពិព័រណ៍សៀវភៅកម្ពុជា។

តាមឱ្យដឹង ពិព័រណ៍សៀវភៅកម្ពុជា គ្រោងរៀបចំធ្វើឡើង ចាប់ពីថ្ងៃទី០៩ ដល់ថ្ងៃទី ១១ ខែមីនា ឆ្នាំ២០២៤ នៅវិទ្យាស្ថានបច្ចេកវិទ្យា ពីម៉ោង ៨:០០ព្រឹក – ៧:០០ យប់ បើកឱ្យចូលរួមដោយសេរី។ ក្នុងនោះ ក៏មានការរៀបចំប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រនេះ ដោយបើកឱកាសឱ្យបេក្ខជនមកពីទូទាំងប្រទេស អាចចូលរួមបង្ហាញសមត្ថភាពរបស់ខ្លួនផងដែរ។

គួរបញ្ជាក់ថា ពិព័រណ៍​សៀវភៅនេះ សហការរៀបចំ​ដោយ​ក្រសួង​អប់រំ យុវជន និងកីឡា ក្រសួង​វប្បធម៌ និងវិចិត្រសិល្បៈ ក្រសួង​ព័ត៌មាន និងសហការរៀបចំ​ដោយដៃគូ​ឧបត្ថម្ភ​ជាច្រើន ក្នុងគោលបំណង​បណ្ដុះ​ទម្លាប់​អាន ជំរុញ​វប្បធម៌​អាន លើកកម្ពស់​សមត្ថភាព​អាន ស្មូត្រ​កំណាព្យ និងការតែង​និពន្ធ សំដៅរួម​ចំណែក​ការពារ និងពង្រឹង​វប្បធម៌ អរិយធម៌ខ្មែរ ដល់​សិស្ស និស្សិត មន្ត្រី​រាជការ និងសាធារណជន ព្រមទាំង​លើកកម្ពស់ រក្សា​គុណតម្លៃ​កេរដំណែល​របស់​មនុស្ស​ជាតិ៕