​លោក លី ធុជ ស្នើឱ្យស៊ុយអែត បន្តការគាំទ្រផ្នែកបច្ចេកទេស និងហិរញ្ញវត្ថុ ​ក្នុងការចែករំលែកការអនុវត្ត និងការតស៊ូមតិសម្រាប់​ការចូលរួមជា​អន្តរជាតិ

លោក លី ធុជ អនុប្រធានទី ១ អាជ្ញាធរមីនបានស្នើឱ្យប្រទេសស៊ុយអែត បន្តការគាំទ្រផ្នែក​បច្ចេកទេស និងហិរញ្ញវត្ថុ ក្នុងការចែករំលែកការអនុវត្ត និងការតស៊ូមតិសម្រាប់​ការចូលរួមជា​អន្តរជាតិ នៅពេលដែលកម្ពុជាដឹកនាំកិច្ចប្រជុំត្រួតពិនិត្យឡើងវិញលើកទី ៥ ឬ កិច្ចប្រជុំកំពូល​សៀមរាប-អង្គរស្តីពីពិភពលោកមួយដែលគ្មានមីន នៃអនុសញ្ញាស្តីពីការ​ហាមការប្រើប្រាស់​មីនប្រ​ឆាំងមនុស្សឆ្នាំ២០២៤ ដើម្បី ពង្រឹងដំណើររួមគ្នាឆ្ពោះទៅកាន់ពិភពលោកដែលគ្មានមីន។​

​លោក លី ធុជ អនុប្រធាន ទី ១ អាជ្ញាធរមីន និងជាប្រធានអនុសញ្ញាអូតាវ៉ាឆ្នាំ២០២៤ នៅថ្ងៃទី ០៦ ខែមីនាបានជួប ពិភាក្សាការងារជាមួយលោកស្រី Ann-Sofie NILSSON ឯកអគ្គរដ្ឋទូតសម្រាប់ការរំសាយអាវុធ និងការមិនរីក​សាយភាយនៃក្រសួងការបរទេសស៊ុយអែត ដេីម្បីរកគាំទ្រពីប្រទេសស៊ុយអែត លេីដំណេីរការរៀបចំកិច្ចប្រជុំកំពូល សៀមរាប-អង្គរ ស្តីពីពិភពលោកមួយដែលគ្មានមីន។

ក្នុងឱកាសជាមួយគ្នានោះ ក្នុងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លោកទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាលជ្រៅចំពោះការគាំទ្ររបស់ប្រទេសស៊ុយអែតសម្រាប់សកម្មភាពមីនមនុស្សធម៌នៅកម្ពុជា នាពេលកន្លងមក ក្នុងនោះរួមមានការបោសសម្អាតមីន ការអប់រំយល់ដឹងអំពីមីន និងកិច្ចខិតខំប្រឹងប្រែងជួយជនរងគ្រោះ ដែលជះឥទ្ធិពលយ៉ាងខ្លាំងដល់សុខសុវត្ថិភាព និងសុខុមាលភាពរបស់សហគមន៍​រងផលប៉ះពាល់ដោយគ្រាប់មីន និងយុទ្ធភណ្ឌមិនទាន់ផ្ទុះ៕