រដ្ឋមន្ត្រី លុបអាជ្ញាបណ្ណគេហទំព័រ lifeandsports ចោល ព្រោះបំពានក្រមសីលធម៌ វិជ្ជាជីវៈ

រដ្ឋមន្ត្រីក្រសួងព័ត៌មាន  លោក នេត្រ ភក្ត្រា បានសម្រេចលុបអាជ្ញាបណ្ណគេហទំព័រឈ្មោះ www.lifeandsports.news និង www.lifeandsport.online ចោល ព្រោះតែរំលោភក្រមសីលធម៌ និងវិជ្ជាជីវៈសារព័ត៌មានយ៉ាងធ្ងន់ធ្ងរ។ នេះបើតាមសេចក្ដីប្រកាសដែលទើបនឹងផ្សព្វផ្សាយនាថ្ងៃទី១៨ ខែមីនា ឆ្នាំ២០២៤។

តាមប្រកាស មាត្រា១ បានសម្រេច លុបប្រកាសលេខ ៣១៩ ព.ម ប្រក ចុះថ្ងៃទី១៣ ខែសីហា ឆ្នាំ២០២០ របស់ក្រសួងព័ត៌មាន ដែលអនុញ្ញាតឱ្យ លោក ធឿង ធួន ជាម្ចាស់អាជីវកម្មគេហទំព័រឈ្មោះ www.lifeandsports.news និង www.lifeandsport.online អាសយដ្ឋាន ទីស្នាក់ការស្ថិតនៅផ្ទះលេខ ៦៥J ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ការលុបអាជ្ញាបណ្ណគេហទំព័រនេះ គឺព្រោះតែអង្គភាពបានរំលោភបំពានយ៉ាងធ្ងន់ធ្ងរនូវក្រមសីលធម៌វិជ្ជាជីវៈសារព័ត៌មាន មិនអនុវត្តតាមនីតិវីធី មិនទទួលយកការណែនាំ និងបន្តបំពានលើលិខិតបទដ្ឋានគតិយុត្តជាធរមាន។ នេះបើតាមខ្លឹមសារនៅក្នុងសេចក្ដីប្រកាសដដែល៕