នាយករដ្ឋមន្ត្រី បញ្ជាឱ្យបង្ក្រាបបុគ្គលណាដែលបំផ្លាញសំណង់ប្រវត្តិសាស្ត្រ

សម្ដេចនាយករដ្ឋមន្ត្រី បានបញ្ជាឱ្យក្រសួងវប្បធម៌ និងវិចិត្រសិល្បៈ ជាមួយក្រសួងពាក់ព័ន្ធ ត្រូវចូលរួមបង្ក្រាបឱ្យបានទាន់ពេលវេលា រាល់បុគ្គលទាំងឡាយណាដែលមានចេតនា បំផ្លាញសំណង់​ប្រវត្តិសាស្ត្ររបស់កម្ពុជា។ សម្ដេចនាយករដ្ឋមន្ត្រីបានបញ្ជាបែបនេះ នៅក្នុងពិធីអបអរសាទរទិវាវប្បធម៌ ៣ មីនា ដែលរៀបចំឡើងនាល្ងាចថ្ងៃទី០៧ ខែមីនា ឆ្នាំ២០២៤នេះ។

សម្ដេច ហ៊ុន​ ម៉ាណែត បានសង្កត់ធ្ងន់ដូច្នេះថា “ក្រសួងវប្បធម៌ និងវិចិត្រសិល្បៈ និងក្រសួងស្ថាប័នពាក់ព័ន្ធ និងអាជ្ញាធរដែនដីគ្រប់ថ្នាក់ត្រូវបន្តយកចិត្តទុកដាក់ថែទាំ​ ថែរក្សាការពារ និងបង្ក្រាប រាល់បទល្មើសឱ្យទាន់ពេលវេលា ប្រកបដោយប្រសិទ្ធភាពនៅតាមទីតាំងប្រាសាទ រមណីយដ្ឋានប្រវត្តិសាស្ត្រ វត្តអារាម សំណង់ប្រវត្តិសាស្ត្រ និងសំណង់ដែលមានអាយុកាលជាច្រើនរយឆ្នាំ នៅតាមមូលដ្ឋាន នៅទូទាំងប្រទេស”។

ជាមួយគ្នានេះ សម្ដេចក៏បានណែនាំដល់ក្រសួងពាក់ព័ន្ធត្រូវបន្តរួមគ្នា ធ្វើបញ្ជីរសារពើភ័ណ្ឌគ្រប់ទីតាំងនៃបេតិកភណ្ឌរូបិយ​ឱ្យបានសព្វគ្រប់ ដើម្បីជៀសវាងការរំលោភបំពាន។ សម្ដេចក៏បានបញ្ជាឱ្យទាមទារមកវិញរាល់សម្បត្តិវប្បធម៌របស់ជាតិ ដែលបានបាត់បង់ក្នុងសម័យសង្គ្រាម។

សម្ដេចមហាបវរធិបតី ក៏បានបញ្ជាឱ្យក្រសួងវប្បធម៌ធ្វើការជាមួយក្រសួងទេសចរណ៍ ដើម្បីផ្សព្វផ្សាយនូវសក្ដានុពលទេសចរណ៍វប្បធម៌ជាតិឱ្យបានទូលំទូលាយ តាមគ្រប់រូបភាព សម្រាប់ទេសចរណ៍ជាតិ និងអន្តរជាតិ សំដៅលើកកម្ពស់វប្បធម៌ជាតិ រួមចំណែកជំរុញកំណើនសេដ្ឋកិច្ចជាតិ កាត់បន្ថយភាពក្រីក្រ៕

ដោយ៖ ង៉ិល ណារ៉ាត់