ព័ត៌មានជាតិ

៧ គម្រោងធំៗ ដាក់ចេញជាអាទិភាពត្រូវសម្រេចឲ្យបានសម្រាប់វិស័យសាធារណការនិងដឹកជញ្ជូន

បានផុស

១ year មុន

នៅ

ថ្ងៃចន្ទ ១១ មីនា ២០២៤

ដោយ

នៅក្នុងពិធីបិទសន្និបាតបូកសរុបលទ្ធផលការងាររបស់ក្រសួងសាធារណការនិងដឹកជញ្ជូន លោក ស៊ុន ចាន់ថុល ឧបនាយករដ្ឋមន្រ្តីបានលើកឡើងពីសមិទ្ធផលជាច្រើន ដែលក្រសួងសាធារណការនិងដឹកជញ្ជូនសម្រេចបានក្នុងឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតរដ្ឋមន្ត្រីក្រសួងសាធារណការនិងដឹកជញ្ជូនបានអះអាង នឹងនៅតែបន្តធ្វើការជាមួយរដ្ឋមន្រ្តីថ្មីក្រសួងសាធារណការនិងដឹកជញ្ជូន ក្រោមការដឹកនាំពីលោក ប៉េង ពោធិ៍នា ដើម្បីជំរុញសម្រេចឲ្យបានគម្រោងអាទិភាពធំៗនិងសំខាន់ៗលើវិស័យសាធារណការនិងដឹកជញ្ជូន។

នៅចំពោះថ្នាក់ដឹកនាំក្រសួងសាធារណការនិងដឹកជញ្ជូន គម្រោងអាទិភាពធំៗដែលលោកឧបនាយករដ្ឋមន្រ្តីបានលើកសម្តៅត្រូវសម្រេចឲ្យបាននៅពេលខាងមុខរួមមានដូចជា៖

-គម្រោងផ្លូវនាវាចរណ៍ “ព្រែកជីកហ្វូណនតេជោ”
-គម្រោងផ្លូវល្បឿនលឿនភ្នំពេញ-សៀមរាប-ក្រុងប៉ោយប៉ែត
-គម្រោងផ្លូវរថភ្លើងធុនស្រាលតភ្ជាប់ពីរាជធានីភ្នំពេញទៅព្រលានយន្តហោះអន្តរជាតិតេជោក្រុងតាខ្មៅ
-ផ្លូវរថភ្លើងក្រោមដីនៅរាជធានីភ្នំពេញ
-គម្រោងផ្លូវរថភ្លើងធុនស្រាលភ្ជាប់ពីអាកាសយានដ្ឋានអន្តរជាតិសៀមរាបអង្គរ ទៅក្រុងសៀមរាប
-គម្រោងលើកកម្រិតផ្លូវរថភ្លើងដែលមានស្រាប់ភាគខាងជើង (ភ្នំពេញ- ប៉ោយប៉ែត) ដែលអាចរត់បានក្នុងល្បឿន ៨០គម/ម៉ោង និងឈានទៅរកការប្រែក្លាយជាទៅជាផ្លូវរថភ្លើងល្បឿនលឿន
-គម្រោងសាងសង់ចំណតផែកុងតឺន័រទឹកជ្រៅថ្មីជំហានទី២ និងជំហានទី៣ របស់កំពង់ផែស្វយ័តក្រុងព្រះសីហនុ។

ទាក់ទងសមិទ្ធផលធំៗសម្រាប់វិស័យសាធារណការនិងដឹកជញ្ជូន លោក ស៊ុន ចាន់ថុល ដែលចូលរួមតំណាងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាក្នុងសន្និបាតបូកសរុបលទ្ធផលការងាររបស់ក្រសួងសាធារណការនិងដឹកជញ្ជូន បានលើកឡើងមានដូចជា៖

-ផ្លូវល្បឿនលឿនដំបូងបង្អស់នៅកម្ពុជា(ភ្នំពេញ-ក្រុងព្រះសីហនុ)
-កំពុងសាងសង់ផ្លូវល្បឿនលឿនទី២ (ភ្នំពេញ-ក្រុងបាវិត)
-ហេដ្ឋារចនាសម្ព័ន្ធផ្លូវចំនួន ៣៤ខ្សែ ក្នុងក្រុងព្រះសីហនុ និងចំនួន ៣៨ខ្សែ ក្នុងក្រុងសៀមរាប ផ្លូវក្រវាត់ក្រុងទី២ និងទី៣
-ផ្លូវជាតិ និងផ្លូវខេត្ត ដែលបានស្តារក្រាលកៅស៊ូនិងបេតុងមានចំនួនប្រមាណជាង ១ ម៉ឺនគីឡូម៉ែត
-ស្ពានធំៗឆ្លងកាត់ទន្លេមេគង្គ ទន្លេសាប ទន្លេបាសាក់
-ស្ពានអាកាសនៅក្នុងរាជធានីភ្នំពេញ
-ហេដ្ឋារចនាសម្ព័ន្ធប្រព័ន្ធចម្រោះទឹកកខ្វក់ ទីលានចាក់សំរាម និងទីតាំងកែច្នៃ សំរាមនៅតាមតំបន់ និងទីប្រជុំជនសំខាន់ៗ
-រួមទាំងការសាងសង់ពង្រីកចំណតផែកុងតឺន័រនៅក្រុងព្រះសីហនុ និងកំពង់ផែរណបទន្លេជាច្រើនហូរហែផងដែរ៕