ឯកឧត្តម ហ៊ុន ម៉ានី៖ ក.យ.គ បានរួមចំណែកពង្រីកវិសាលភាព ស.ស.យ.ក និងអភិវឌ្ឍន៍ធនធានមនុស្ស

ប្រធានសហភាពសហព័ន្ធយុវជនកម្ពុជា ឯកឧត្តម ហ៊ុន ម៉ានី បានវាយតម្លៃខ្ពស់ ចំពោះការបំពេញកិច្ចការងាររបស់សមាជិកក្រុមប្រឹក្សាយុវជនគ្រឹះស្ថានឧត្តមសិក្សាដែលសម្រេចបានសមិទ្ធផលជាច្រើន និងរួមចំណែកក្នុងការពង្រីកវិសាលភាពរបស់សហភាពសហព័ន្ធយុវជនកម្ពុជា​តាមរយៈការកៀរគរយុវជន និងការអភិវឌ្ឍធនធានមនុស្ស។

ឯកឧត្តម ហ៊ុន ម៉ានី លើកឡើងបែបនេះនៅរសៀលថ្ងៃទី៧ ខែមីនា ឆ្នាំ២០២៤ ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ លើកទិសដៅការងារឆ្នាំ២០២៤ របស់ក្រុមប្រឹក្សាយុវជនគ្រឹះស្ថានឧត្តមសិក្សា (ក.យ.គ) នៃសហភាពសហព័ន្ធយុវជនកម្ពុជា ដោយមានការអញ្ជើញចូលរួមពីអង្គសន្និបាតសរុបប្រមាណ៥៥០រូប។ ពិធីបើកសន្និបាត បានប្រារព្ធឡើងក្រោមអធិបតីភាព លោក ស សុខា អនុប្រធាន ស.ស.យ.ក និងជាប្រធាន គ.យ.គ. និងពិធីបិទបានប្រារព្ធឡើងក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ម៉ានី ប្រធាន ស.ស.យ.ក.។ 

ប្រធានសហភាពសហព័ន្ថយុវជនកម្ពុជា (ស.ស.យ.ក) បានបញ្ជាក់ថា ក្រុមប្រឹក្សាយុវជនគ្រឹះស្ថានឧត្តមសិក្សា (ក.យ.គ) បានរួមចំណែកក្នុងការពង្រីកវិសាលភាពរបស់ ស.ស.យ.ក តាមរយៈការកៀរគរកម្លាំងយុវជន ការរៀបចំកម្មវិធីយុវជននានា និងការបណ្តុះបណ្តាលអភិវឌ្ឍន៍ធនធានមនុស្ស ក្នុងការពង្រឹងរចនាសម្ព័ន្ធ ស.ស.យ.ក ជាពិសេស គឺការចុះជួបជាមួយសមាជិក ស.ស.យ.ក ប្រចាំតាមគ្រឹះស្ថានឧត្តមសិក្សាផងដែរ។

ផ្តើមចេញពីភាពជោគជ័យនេះ ឯកឧត្តម ហ៊ុន ម៉ានី ជឿជាក់ថា ក.យ.គ នឹងរីកធំធាត់ទៅមុខទៀតពីមួយថ្ងៃទៅមួយថ្ងៃ ជាពិសេស ការបន្តផ្តល់ឱកាសដល់យុវជននៅតាមគ្រឹះស្ថានសិក្សានានាដែលចាធនធានមនុស្ស និងជាអ្នកបន្តវេននាពេលអនាគត ឱ្យមកចូលរួមជាមួយ ស.ស.យ.ក ដែលនឹងក្លាយជាកម្លាំងគាំទ្រដ៏មានសក្តានុពលពោលពេញដោយសីលធម៌ និងសមត្ថភាព ដែលជាសរសៃឈាមរបស់ប្រទេសជាតិ។ ឯកឧត្តមសង្កត់ធ្ងន់ថា យុវជនគឺជាសរសរទ្រូងដ៏រឹងមាំរបស់ប្រទេសដែលមិនអាចខ្វះបាន និងបានដើរតួនាទីយ៉ាងសំខាន់ក្នុងការចូលរួមអភិវឌ្ឍន៍ប្រទេសជាតិ។

សូមជម្រាបថា សន្និបាត ក.យ.គ. បានប្រព្រឹត្តដោយមានការធ្វើរបាយការណ៍ស្វាគមន៍ស្ដីពីលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របាយការណ៍លទ្ធផលនៃការអនុវត្តផែនការសកម្មភាពឆ្នាំ២០២៣ និងមានការធ្វើបទបង្ហាញលើប្រធានបទចំនួន ៤។ ប្រធានបទ ទី១-តួនាទីរបស់យុវជនក្នុងការថែរក្សាសន្តិភាពនៅក្នុងសង្គមកម្ពុជា។ ទី២-ការបណ្ដុះបណ្ដាលជំនាញវិជ្ជាជីវៈនិងបច្ចេកទេសសម្រាប់យុវជនមកពីគ្រួសារក្រីក្រនិងគ្រួសារងាយរងហានិភ័យ។ ទី៣-យុវជននិងការអភិវឌ្ឍបច្ចេកវិទ្យាក្នុងវិស័យអប់រំតាមលំនាំគន្លងថ្មីនៃយុគសម័យឌីជីថល និងទី៤-យុវជននិងការប្រើប្រាស់បណ្ដាញទំនាក់ទំនងសង្គមនាពេលបច្ចុប្បន្ន៕