ក្រុមហ៊ុនកូរ៉េ​ធំៗ​ ១៣ ក្រុមហ៊ុន មានទាំង​ក្រុមហ៊ុន​ Samsung ​លើក​គ្នា​​ស្វែងរក​ឱកាសវិនិយោគក្នុងប្រទេស​កម្ពុជា

កាលពីព្រឹក​ថ្ងៃ​អង្គារ​ម្សិលមិញនេះ នៅ​ក្រុម​ប្រឹក្សាអភិវឌ្ឍ​ន៍​កម្ពុជា​មានជំនួប​ពិភាក្សា​ការងារជាមួយ​​ប្រតិភូ​ក្រុមហ៊ុន​កូរ៉េ​​ធំៗ​ ដែល​កំពុង​សម្លឹងរកមើលឱកាសវិនិយោគលើវិស័យសក្ដានុពលនៅក្នុង​ប្រទេស​កម្ពុជា។

ប្រតិភូ​ក្រុមហ៊ុន​កូរ៉េធំៗ​ដែលបាន​ចូល​​ជួប​លោក ស៊ុន ចាន់ថុល ក្នុង​ជំនួប​ពិភាក្សា​ការងារ​ពី​​គម្រោង​វិនិយោគ​នៅ​ប្រទេស​កម្ពុជា​មានទាំង​​​ប្រតិភូមកពី​ក្រុមហ៊ុន​ Samsung, Hyundai និង LG និង​ក្រុមហ៊ុន​​ធំៗរបស់​កូរ៉េ​ផ្សេង​ទៀត​សរុប ១៣ ក្រុមហ៊ុន ​​ដឹកនាំ​ដោយ​លោក Hacheong Yun អគ្គនាយកទីភ្នាក់ងារជំរុញពាណិជ្ជកម្មនិង​វិនិយោគកូរ៉េប្រចាំកម្ពុជា (KOTRA Phnom Penh)។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបាន​ឲ្យ​ដឹង​ថា ក្នុងចំណោមក្រុមហ៊ុនកូរ៉េ​ដែល​បាន​ចូល​ជួបពិភាក្សា​ការងារ មានមួយចំនួនកំពុង​មានសកម្មភាព​វិនិយោគនៅ​ក្នុង​ប្រទេស​កម្ពុជាស្រាប់ និងមួយ​ចំនួន​​ទៀត​កំពុងសម្លឹង​ស្វែងរក​ឱកាសវិនិយោគថ្មីៗលើវិស័យសក្ដានុពលនៅក្នុង​ប្រទេស​កម្ពុជា។

នៅក្នុង​ជំនួបពិភាក្សាការងារជាមួយ​ប្រតិភូ​ក្រុមហ៊ុន​កូរ៉េ​នា លោក​ ស៊ុន ចាន់ថុល បានប្រាប់​ដល់បណ្ដាវិនិយោគិន​ក្រុមហ៊ុន​កូរ៉េ ហើយ​លោក​ជំរុញឱ្យក្រុមហ៊ុនគួរសម្រេចចិត្តជ្រើសរើស​កម្ពុជាជាទីតាំង​សម្រាប់វិនិយោគ។

លោកឧបនាយករដ្ឋមន្រ្តី​ បានលើកឡើងពី​កត្តាអំណោយផល​នៃ​ស្ថេរភាពនយោបាយ សុខសន្តិភាព កំណើន​សេដ្ឋកិច្ច ស្ថេរភាពអត្រាប្ដូរប្រាក់ ផលិតភាពធនធានមនុស្ស ការយកចិត្តទុកដាក់អភិវឌ្ឍ​ហេដ្ឋារចនាសម្ព័ន្ធ​តភ្ជាប់ ភាពបើកចំហរនៃច្បាប់វិនិយោគដែលនឹង​ផ្ដល់ជូនការលើកទឹកចិត្ត​ជាច្រើនដល់វិនិយោគិន ការយកចិត្តទុកដាក់រៀបចំវេទិការដ្ឋាភិបាល​និងផ្នែកឯកជន​សម្រាប់​ដោះស្រាយ​បញ្ហាប្រឈមនានា ដែលវិនិយោគិនជួបប្រទះក្នុងការវិនិយោគ ពិសេសគឺស្ថានភាព​ទីផ្សារ​របស់កម្ពុជា​ដែលភ្ជាប់ទៅកាន់ពិភពលោកតាមរយៈអាស៊ាន កិច្ចព្រមព្រៀងពាណិជ្ជកម្ម​សេរីកម្ពុជា-ចិន កម្ពុជា-កូរ៉េ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងប្រព័ន្ធអនុគ្រោះពន្ធ EBA ជាដើម។

ជាមួយគ្នានេះ លោក ស៊ុន ចាន់ថុល ក៏​បាន​លើកពី​គោលនយោបាយ​របស់​រដ្ឋាភិបាលកម្ពុជា ក្នុងការ​លើកទឹកចិត្តចំពោះគម្រោង​វិនិយោគ​លើវិស័យឧស្សាហកម្មធុនធ្ងន់មានដូចជា ការ​ដំឡើងគ្រឿងបង្គុំ Electronic, ការដំឡើងយានយន្ត Automobile, និងគម្រោងបច្ចេកវិទ្យាជាដើម។

ក្រុមហ៊ុនកូរ៉េទាំង ១៣ ដែល​បានជួបលោក ស៊ុន ចាន់ថុល ពិភាក្សា​ការងារស្វែង​រក​ឱកាស​វិនិយោគនៅ​ប្រទេស​កម្ពុជា​រួមមាន​៖ 1. ក្រុមហ៊ុន Samsung Electronics 2. ក្រុមហ៊ុន Hyundai Motor 3. ក្រុមហ៊ុន LG Electronics 4. ក្រុមហ៊ុន CJ Group 5. ក្រុមហ៊ុន LX International 6. ក្រុមហ៊ុន DAEJOO KC Group 7. ក្រុមហ៊ុន Booyoung Group 8. ក្រុមហ៊ុន Hanshin Engineering & Construction 9. ក្រុមហ៊ុន KORINDO Group 10. ក្រុមហ៊ុន Kolao Group 11. សម្ព័ន្ធសហគ្រាសធុនតូច និងមធ្យមកូរ៉េ (KBIZ)
12. សហព័ន្ធពិភពលោកនៃសមាគមពាណិជ្ជកម្មកូរ៉េនៅក្រៅប្រទេស (World OKTA) និង 13. ក្រុមហ៊ុន Maekyung Media Group៕