អ្នកឧកញ៉ា គួច ម៉េងលី លែងជាសមាជិកក្រុមប្រឹក្សាភិបាលនៃCIC Plc តាំងពីខែវិច្ឆិកា ឆ្នាំ២០១៨ មកម៉្លេះ

តាមសេចក្ដីបំភ្លឺរបស់អ្នកឧកញ៉ា គួច ម៉េងលី ដែលផ្សព្វផ្សាយនៅលើទំព័រហ្វេសប៊ុកនាល្ងាចថ្ងៃទី២៥ ខែមីនា  បានឱ្យដឹងថា អ្នកឧកញ៉ា លែងជាសមាជិកក្រុមប្រឹក្សាភិបាលនៃក្រុមហ៊ុន ចាប់តាំងពីថ្ងៃទី០២ ខែមីនា ឆ្នាំ២០១៨មកម៉្លេះ។ អ្នកឧកញ៉ា បានចេញមកបំភ្លឺបែបនេះ បន្ទាប់ពីមានសារព័ត៌មានមួយចំនួន បានផ្សព្វផ្សាយខ្លឹមសារនានាដោយបានផ្សាភ្ជាប់រូបលោក ទៅនឹងតួនាទីជាសមាជិកក្រុមប្រឹក្សាភិបាលនៃក្រុមហ៊ុន CIC Plc។

ក្នុងលិខិតបំភ្លឺ អ្នកឧកញ៉ា គួច ម៉េងលី បានសរសេរដូច្នេះថា « ចាប់ពីថ្ងៃទី០២ ខែវិច្ឋិកា ឆ្នាំ២០១៨ រហូតមកដល់បច្ចុប្បន្ន ខ្ញុំបាទលែងជាសមាជិកក្រុមប្រឹក្សាភិបាលនៃក្រុមហ៊ុន ខេមបូឌាន  អ៉ិនវេសស្ទ័រ ខបភើរេសិន ភីអិលស៊ី Cambodian Investor Corporation Plc.(CIC)ទៀតហើយ»។

គួរឱ្យដឹងថា ក្នុងកិច្ចសម្ភាសជាមួយសារព័ត៌មាន លោក គួច ម៉េងលី បានទម្លាយឱ្យដឹងថា លោកបានចាញ់បោកក្រុមហ៊ុនរកស៊ីវិនិយោគ CIC Plc ក្នុងទំហំទឹកប្រាក់ចំនួនជិត៣០ម៉ឺនដុល្លារ។ តាមលិខិតបំភ្លឺសាធារណៈដែលចេញនៅថ្ងៃទី២៥ ខែមីនា នេះ អ្នកឧកញ៉ា គួច ម៉េងលី បានអះអាងថា រាល់ថវិការដែលលោកចាញ់បោក គឺជាថវិការផ្ទាល់ខ្លួន។ លោក បានអះអាងថា លោកមិនដែលបានកៀរគរប្រមូលថវិកាពីនរណាម្នាក់ ឬក្រុមហ៊ុនណាមួយ ដើម្បីយកមកវិនិយោគជាមួយក្រុមហ៊ុន CIC Plcឡើយ។    

ជុំវិញរឿងរ៉ាវ ក្រុមហ៊ុនវិនិយោគ CIC Plc នេះ ក្រសួងយុត្តិធម៌បានអះអាងថា ស្ថាប័នអាជ្ញាធរមានសមត្ថកិច្ចរបស់កម្ពុជា បាននិងកំពុងធ្វើការតាមជំហានៗ ប្រកបដោយការយកចិត្តទុកខ្ពស់បំផុត៕

ដោយ៖ ង៉ិល ណារ៉ាត់