តើគួរធ្វើបែបណា ទើបអាចទប់ស្កាត់បញ្ហាក្មេងទំនើង កុំឱ្យមានការកើនឡើង?

ក្មេងទំនើងនៅតែជាបញ្ហាប្រឈមមួយសម្រាប់សង្គមជាតិដែលត្រូវដោះស្រាយ ដើម្បីកុំឱ្យមានការកើនឡើងជាបន្តទៀត ដែលនាំឱ្យប៉ះពាល់ដល់សណ្តាប់ធ្នាប់សង្គម ក៏ដូចជាប្រទេសជាតិទាំងមូល។ តើគួរធ្វើបែបណា ទើបអាចទប់ស្កាត់បញ្ហាក្មេងទំនើងនេះ កុំឱ្យមានការកើនឡើងបាន?

លោកបណ្ឌិត ឈត ប៊ុនថង អ្នកជំនាញផ្នែកទស្សនវិជ្ជា និងកិច្ចការសង្គមនៃរាជបណ្ឌិត្យសភាកម្ពុជា បានលើកឡើងប្រាប់សារព័ត៌មានកម្ពុជាថ្មី ថា ដើម្បីទប់ស្កាត់បញ្ហាក្មេងទំនើងនេះ ត្រូវមានការសហការពីភាគីពាក់ព័ន្ធ ដូចជា អាណាព្យាបាល គ្រឹះស្ថានអប់រំ អាជ្ញាធរ ព្រមទាំងសាមីខ្លួនផ្ទាល់។­ លោកបណ្ឌិតថា ឪពុកម្តាយ ឬអាណាព្យាបាល ត្រូវបង្កើនការតាមដានកូនៗរបស់ខ្លួន ហើយកាត់បន្ថយសេរីភាពពួកគេខ្លះ ព្រោះកាលណាដែលពួកគេមានសេរីភាពច្រើន អាចនឹងមានឱកាសចូលក្រុមបងតូចបងធំ ឬក្រុមក្មេងទំនើងជាដើម។ រីឯ សាលារៀន គួរតែបង្កើនការអប់រំផ្នែកសីលធម៌បន្ថែមទៀត ដើម្បីឱ្យពួកគេមានចំណេះដឹងផ្នែកសីលធម៌ឱ្យបានច្រើន។

ជាការកត់សម្គាល់ ចំណាត់ការររបស់សមត្ថកិច្ចក្នុងការបង្ក្រាប អប់រំណែនាំដល់ក្មេងទំនើង ហាក់បីដូចជាមិនសូវមានប្រសិទ្ធភាពនៅឡើយ។ ហេតុនេះ លោកបណ្ឌិតថា សមត្ថកិច្ចគួរតែមានវិធានការផ្សេងបន្ថែមទៀត ដើម្បីដោះស្រាយបញ្ហានេះឱ្យកាន់តែមានប្រសិទ្ធភាព ដូចជា ធ្វើការអប់រំណែនាំក្នុងកម្រិតពិសេស ឬអាចពិចារណាក្នុងការបង្កើតមជ្ឈ​មណ្ឌលអប់រំពិសេសណាមួយ។ ម្យ៉ាងវិញទៀត លោកបណ្ឌិតថា ត្រូវមានការស្រាវជ្រាវស្វែងរកមូលហេតុដែលបណ្តាលឱ្យពួកគេក្លាយជាក្មេងទំនើងបែបនេះ ដើម្បីរកដំណោះស្រាយមួយដែលសមស្របមួយដល់ពួកគេ។

លើសពីនេះ លោកបណ្ឌិត បានសំណូមពរឱ្យឪពុកម្តាយ លោកគ្រូ អ្នកគ្រូ អាជ្ញាធរ និងអ្នកពាក់ព័ន្ធដទៃទៀត មានការសហការគ្នា រួមគ្នាដោះស្រាយបញ្ហាក្មេងទំនើង ហើយត្រូវគិតថា បញ្ហាយុវជន ជាបញ្ហាទាំងអស់គ្នា ដោយសាររឿងយុវជន​ ជារឿងមួយដ៏សំខាន់ដែលត្រូវយកចិត្តទុកដាក់ ព្រោះពាក់ព័ន្ធទៅនឹងអនាគតប្រទេសជាតិ៕