ព័ត៌មានជាតិ

ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ

បានផុស

១១ ខែ មុន

នៅ

ថ្ងៃចន្ទ ២៥ មីនា ២០២៤

ដោយ

ដីជាង ៤៣ ហិកតា ដែលស្ថិតនៅចំណុចភ្នំ ១៥០០ នៃភូមិសាស្ត្រដែនជម្រកសត្វព្រៃភ្នំសំកុស ស្រុកវាលវែង ខេត្តពោធិ៍សាត់ គ្រោងដាំស្តារព្រៃឈើឡើងវិញ ក្រោយវាយតម្លៃថាគម្រោងវិនិយោគលើផ្ទៃដីទាំងអស់នេះ មិនអាចអនុវត្តតាមគោលការណ៍របស់រាជរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៤ ខែមីនា ម្សិលមិញនេះ លោក អ៊ាង សុផល្លែត រដ្ឋមន្ត្រីក្រសួងបរិស្ថានបានចុះពិនិត្យដោយផ្ទាល់នៅលើទីតាំងក្រុមហ៊ុនវិនិយោគចំនួន ៥ ដែលមាន ៣ទីតាំក្នុងតំបន់ស្នូល និង ២ទីតាំងនៅក្រៅតំបន់ សរុបទំហំជាង ៤៣ហិកតា ត្រង់ចំណុចភ្នំ១៥០០ ដើម្បីដាំស្តារព្រៃឈើឡើងវិញ បន្ទាប់ពីបានវាយតម្លៃថា គម្រោងមិនបានអនុវត្តតាមគោការណ៍របស់រាជរដ្ឋាភិបាល និងមិនបានដំណើរការជាច្រើនឆ្នាំកន្លងមក។

លោក រដ្ឋមន្ត្រី បានលើកឡើងថា ការដាំស្តារព្រៃឈើឡើងវិញនេះ គឺស្របទៅតាមបទបញ្ជា របស់រាជរដ្ឋាភិបាលកម្ពុជា ដែលតម្រូវឲ្យក្រសួងបរិស្ថាន និងក្រសួងស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់គ្រប់គ្រងធនធានធម្មជាតិឲ្យបានម៉ឺងម៉ាត់នៅទូទាំងប្រទេស។

បើតាមលោករដ្ឋមន្រ្តី តំបន់វិនិយោគអភិវឌ្ឍទេសចរណ៏ធម្មជាតិ ដែលមិនបានអនុវត្តតាមកិច្ចព្រមព្រៀងជាមួយរាជរដ្ឋា ភិបាល គឺត្រូវបានដកហូតមកវិញ ដោយឃ្លុំទុកដើម្បីដាំស្តារព្រៃឡើងវិញ។ ចំពោះតំបន់ព្រៃ ដែលបានពីការដកហូតត្រឡប់មកវិញ ពីការកាប់ទន្រ្ទាន និងព្រៃរិចរិលដោយធម្មជាតិ ក៏នឹងត្រូវដាំស្តារព្រៃឈើឡើងវិញផងដែរ ហើយការអនុវត្តដាំស្តារ គឺធ្វើឡើងទូទាំងប្រទេសតែម្តង ដើម្បីបង្កើនគម្របព្រៃ ៦០% នៅឆ្នាំ២០៥០។

គួរបញ្ជាក់ថា ក្រសួងបរិស្ថានបានដាក់ផែនការដាំស្តារព្រៃឈើឲ្យបាន ១ លានដើម ចាប់ពីរដូវវស្សា ឆ្នាំ ២០២៤នេះតទៅ។ គិតមកដល់ពេលនេះ មន្ទីររាជធានី-ខេត្ត បានរៀបចំបណ្តុះកូនឈើបានគ្រប់ផែនការមានចំនួនជាង ១លានដើមនិងបានចែកជូនប្រជាពលរដ្ឋជាបណ្តើរៗយកទៅដាំតាមផ្ទះ សាលារៀន វតត្តអារាម និងតាមសហគមន៍។ ដោយឡែក លោក អ៊ាង សុផល្លែត ក៏បានផ្តល់កូនត្នោតចំនួនជាង ៣០ម៉ឺន ដើមថែមទៀតសម្រាប់យុទ្ធនាការចែកជូនប្រជាពលរដ្ឋដាំដោយឥតគិតថ្លៃ៕