ផ្លែឪឡឹករបស់កសិករស្រុកព្រះនេត្រព្រះកំពុងត្រូវប៉ាន់តម្លៃល្អ

ឪឡឹករបស់អ្នកស្រុកព្រះនេត្រព្រះ ខេត្តបន្ទាយមានជ័យ កំពុងត្រូវប៉ាន់មានទីផ្សារនៅភ្នំពេញស្របពេលដែលកសិករទទួលបានទិន្នផលខ្ពស់។

ជួបជាមួយកសិករឈ្មោះ សុខ វ៉ាត់ ប្រកបរបរដាំផ្លែឪឡឹកនៅឃុំឈ្នួរមានជ័យ ស្រុកព្រះនេត្រព្រះខេត្តបន្ទាយមានជ័យបានឱ្យដឹងកាលពីសប្តាហ៍មុនថា ឆ្នាំនេះការប្រកបរបរដាំឪឡឹកទទួលបានផលល្អ និងតម្លៃខ្ពស់ដូចឆ្នាំមុនហើយត្រូវបានឈ្មួញពីខេត្តកំពង់ធំមកម៉ៅយកទាំងអស់ទៅលក់នៅភ្នំពេញដែលធ្វើឱ្យកសិករទទួលបានផលចំណេញសមរម្យអាចផ្គត់ផ្គងគ្រួសារបាន។

ប្រជាកសិកររូបនេះបានឱ្យដឹងទៀតថា ក្រៅពីធ្វើស្រែមើលគោរូបលោកតែធ្វើចំការដាំឪឡឹកតពីឪពុកម្តាយអស់រយៈពេល​៨ឆ្នាំមកហើយដោយមិនទុកពេលឱ្យទំនេរ ឬចំណាក់ស្រុកទៅធ្វើការនៅប្រទេសថៃឡើយព្រោះការដាំឪឡឹកនេះប្រើរយៈពេលតែជាងពីខែទេនឹងបានផល។

និយាយជារួមគឺចាប់ពីខែមួយ ឬខែពីរយើងចាប់ភ្ជួយដីដាំឪឡឹកដោយប្រើរយៈពេលជាងពីរខែយើងនឹងទទួលផលដោយក្នុងមួយរ៉ៃឈ្មួញមកប្រមូលទិញក្នុងតម្លៃពីពីរលានពីរសែនរៀលទៅពីរលាន់បួនសែនដែលតម្លៃនេះជាតម្លៃខ្ពស់ដូចឆ្នាំមុនដែរ។

សម្រាប់២០២៤នេះកសិករខាងលើបានដាំឪឡឹកលើផ្ទៃដី ៥,៥ ហិកតាជាដីជួលគេក្នុងតម្លៃមួយហិកតា ៤០ម៉ឺនរៀល។តាមរយៈទិន្នផល និងតម្លៃល្អធ្វើឱ្យប្រជាកសិករនេះសម្តែងការរីករាយយ៉ាងខ្លាំងនឹងសង្ឃឹមថា ឆ្នាំក្រោយតម្លៃផ្លែឪឡឹកបានថ្លៃដូចឆ្នាំនេះ ឬបានថ្លៃជាងដើម្បីឱ្យកសិករកាន់តែមានទឹកចិត្តបង្ករបរដាំដុះនេះបន្តទៀត។

ដោយឡែកបើតាមលោក ខុង ប៊ុន មេឃុំឈ្នួមានជ័យបានឱ្យដឹងដែលថា ដោយសារឆ្នាំនេះមិនមានទឹកជំនន់ធ្វើឱ្យប្រជាកសិកររបស់លោកបាននាំគ្នាដាំឪឡឹកច្រើនជាងឆ្នាំទៅដែលមានតែ៥ទៅ៦ហិកតា។

លោកមេឃុំបានឱ្យដឹងទៀតថា សម្រាប់ដំណាំឪឡឹកឆ្នាំនេះកសិករក្រោយពីប្រមូលផលរួចកាត់ថ្លៃចំណាយអស់មួយហិកតាពួកគាត់អាចសល់បាន៨លាន់រៀល៕

អត្ថបទ៖ អពៅ