ក្រសួងអប់រំ ផ្តល់អាហារូបករណ៍ចំនួន ៨កន្លែង ទៅសិក្សានៅប្រទេសចិន

ក្រសួងអប់រំ យុវជន និងកីឡា បានប្រកាស ពីការប្រឡងជ្រើសររើសនិស្សតអាហារូបករណ៍ថ្នាក់ក្រោយឧត្តមសិក្សា និងថ្នាក់ឧត្តមសិក្សា ទៅសិក្សានៅតំបន់ស្វយ័តជនជាតិក្វាងស៊ី នៃសាធារណរដ្ឋប្រេជាមានិតចិន ចំនួន ៨កន្លែង សម្រាប់ឆ្នាំសិក្សា២០២៤-២០២៥។ នេះបើតាមសេចក្តីជូនដំណឹងរបស់ក្រសួងអប់រំ យុវជន និងកីឡា កាលពីពេលថ្មីៗនេះ។

តាមសេចក្តីជូនដំណឹង សម្រាប់ឆ្នាំសិក្សា២០២៤-២០២៥ នេះ មន្ទីរអប់រំតំបន់ស្វយ័តជនជាតិជាំងក្វាងស៊ី នៃសាធាររណរដ្ឋប្រជាមានិតចិន បានផ្តល់អាហារូបករណ៍ចំនួន ៨កន្លៃង ដល់សិស្ស និស្សិត​ មន្ត្រីរាជការកម្ពុជា ដើម្បីទៅបន្តការសិក្សាថ្នាក់ក្រោយឧត្តមសិក្សា និងថ្នាក់ឧត្តមសិក្សា នៅតាមសាកលវិទ្យាល័យនានា ក្នុងខេត្តក្វាងស៊ី។ ក្នុងនោះភាគីមិត្តរ៉ាប់រងថ្លៃសិក្សា កន្លែងស្នាក់នៅ និងផ្តល់ប្រាក់អាហារូបករណ៍ប្រចាំខែ។ រីឯថ្លៃសំបុត្រយន្តហោះទៅមក ជាបន្ទុករបស់សាមីជន។

លក្ខខណ្ឌនៃការចុះឈ្មោះជាបេក្ខជន សម្រាប់ថ្នាក់ក្រោយឧត្តមសិក្សា(បរិញ្ញាបត្រជាន់ខ្ពស់) ត្រូវមានសញ្ជាតិខ្មែរ អាយុមិនលើសពី ៣៥ឆ្នាំ មានសញ្ញាបត្រថ្នាក់ឧត្តមសិក្សា(បរិញ្ញាបត្រ)។ ត្រូវមានចំណេះដឹងភាសាចិន ឬអង់គ្លេសជ្រៅជ្រះ មានសុខភាពល្អបរិបូរណ៍ទាំងកាយសម្បទា និងសតិបញ្ញា ព្រមទាំងមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក។ ដោយឡែក សម្រាប់ថ្នាក់ឧត្តមសិក្សា (បរិញ្ញាបត្រ) ត្រូវមានសញ្ជាតិខ្មែរ អាយុមិនលើសពី ២២ឆ្នាំ មានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃសមមូល។ ត្រូវមានចំណេះដឹងភាសាចិន ឬអង់គ្លេសជ្រៅជ្រះ មានសុខភាពល្អបរិបូរណ៍ទាំងកាយសម្បទា និងសតិបញ្ញា និងមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក។

ការទទួលពាក្យនឹងប្រព្រឹត្តទៅចាប់ពីថ្ងៃផ្សាយដំណឹងនេះ តទៅរហូតដល់ថ្ងៃទី១៩ ខែមេសា ឆ្នាំ២០២៤ វេលាម៉ោង ១៦៖០០នាទី នៅការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍ ដែលមានអាសយដ្ឋាន អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ(ខាងកើតស្ថានីទរទស្សន៍អប្សរា ប្រហែល ៥០ម៉ែត្រ)៕