ប្រាង្គអាយុកាលពាន់ឆ្នាំ លើកំពូលភ្នំដងរែក កំពុងចែងចាំង អួតអ្នកទេសចរ អំឡុងព្រឹត្តិការណ៍សមរាត្រី

ទិដ្ឋភាពព្រះអាទិត្យពន្លឺព្រះអាទិត្យរៀបអស្ដង្គតចំកណ្ដាលទ្វារប្រាង្គប្រាសាទ ស្រីសិខារីស្វរ: ជារូបភាពដែលផ្តិតឡើងដោយ លោក អឿ សុភាព មគ្គុទេសក៍ទេសចរណ៍ ប្រចាំប្រាសាទព្រះវិហារ និងកម្រមានភ្ញៀវទេសចរជាតិ និងអន្តរជាតិ បានឃើញផ្ទាល់ភ្នែក នូវទិដ្ឋភាពបែបនេះណាស់។ នេះបើតាមការផុសផ្សាយរបស់ របស់ផេកផ្លូវការ មន្ទីរទេសចរណ៍ ខេត្តព្រះវិហារ នៅថ្ងៃសៅរ៍ ទី២៣ ខែមីនា ឆ្នាំ២០២៤។

បើតាមមន្ទីរទេសចរណ៍ខេត្តព្រះវិហារ រូបភាពប៉ុន្មានសន្លឹកនេះ ជាទិដ្ឋភាពពីលើកំពូលភ្នំដងរែក ប្រាសាទព្រះវិហារ កើតមានឡើងរៀងរាល់ឆ្នាំ ជារូបភាពដែលថតនៅប្រាសាទរបស់ព្រះបាទ សុរិយវរ្ម័នបរមនាម ព្រះកម្រងតញអញស្រីសុរយ្យវរមស្វរ: នៅថ្ងៃទី២១ និងទី២២ ខែមីនា ឆ្នាំ២០២៤ ពោលគឺក្នុងអំឡុងថ្ងៃតែមួយនៃ ព្រឹត្តិការណ៍សមរាត្រីអង្គរដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក បើនិយាយពីប្រជាប្រិយភាព ប្រាសាទបុរាណ ដែលស្ថិតនៅភាគខាងជើងប្រទេសកម្ពុជា ក្នុងភូមិសាស្ត្រស្រុកជាំក្សាន្ត ខេត្តព្រះវិហារ ប្រាង្គដ៏ចំណាស់អាយុជាងមួយពាន់ឆ្នាំនេះ នៅតែឈរខ្ពស់យ៉ាងរឹងមាំ បង្អួតសម្រស់ដល់ទេសចរជាតិ និងអន្តរជាតិ មិនជិនណាយពីទិដ្ឋភាពនៃសម្រស់ឋានសួគ៌លោកិយនេះ ស្អាតពេកក្រៃ។ តួយ៉ាង សូម្បីតែប្រទេសក្បែរខាងកម្ពុជា ក៏នៅតែប្រាថ្នាការបើកច្រកទ្វារតំបន់ប្រាសាទព្រះវិហារ ឡើងវិញផងដែរ ដើម្បីជាប្រយោជន៍ដល់វិស័យទេសចរណ៍៕