លោក យី គីមថាន៖ ការរៀបការនៅវ័យកុមារ នៅតែជាបញ្ហាប្រឈមសម្រាប់ខេត្តរតនគិរី

លោក យី គីមថាន នាយករងប្រចាំប្រទេសនៃអង្គការភ្លែនអន្តរជាតិកម្ពុជា បានឱ្យដឹងថា​ តាមការសិក្សាស្រាវជ្រាវរបស់អង្គការភ្លែនអន្តរជាតិកម្ពុជា ការរៀបការនៅវ័យកុមារ និងការមានផ្ទៃពោះនៅវ័យជំទង់ នៅតែតែជាបញ្ហាប្រឈមសម្រាប់ ខេត្តរតនគិរី នៅក្នុងចំណោមខេត្តចំនួន៩។ លោកបានឱ្យដឹងបែបនេះ ក្នុងពេលដឹកនាំអ្នកសារព័ត៌មានទៅកាន់ខេត្តរតនគិរី នាពេលថ្មីៗនេះ។

លោកបានបញ្ជាក់ថា លទ្ធផលនៃសិក្សាបស់អង្គការភ្លែនអន្តរជាតិកម្ពុជា ដែលសហការជាមួយក្រសួងកិច្ចការនារី ឆ្នាំ២០២៣-២០២៤ បានបង្ហាញថា ខេត្តរតនគិរី គឺជាខេត្តមួយក្នុងចំណោមខេត្តទាំង៩ ដែលមានអត្រាកុមាររៀបការមុន អាយុ ១៨ឆ្នាំ ខ្ពស់ជាងគេ។ ដោយឡែក បើតាមការប្រៀបធៀបអត្រាប្រេវ៉ាឡង់នៃការរៀបការនៅវ័យកុមារ ការរៀបការដោយបង្ខំ និងការរស់នៅជាមួយគ្នាជាប្តីប្រពន្ធវ័យក្មេង ក្នុងចំណោមខេត្តទាំង៩នៃការសិក្សា អត្រាស្ត្រីដែលបានរៀបការមុនអាយុ ១៨ឆ្នាំ មាន ខេត្តរតនគិរី ៣៧.៣% ខេត្តព្រះវិហារ ១៦.៧% ខេត្តស្ទឹងត្រែង ១៤.៧% ខេត្តកំពត ៤% ខេត្តសៀមរាប ១២% ខេត្តព្រៃវែង ១០.៧% ខេត្តព្រះហសីហនុ ៩.៣% ខេត្តបាត់ដំបង៨% និងខេត្តតាកែវ ៧.៣%។

លោកនាយករងអង្គការភ្លែនអន្តរជាតិកម្ពុជា បានបញ្ជាក់បន្ថែមថា មានបញ្ហាជាច្រើនដែលពាក់ព័ន្ធទៅនឹងផលវិបាកនៃការរៀបការរបស់ក្មេងស្រី នៅក្នុងតំបន់ខេត្តរតនគិរី ជាពិសេស ពាក់ព័ន្ធទៅនឹងការសិក្សារៀនសូត្រ សេដ្ឋកិច្ចគ្រួសារ ការសម្រេចចិត្ត អំពើហិង្សានៅក្នុងគ្រួសារ អំពើហិង្សាផ្អែកទៅលើយេនឌ័រ​ ក៏ដូចជា ការចូលរួមក្នុងសង្គមរបស់ពួកគាត់ ជាដើម។ ម្យ៉ាងវិញទៀត លោកថា​​ កត្តាដែលជំរុញឱ្យក្មេងស្រីរៀបការទាំងនៅវ័យកុមារ គឺពាក់ព័ន្ធនៅនឹងបញ្ហាជីវភាព ការគ្រប់គ្រងសេដ្ឋកិច្ច ជាពិសេស ក្មេងស្រីដែលមិនមានជំនាញច្បាស់លាស់ ហើយជាទម្លាប់នៅក្នុងតំបន់នោះ ក្មេងស្រីត្រូវពឹងផ្អែកទៅលើបុរស ដោយសារបុរសជាអ្នករកចំណូលសម្រាប់ទ្រទ្រង់ជីវភាពគ្រួសារ។ ហេតុដូច្នេះ ដើម្បីអាចឱ្យមនុស្សស្រីមានចំណូលបានទាល់តែពួកគេរៀបការ ទើបអាចមានចំណូល ដែលនេះជាកត្តាជំរុញឱ្យក្មេងងស្រីរៀបការទាំងវ័យកុមារ។

សូមជម្រាបថា តាមរបាយការណ៍របស់អង្គការភ្លែនអន្តរជាតិ ស្ត្រីនៅខេត្តរតនគិរី ប្រឈមនឹងហានិភ័យខ្ពស់ប្រមាណ ១,៤៧ដង នៃការរៀបការមុនអាយុ ១៨ឆ្នាំ ប្រសិនបើប្រៀបធៀបនឹងសមភាគីក្នុងខេត្តសៀមរាប៕