រដ្ឋមន្ត្រីក្រសួងបរិស្ថាន ប្ដេជ្ញាជំរុញការប្រើប្រាស់ថាមពល​កកើតឡើងវិញឲ្យបាន ៧០% នៅឆ្នាំ​២០៣០

ក្នុង​ដំណើរ​ដឹក​នាំ​គណៈប្រតិភូ​កម្ពុជា​បំពេញ​ទស្សនកិច្ច​នៅ​ប្រទេស​បារាំង​កាល​ពី​ពេល​ថ្មី​ៗ​នេះ លោក អ៊ាង សុផល្លែត រដ្ឋមន្ត្រី​ក្រសួង​បរិស្ថាន​ បាន​បញ្ជាក់​ជា​ថ្មី​ថា កម្ពុជា​បេ្តជ្ញា​ជំរុញ​ការ​ប្រើប្រាស់​ថាមពល​កើត​ឡើង​វិញ​ឲ្យ​កើន​ឡើង​ដល់ ៧០% នៅ​ក្នុង​ឆ្នាំ​២០៣០។

ក្នុង​ឱកាស​ចូលរួម​វេទិកា​ពិភព​លោកស្តី​ពីការ​ប្រែប្រួល​អាកាសធាតុ the Buildings and Climate Global Forum រៀប​ចំ​ដោយ​អង្គការ​កម្មវិធី​បរិស្ថាន​សហប្រជាជាតិ UNEP និង Ministry of Ecological Transition and Territorial Cohesion នៃ​សាធារណរដ្ឋ​បារាំង លោក អ៊ាង​ សុផល្លែត បាន​គូស​បញ្ជាក់​ថា ប្រទេស​កម្ពុជា បាន​​​បង្កើតយុទ្ធសាស្ត្រ​អភិវឌ្ឍន៍​រយៈ​ពេល​វែង​ប្រកប​ដោយ​អព្យាក្រឹតកាបូននៅឆ្នាំ ២០៥០ ដោយ​ជំរុញការប្រើប្រាស់ថាមពល​កកើតឡើងវិញឲ្យ​កើន​ឡើងដល់ ៧០% នៅ​ឆ្នាំ​២០៣០ តាមរយៈ​គំនិតផ្តួចផ្តើមស្តីពីកិច្ចព្រមព្រៀងបៃតងអាស៊ាន (ASEAN Green Deal) ដើម្បីអនាគត​របស់អាស៊ាន បៃតង ធន់ និង​មាននិរន្តរភាព។

កម្ពុជា​បាន​​ប្តេជ្ញា​បង្កើនភាពបៃតងដោយដាំដើមឈើ​ឲ្យបានជាង ១ លានដើម​ក្នុង​មួយឆ្នាំ ដើម្បី​សម្រេច​បានគម្របព្រៃឈើ ៦០% នៅឆ្នាំ ២០៥០។ នេះបើតាមលោក អ៊ាង សុផល្លែតបាន​បញ្ជាក់។

បន្ថែមពីនេះ កម្ពុជា​ក៏​កំពុង​ចូលរូម​ដោះស្រាយផលប៉ះពាល់បរិស្ថាន​នៃវិស័យសំណង់ និង​ការប្រែប្រួល​អាកាសធាតុ តាមរយៈ​យុទ្ធនាការជា​សាធារណៈដើម្បីលើកកម្ពស់​ការយល់ដឹងអំពីផលប៉ះពាល់បរិស្ថាននៃសំណង់អគារ ប្រសិទ្ធ​ភាព​នៃការប្រើប្រាស់​ថាមពល ការ​កាត់​បន្ថយការប្រើប្រាស់ប្លាស្ទិក និង​អត្ថប្រយោជន៍​នៃ​ការ​ទទួល​យក​ស្តង់ដារ​អគារបៃតង​ជាដើម​៕