ក្រសួងអបរ់រំ រៀបចំពិនិត្យមើលផលប៉ះពាល់ ការអនុវត្តគម្រោងដៃគូ ក្របខ័ណ្ឌទូទាំងប្រទេស

ក្រសួងអប់រំ យុវជន និងកីឡា សិក្ខាសាលាពិគ្រោះយោបល់ ស្តីពី ក្របខ័ណ្ឌគ្រប់គ្រងបរិស្ថាន និងសង្គម សម្រាប់ GEIP Additional Financing រយៈពេល ២ថ្ងៃ នៅខេត្តសៀមរាប ពីថ្ងៃទី០៥-០៦ ខែមីនា ឆ្នាំ២០២៤ ដើម្បីពិនិត្យមើលពីផលប៉ះពាល់ នៃការអនុវត្តគម្រោងដៃគូ ក្នុងក្របខ័ណ្ឌទូទាំងប្រទេស ដែលបានប្រព្រឹត្តទៅក្រោមអធិបតីភាព លោក ឡោ ឆវណ្ណា អគ្គនាយករងអប់រំ និងជាប្រធានគម្រោងកែលម្អការអប់រំចំណេះទូទៅ។

សិក្ខាសាលានេះ ត្រូវបានរៀបចំឡើងក្នុងគោលបំណង៖

– បំពេញលក្ខខណ្ឌតម្រូវផ្នែកបរិស្ថាន សុវត្ថិភាពសង្គម មុននឹងមានការឯកភាព លើ​សំ​ណើសុំ​ថវិកាបន្ថែម​សម្រាប់គម្រោងកែលម្អការអប់រំចំណេះទូទៅ ដោយគ​ម្រោង​ត្រូវធ្វើសិក្ខា​សាលា​ពិគ្រោះ​យោ​បល់ ស្តី​ពី ក្របខ័ណ្ឌគ្រប់គ្រងបរិស្ថាន និងសង្គមជាមួយអ្នកពាក់ព័ន្ធ​ដែល​ទទួលផល​ពីគម្រោង។

– ប្រមូលមតិត្រឡប់ ពីសិក្ខាសាលាពិគ្រោះយោបល់នេះ និងរាយការណ៍ជូនធនាគារពិភពលោក ពី សំណូមពរ ការស្នើសុំ និងមតិត្រឡប់នានាពីផលប៉ះពាល់ នៃការអនុវត្តគម្រោងកន្លងមក និងចំណុចមួយចំនួនដែលនឹងមានការប៉ះពាល់ក្នុងការអនុវត្តគម្រោងនាពេលអនាគត ដើម្បីធនាគារពិភពលោកពិនិត្យ ផ្តល់យោបល់ និងសម្រេច ចុងក្រោយ។

សិក្ខាសាលាពិគ្រោះយោបល់ត្រូវបានរៀបចំឡើងដោយមានការចូលរួមពីសំណាក់ ថ្នាក់ដឹកនាំ និងមន្រ្តីគម្រោងកែលម្អការអប់រំចំណេះទូទៅ មន្រ្តីអង្គភាពបរិស្ថាន និងសុវត្ថិភាពសង្គម នៃគម្រោងកែលម្អការអប់រំចំណេះទូទៅ តំណាងធនាគារពិភពលោក អ្នកចូលរួមពីមន្ទីរអប់រំ យុវជន និងកីឡា រាជធានីខេត្ត ការិយាល័យអប់រំ យុវជន និងកីឡា ស្រុក ខណ្ឌ អាជ្ញាធរមូលដ្ឋាន សហគមន៍ សាលារៀន មាតាបិតា សិស្សានុសិស្ស និងអ្នកពាក់ព័ន្ធនានា ដែលអញ្ជើញមកពីខេត្តបាត់ដំបង បន្ទាយមានជ័យ ព្រះវិហារ រតនគីរី ស្វាយរៀង កំពង់ធំ ព្រះសីហនុ មណ្ឌលគីរី និងខេត្តស្ទឹងត្រែង សរុបប្រមាណជាង ១៣០ នាក់៕