ព័ត៌មានជាតិ

កម្ពុជា-ឥណ្ឌូណេស៊ី គ្រោងចុះអនុស្សរណៈ នៃការយោគយល់គ្នារវាង ក្រសួងសុខាភិបាល នៃប្រទេសទាំងពីរ

បានផុស

១១ ខែ មុន

នៅ

ថ្ងៃសុក្រ ១៥ មីនា ២០២៤

ដោយ

កម្ពុជា-ឥណ្ឌូណេស៊ី ឯកភាពគ្នាលើការចុះអនុស្សរណៈ នៃការយោគយល់គ្នា រវាងក្រសួងសុខាភិបាល នៃប្រទេសទាំងពីរ នាពេលខាងមុខនេះ និងឈានទៅរកការពង្រីកកិច្ចសហប្រតិបត្តិការលើចំណុចជាក់លាក់បន្ថែមផ្សេងៗ ទៀតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឯកភាពនេះបានធ្វើឡើងកាលពីថ្ងៃទី ១៤ ខែមីនា ឆ្នាំ ២០២៤ នៅទីស្ដីការក្រសួងក្នុងជំនួបពិភាក្សាការងាររវាង លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ជាមួយ លោក Santo Darmosumarto ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌូណេស៊ី ប្រចាំព្រះរាជាណាចក្រកម្ពុជា។

ក្នុងជំនួបនោះ ឯកអគ្គរដ្ឋទូត ឥណ្ឌូណេស៊ី បានបញ្ជាក់ថា គោលបំណង នៃកិច្ចជំនួបនាពេលនេះក្នុងគោលបំណងពិភាក្សា និងពន្លឿនការចុះអនុស្សរណៈ នៃការយោគយល់គ្នារវាងក្រសួងសុខាភិបាល នៃប្រទេសទាំងពីរ និងការពង្រីកការវិនិយោគលើឱសថ និងបរិក្ខារពេទ្យក្នុងប្រទេសកម្ពុជា និងកិច្ចសហប្រតិបត្តិការលើការផ្តល់អាហារូបករណ៍ចំពោះនិស្សិតក្នុងវិស័យសុខាភិបាល។

លោករដ្ឋមន្ត្រីសុខាភិបាល បានថ្លែងអំណរគុណដល់សាធារណរដ្ឋឥណ្ឌូណេស៊ី តាមរយៈ លោកឯកអគ្គរដ្ឋទូត ដែលបានបញ្ជាក់ជំហរបន្តគាំទ្ររួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីរួមចំណែកជាមួយរាជរដ្ឋាភិបាលកម្ពុជាឈានទៅសម្រេចបាននូវការគ្របដណ្ដប់សុខភាពជាសកល ស្របតាមផែនការយុទ្ធសាស្ត្របញ្ចកោណ នៃរាជរដ្ឋាភិបាលអាណត្តិទី ៧ នៃរដ្ឋសភា ក្រោមការដឹកនាំដ៏ឈ្លាសវៃ និងមោះមុតប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

អត្ថបទ ៖ សំអឿន