ព័ត៌មានជាតិ

ថ្ងៃដំបូងក្រសួងសាធារណការ និងដឹក ជញ្ជូនឈ្នះមេដាយ១១គ្រឿងពីការ ប្រកួតហែលទឹកពានរង្វាន់ព្រឹទ្ធាចារ្យហែម ថុន

បានផុស

៤ years មុន

នៅ

ថ្ងៃសៅរ៍ ២០ កុម្ភៈ ២០២១

ដោយ

ភ្នំពេញ ៖ ព្រឹត្តិការណ៍ប្រកួតហែលទឹកជ្រើសរើសជើងឯកពានរង្វាន់ព្រឹទ្ធាចារ្យ ហែម ថុន លើកទី៤ នាថ្ងៃទី១៩កុម្ភៈ ដែលជាថ្ងៃដំបូងនោះ ក្លិបហែលទឹកក្រសួងសាធារណការនិងដឹកជញ្ជូន ដណ្តើមបានមេ ដាយ១១គ្រឿង ខណៈក្លិបហែលទឹកក្រសួងព័ត៌មាន រកបានមេដាយ៦គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ថ្ងៃដំបូងក្លិបហែលទឹកក្រសួង សាធារណការ និងដឹកជញ្ជូន ឈ្នះបានមេដាយមាស៥គ្រឿង មេដាយប្រាក់២ គ្រឿង និងមេដាយសំរិទ្ធ៤គ្រឿង ឈរកំពូលតារាងប្រកួតបណ្តោះអាសន្ន ខណៈ ក្លិបហែលទឹកក្រសួងព័ត៌មានរកបានមេដាយមាស៥គ្រឿង និងមេដាយប្រាក់១ គ្រឿង រីឯក្លិបហែលទឹកក្រសួងសេដ្ឋកិច្ច និងហិរញ្ញវត្ថុដណ្តើមបានមេដាយមាស ៣ គ្រឿង មេដាយប្រាក់៦គ្រឿង និងមេដាយសំរិទ្ធ៣គ្រឿង។

ចំណែកក្លិបហែលទឹក Oasis Swim Academy ដណ្តើមបានមេដាយមាស ១គ្រឿង ក្លិបហែលទឹកព្រឹទ្ធាចារ្យហែម ថុន ទទួលបានមេដាយប្រាក់៣គ្រឿង និងមេ ដាយសំរិទ្ធ៤គ្រឿង ក្លិបហែលទឹកនាគរាជកំពង់ចាមទទួលបានមេដាយប្រាក់២ គ្រឿង និងមេដាយសំរិទ្ធ២គ្រឿង និងក្លិបហែលទឹកសឺវ៉ាយវ៉យ ទទួលបានមេដាយសំរិទ្ធ១គ្រឿង។

លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានប្រាប់ឲ្យដឹងថា ការប្រកួតឆ្នាំនេះមានកីឡាករ-កីឡាការិនីយុវជនចំនួន៩៨នាក់ ក្នុងនោះកីឡាករចំនួន ៦៣នាក់ និងកីឡាការិនីចំនួន៣៥នាក់មកពី៩ក្លិប-សមាគមរួមមានក្លិបហែលទឹកក្រសួងសាធារណការ និងដឹកជញ្ជូន ក្លិបហែលទឹកក្រសួងសេដ្ឋកិច្ច និងហិរញ្ញវត្ថុ ក្លិបហែលទឹកព្រឹទ្ធាចារ្យ ហែម ថុន ក្លិបហែលទឹកក្រសួងព័ត៌មាន ក្លិបហែលទឹកនាគរាជកំពង់ចាម ក្លិបហែលទឹកសឺវ៉ាយវ៉យ ក្លិបហែលទឹក Oasis Swim Academy ក្លិបហែលទឹកសាលាអន្តរជាតិISPP និងក្លិបហែលទឹកសាលាអន្តរជាតិ Decart France។

លោកបានបន្តថា ការប្រកួតហែលទឹកពានរង្វាន់ព្រឹទ្ធាចារ្យហែម ថុន លើកទី៤ នេះរៀបចំដោយសហព័ន្ធខ្មែរកីឡាហែល ទឹកដោយមានការឧបត្ថម្ភថវិកាផ្ទាល់ពីសំណាល់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូ ន និងជាប្រធានសហព័ន្ធខ្មែរហែលទឹក៕

ដោយ ៖ វិសិទ្ធ