​ម្ចាស់ភាគហ៊ុនធនាគារ ABA ច្រានចោល​ការចុះផ្សាយសារព័ត៌មានបរទេសថាចង់លក់ ABA

ធនាគារជាតិកាណាដា (NBC) ដែលជាម្ចាស់ភាគហ៊ុនធំរបស់ធនាគារ ABA នៅថ្ងៃទី ១២ ខែមីនា ឆ្នាំ ២០២៤ បានប្រកាសច្រានចោល​ការចុះផ្សាយរបស់សារព័ត៌មាន Bloomberg និង Reuters ដែលថា ធនាគារជាតិកាណាដាមានបំណងចង់លក់ភាគហ៊ុនរបស់ខ្លួននៅក្នុងធនាគារ ABA ក្នុងតម្លៃជាង ២ ពាន់លានដុល្លារ។

​សេចក្ដីថ្លែងការណ៍របស់ធនាគារជាតិកាណាដា ចេញផ្សាយនៅថ្ងៃទី ១២ ខែមីនា អះអាងថា ខ្លួនពុំមានទំនាក់ទំនងនៅក្នុងដំណើរការ ឬការចរចាណាមួយ​ក្នុងការលក់ធនាគារ ABA នោះទេ។ ហើយថា ធនាគារ​ ABA បានផ្ដល់កំណើន និងប្រាក់ចំណេញច្រើនសម្រាប់ធនាគារកាណាដា។​

​គិតត្រឹមចុងខែតុលាឆ្នាំ ២០២៣ ​ធនាគារ ABA រកប្រាក់ចំណូលបានប្រមាណ ៥៣៨ លានដុល្លារ​អាមេរិក និងប្រាក់ចំណេញប្រមាណ ២៥៤ លានដុល្លារអាមេរិក។

ធនាគារជាតិកាណាដាបានវិនិយោគលើកដំបូងនៅក្នុងធនាគារ ABA នៅឆ្នាំ២០១៤ តាមរយៈ​ការទិញ​យកភាគហ៊ុន ១០% ហើយបានបង្កើនភាគហ៊ុនរបស់ខ្លួន និងគ្រប់គ្រប់គ្រង​ធនាគារ ABA ទាំងស្រុងនៅក្នុងឆ្នាំ២០១៩៕​

អត្ថបទ៖ ឡេង ដេត