ព័ត៌មានជាតិ

រដ្ឋមន្ត្រីសុខាភិបាល ណែនាំគ្រប់មន្ទីរពេទ្យរដ្ឋ និងមណ្ឌលសុខភាព ត្រូវផ្ដល់សេវាជូនអ្នកជំងឺ ២៤ ម៉ោង ក្នុង ១ ថ្ងៃ

បានផុស

៦ ខែ មុន

នៅ

ថ្ងៃព្រហស្បតិ៍ ១៤ មីនា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើការណែនាំដល់ថ្នាក់ដឹកនាំមន្ត្រីសុខាភិបាលរាជធានី-ខេត្ត ឱ្យត្រួតពិនិត្យបានគត់មត់នៅគ្រប់មន្ទីរពេទ្យរដ្ឋ និងមណ្ឌលសុខភាព ដើម្បីធានាផ្តល់សេវាជូនអ្នកជំងឺ ២៤ ម៉ោង ក្នុង ១ ថ្ងៃ មានតម្លៃសមស្រប និងធ្វើឡើងឆាប់រហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសធ្វើបាឋកថាស្តីពី “ការប្រើប្រាស់កិច្ចសហការដើម្បីសម្រេចបានលទ្ធផល” តាមប្រព័ន្ធវីដេអូសន្និសីទ ជូនដល់មន្ត្រីក្រោមឱវាទក្រសួងសុខាភិបាល កាលពីថ្មីៗ នេះ លោករដ្ឋមន្ត្រី បានមានប្រសាសន៍ថា ការធ្វើបាឋកថាស្ដីពី “ការប្រើប្រាស់កិច្ចសហការដើម្បីសម្រេចបានលទ្ធផល” តាមប្រព័ន្ធវីដេអូសន្និសីទនេះ ដើម្បីពង្រឹងស្ថាប័នដែលជាយុទ្ធសាស្ត្រអាទិភាពមួយ ក្នុងចំណោមអាទិភាព ៣ បានដាក់ចេញដោយក្រសួងសុខាភិបាល ក្នុងការគាំទ្រកំណែទម្រង់ អនុវត្តយុទ្ធសាស្ត្របញ្ចកោណរបស់រាជរដ្ឋាភិបាលសម្រាប់នីតិកាលទី ៧ នៃរដ្ឋសភា ខណៈមេរៀនក្នុងសប្ដាហ៍នេះ ផ្ដោតលើការប្រើប្រាស់កិច្ចសហការ ដើម្បីសម្រេចលទ្ធផល (Collaborating to Achieve Results)។

នៅក្នុងឱកាសនោះ លោករដ្ឋមន្ត្រី បានទាញចំណាប់អារម្មណ៍ថ្នាក់ដឹកនាំសុខាភិបាលគ្រប់ជាន់ថ្នាក់ ធ្វើការឆ្លុះបញ្ចាំងលើការប្រើប្រាស់កិច្ចសហការនៅតាមអង្គភាព និងបានផ្តល់ទ្រឹស្ដីនៅក្នុងការដឹកនាំការងារសហការរវាងបុគ្គល រវាងអង្គភាព និង រវាងស្ថាប័នឱ្យមានប្រសិទ្ធភាព តាមរយៈការបង្កើនទំនុកចិត្តលើគ្នាទៅវិញទៅមក។

លោករដ្ឋមន្ត្រី ក៏បានណែនាំថ្នាក់ដឹកនាំមន្ត្រីសុខាភិបាលរាជធានី-ខេត្ត ឱ្យត្រួតពិនិត្យបានគត់មត់នៅ គ្រប់មន្ទីរពេទ្យរដ្ឋ និងមណ្ឌលសុខភាព ដើម្បីធានាផ្តល់សេវា ២៤ ម៉ោង ក្នុង ១ ថ្ងៃ និងផ្តល់សេវាថែទាំព្យាបាលដែលផ្តល់ផលប្រយោជន៍ខ្ពស់ដល់អ្នកជំងឺ មានតម្លៃសមស្រប និង ធ្វើឡើងឱ្យបានឆាប់រហ័ស៕

អត្ថបទ ៖ សំអឿន