អូស្រ្តាលីគ្រោងសហការជាមួយកម្ពុជា លើវិស័យកសិកម្ម អប់រំ ពិសេសវិស័យទេសចរណ៍

លោក តាន់ ហ្សង់ហ្វ្រង់ស័រ រដ្ឋមន្រ្តីប្រតិភូអមនាយករដ្ឋមន្រ្តី មានប្រសាសន៍ថា លោក Anthony Albanese នាយករដ្ឋមន្រ្តីអូស្រ្តាលី ចាត់ទុកកម្ពុជា ជាប្រទេសមួយអស្ចារ្យ ដែលឆ្លងកាត់របបប្រល័យពូជសាសន៍ ហើយឥឡូវក្លាយជាប្រទេសរឹងមាំ មានសន្តិភាព និងស្ថិរភាពនយោបាយ អភិវឌ្ឍប្រកិតនឹងសមាជិកអាស៊ានដទៃទៀត។ ជាមួយគ្នានេះ អូស្រ្តាលីគ្រោងសហការជាមួយកម្ពុជា នៅលើវិស័យកសិកម្ម វិស័យអប់រំ ពិសេសវិស័យទេសចរណ៍ ជាដើម។

ការថ្លែងនេះ ធ្វើឡើងនៅក្នុងសន្និសីទសារព័ត៌មាន នៅអាកាសយានដ្ឋានអន្តរជាតិភ្នំពេញ ស្ដីពី លទ្ធផល នៃការអញ្ជើញចូលរួមរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងកិច្ចប្រជុំកំពូលពិសេសអាស៊ាន-អូស្រ្តាលី។

លោក តាន់ ហ្សង់ហ្វ្រង់ស័រ បានឱ្យដឹងថា នៅក្នុងឱកាសជួបពិភាក្សាទ្វេភាគី ជាមួយ សម្តេចធិបតី ហ៊ុន ម៉ាណែត ដោយ នាយករដ្ឋមន្ត្រីអូស្ត្រាលី បានវាយតម្លៃខ្ពស់ចំពោះប្រទេសកម្ពុជា ក្រោមការដឹកនាំរបស់រាជរដ្ឋាភិបាល។

លោក តាន់ ហ្សង់ហ្វ្រង់ស័រ លើកឡើងបន្ថែមថា កម្ពុជា-អូស្រ្តាលី មានទំនាក់ទំនងជាមួយគ្នាយូរអង្វែងជាង ៧ទសវត្ស មកហើយ ដោយអូស្រ្តាលីបានជួយកម្ពុជាជាច្រើន ជាពិសេសអំឡុងស្វែងរកសន្តិភាពជូនកម្ពុជា នៅក្នុងទសវត្ស ឆ្នាំ១៩៩០ ហើយពេលនេះអូស្រ្តាលីបន្តជួយកម្ពុជាលើការអភិវឌ្ឍធនធានមនុស្ស និងក្នុងវិស័យគន្លឹះៗជាច្រើន ដូចជាកសិកម្ម សុខាភិបាល ការបោសសម្អាតមីន សន្តិសុខ និងការការពារសន្តិសុខជាដើម។

លោក តាន់ ហ្សង់ហ្វ្រង់ស័រ មានប្រសាសន៍ថា អូស្តាលី បានដាក់ចេញនូវយុទ្ធសាស្រ្តសេដ្ឋកិច្ចអូស្ត្រាលីមួយច្បាស់លាស់សម្រាប់អាស៊ីអាគ្នេយ៍ ហើយនៅក្របខ័ណ្ឌក្នុងការអនុវត្តយុទ្ធសាស្ត្រនេះ អូស្រ្តាលីគ្រោងនឹងសហការជាមួយកម្ពុជា នៅលើវិស័យមួយចំនួនដូចជា វិស័យកសិកម្មដែលត្រូវតែលើកកម្ពស់ផលិតភាព វិស័យអប់រំតាមរយៈការលើកកម្ពស់ជំនាញវិទ្យាសាស្ត្រ ព្រមទាំងវិស័យទេសចរណ៍។ល។

លោក តាន់ ហ្សង់ហ្វ្រង់ស័រ បញ្ជាក់ថា៖ “តាមរយៈវិស័យទេសចរណ៍នេះដែរ រដ្ឋាភិបាលកម្ពុជា-អូស្រ្តាលី តាមរយៈក្រសួងការបរទេស នៃប្រទេសទាំងពីរ បានចុះកិច្ចព្រមព្រៀងមួយ ស្តីពី សេវាកម្មដឹកអញ្ជូនតាមផ្លូវអាកាស ហើយគោលដៅគឺជំរុញទំនាក់ទំនងកម្ពុជា-អូស្រ្តាលីជាអាទិ៍ នៅលើវិស័យទេសចរណ៍នេះឯង”។

លោក តាន់ ហ្សង់ហ្វ្រង់ស័រ បានបញ្ជាក់ថា នាយករដ្ឋមន្រ្តីអូស្រ្តាលី ចាត់ទុកប្រទេសកម្ពុជា ជាប្រទេសមួយអស្ចារ្យ ក្នុងន័យថា ជាប្រទេសមួយមានភាពធន់ខ្លាំង គួរឱ្យស្ញប់ស្ញែង ដ្បិតកម្ពុជាដែលបានឆ្លងកាត់សោកនាដកម្ម មួយពាន់ជំពូក រួមទាំងបានឆ្លងកាត់របបប្រល័យពូជសាសន៍មួយផង ឥឡូវក្លាយជាប្រទេសរឹងមាំ ដែលមានសន្តិភាព និងស្ថិរភាពនយោបាយ ដើម្បីបន្តអភិវឌ្ឍ ដោយតាមប្រកិតពីក្រោយ បណ្តាប្រទេសនានានៅអាស៊ីអាគ្នេយ៍ដែរ។

គួរបញ្ជាក់ថា ក្នុងដំណើរបំពេញការងារនៅប្រទេសអូស្ត្រាលីនាពេលនេះ កម្មវិធីផ្លូវការ គឺកិច្ចប្រជុំកំពូល​ពិសេស​រវាងអាស៊ាន និងអូស្ត្រាលី ដើម្បីអបអរខួបអនុស្សាវរីយ៍ទំនាក់ទំនងដៃ​គូសន្ទនារយៈ​ពេល​ ៥០​ឆ្នាំ ដែលមានរយៈពេលប្រមាណពីរថ្ងៃប៉ុណ្ណោះ។ តែដោយមិនចង់ឱ្យខាតជើង នៃការធ្វើដំណើរដ៏វែង​ឆ្ងាយ និងដើម្បីចាប់យកឱកាសពង្រីកការទូតផ្នែកនយោបាយ និងសេដ្ឋកិច្ចផងនោះ សម្តេចធិបតី បានរៀបចំកម្មវិធីរហូតដល់ទៅ ៦ថ្ងៃ ជាមួយកម្មវិធីដ៏ច្រើនមិនសល់ពេលទំនេរ។ ក្នុងកម្មវិធីនៅប្រទេសអូស្ត្រាលីនាពេលនេះ ក្រៅតែពីការចូលរួមកម្មវិធីផ្លូវការនៃកិច្ចប្រជុំកំពូលពិសេស​អា​ស៊ាន និងអូស្ត្រាលីហើយនោះ សម្តេចធិបតី បានជួបមេដឹកនាំប្រទេសជាមិត្ត ជួបជាមួយប្រធាន​ក្រុម​ហ៊ុន​ធំៗ​របស់អូស្ត្រាលី ដែលកម្មវិធីទាំងអស់សរុបជាង ២០កម្មវិធី។

មេដឹកនាំប្រទេសជាមិត្តចំនួន ៦រូប ត្រូវបានសម្តេចនាយករដ្ឋមន្ត្រី ឆ្លៀតជួបទ្វេភាគីជាបន្តបន្ទាប់ ដើម្បី​បន្ត​ពង្រឹងពង្រីកទំនាក់ទំនង និងកិច្ចសហប្រតិបត្តិការទាំងឡាយឱ្យកាន់តែល្អ​ប្រសើរ សម្តៅឆ្ពោះទៅ​ពង្រីក​ការធ្វើធុរកិច្ចនាំប្រយោជន៍ផ្នែកសេដ្ឋកិច្ចសម្រាប់ជាតិ និងប្រជាជន។ មេដឹកនាំប្រទេសជាមិត្ត​ដែល​សម្តេច​ធិបតី បានជួបរួមមាន៖ លោក Ferdinand Romualdez Marcos Jr. ប្រធានាធិបតីហ្វី​លីពីន, លោក ចូកូ វីដូដូ ប្រធានាធិបតីឥណ្ឌូនេស៊ី, លោក លី សៀន ឡុង (Lee Hsien Loong) នាយករដ្ឋមន្ត្រីសឹង្ហបុរី, លោក អេនថូនី អាល់បានីស៊ី (Anthony Albanese) នាយករដ្ឋមន្ត្រីអូស្ត្រាលី, លោក Christopher Luxon នាយករដ្ឋមន្ត្រីណូវែលហ្សេឡង់ និងលោក ផាម មិញជិញ នាយករដ្ឋមន្ត្រីរបស់វៀតណាម៕