រដ្ឋមន្ត្រីក្រសួងការងារ អំពាវនាវដៃគូអភិវឌ្ឍ ពង្រឹងសមត្ថភាពជនមានពិការភាព

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវឱ្យដៃគូអន្តរជាតិ ផ្តោតលើការពង្រឹងការបណ្តុះបណ្តាលសមត្ថភាពដល់ជនមានពិការភាពនៅកម្ពុជា ដើម្បីផ្តល់ឱកាសការងារឱ្យកាន់តែទូលំទូលាយ និងមានជម្រើសកាន់តែច្រើន។ ការអំពាវនាវនេះ ធ្វើឡើងក្នុងឱកាស លោកអញ្ជើញចូលរួមក្នុងវេទិកាជាតិ ស្ដីពី «បរិយាបន្នពិការភាព និងការងារសមរម្យនៅប្រទេសកម្ពុជា» ដែលមានដៃគូអភិវឌ្ឍអន្តរជាតិនានា បានចូលរួម នៅថ្ងៃទី១១ ខែមីនា ឆ្នាំ២០២៤ នេះ។

លោក ហេង សួរ បានគូសបញ្ជាក់ថា ការពង្រឹងសមត្ថភាព នឹងក្លាយជាកត្តាមួយដ៏សំខាន់ក្នុងការបង្កើតឱកាសដល់ជនមានពិការភាពឱ្យទទួលបានការអភិវឌ្ឍខ្លួនឱ្យស្របទៅតាមតម្រូវការទីផ្សារការងារដែលមានភាពបត់បែន និងសម្របសម្រួលខ្ពស់។ លោករដ្ឋមន្ត្រី លើកឡើងថា ការផ្តោតលើការអភិវឌ្ឍ និងពង្រឹងសមត្ថភាព រួមទាំងការបង្កលទ្ធភាពជូនជនមានពិការភាព គឺជាការចូលរួមជាមួយរាជរដ្ឋាភិបាលកម្ពុជា សម្រេចបាននូវចក្ខុវិស័យទទួលយកកម្លាំងពលកម្មជនមានពិការភាពចំនួន ១ ភាគរយ សម្រាប់វិស័យឯកជន និង ២ ភាគរយ សម្រាប់វិស័យរដ្ឋ។

ជាមួយគ្នានេះ លោក ហេង សួរ បានលើកទឹកចិត្ត និងជំរុញឱ្យវិស័យឯកជនដូចជា រោងចក្រ សហគ្រាស បន្តខិតខំទទួលយកជនមានពិការភាពឱ្យចូលបម្រើការងារ និងបង្កលទ្ធភាពងាយស្រួលបន្ថែមទៀតដល់ជនមានពិការភាពអាចធ្វើការងារដោយរលូន។

ដើម្បីបន្តលើកកម្ពស់ និងជំរុញការចូលរួមរបស់ជនមានពិការភាពក្នុងជីវភាពសង្គម និងទទួលបានការបណ្តុះបណ្តាលសមត្ថភាពជំនាញបច្ចេកទេស ក្រសួងការងារ និងបណ្តុះបណ្តាលវិជ្ជាជីវៈ បានណែនាំឱ្យសាលាបណ្តុះបណ្តាលបច្ចេកទេសក្រោមឱវាទរបស់ក្រសួងទាំងអស់ ត្រូវយកចិត្តទុកដាក់ក្នុងការផ្តល់ជម្រាលធ្វើដំណើរ និងថ្នាក់រៀនដែលអាចផ្តល់ភាពងាយស្រួលដល់ជនមានពិការភាពដើម្បីអាចទទួលបានជំនាញបច្ចេកទេសវិជ្ជាជីវៈក្នុងការត្រៀមខ្លួនសម្រាប់ឱកាសការងារដ៏សម្បូរបែបនាពេលបច្ចុប្បន្ន។

យ៉ាងណាក៏ដោយ ក្នុងអាណត្តិទី៧ ដែលមាន សម្តេចធិបតី ហ៊ុន ម៉ាណែត ជាប្រមុខ លោក ហេង សួរ បានប្តេជ្ញា និងបានដាក់ចេញជាសកម្មភាពអាទិភាពក្នុងការជំរុញឱ្យជនមានពិការភាពអាចទទួលបានការអភិវឌ្ឍសមត្ថភាព និងជំនាញបន្ថែមទៀតដើម្បីបន្តលើកកម្ពស់ដល់ការចូលរួមក្នុងសង្គមដែលសុទ្ធសឹងតែជាកោសិការសង្គមដែលមិនអាចខ្វះបាន៕