ខេត្តសៀមរាប បើកវេទិកាស្តីពីការកំណត់ទីតាំងកម្រិតខ្ពស់ និងសេវាកម្មភូមិសាស្ត្រសម្រាប់ការអភិវឌ្ឍអាស៊ីប៉ាស៊ីហ្វិក

នៅថ្ងៃទី២៦ ខែមីនា ឆ្នាំ២០២៤ ខេត្តសៀមរាប បើកវេទិកាស្តីពីការកំណត់ទីតាំងកម្រិតខ្ពស់ និងសេវាកម្មភូមិសាស្ត្រសម្រាប់ការអភិវឌ្ឍ អាស៊ីប៉ាស៊ីហ្វិក ក្រោមអធិបតីភាពលោក ជា ចាន់ទុំ អគ្គលេខាធិការ នៃអគ្គលេខាធិការដ្ឋានប្រជាជន និងអភិវឌ្ឍន៍ និង លោក សុខ ថុល អភិបាលរងខេត្ត។ ព្រមទាំងមានការចូលរួមពីលោក លោកស្រីជាតំណាងក្រសួង ស្ថាប័នពាក់ព័ន្ធ និងតំណាងប្រទេសចំនួន១០ រួមមាន, អាឡឺម៉ង់, អូស្ត្រាលី, នូវែលសេឡង់, ជប៉ុន, កូរ៉េខាងត្បូង, សិង្ហបុរី, ម៉ាឡេស៊ី, កម្ពុជា, វៀតណាម,ប៊្រុយណេ និងទីម័រខាងកើត ចូលរួមផងដែរ។

អភិបាលរងខេត្ត លោក សុខ ថុល បានបញ្ជាក់ថា ការជ្រើសរើសខេត្តសៀមរាប ក្នុងការរៀបចំវេទិកាដ៏មានសារៈសំខាន់នេះ ដើមី្បជាការចែករំលែកនូវចំណេះដឹងលើការងារបច្ចេកវិទ្យា អំពីការសាងសង់ ស្ថានីយ៍ភូមិសាស្ត្រ ការគ្រប់គ្រងបញ្ហាប្រឈម និងកាលានុវត្តភាព បទពិសោធន៍ ការថែទាំ ជួសជុល មជ្ឈមណ្ឌលទិន្នន័យ និង ស្ថានីយ៍វាស់វែង ភូមិសាស្ត្រអចិន្ត្រៃយ៍។ លោកថា វេទិកានេះ នឹងប្រមូលផ្តុំអ្នកជំនាញល្បីៗ អ្នកប្រាជ្ញ អ្នកដឹកនាំគម្រោង អ្នកកសាងមកពីស្ថាប័នស្រាវជ្រាវធំៗមកពី ១២ប្រទេសចូលរួម។

លោក ប៊ិន ត្រឈៃ រដ្ឋមន្ត្រីក្រសួងផែនការ​ លើកឡើងថា ខេត្តសៀមរាប គឺជាទឹកដីសម្បត្តិបេតិកភណ្ឌវប្បធម៌ ដែលមានប្រាសាទអង្គរវត្តដ៏អស្ចារ្យ សារមន្ទីរល្អឯក និងទេសភាពធម្មជាតិផ្សេងទៀត ដែលដើរតួជាផ្ទៃខាងក្រោយដ៏ស័ក្តិសមសម្រាប់ការពិភាក្សា ហើយតំណាងយ៉ាងត្រឹមត្រូវនូវស្មារតីរស់រវើករបស់មនុស្ស។ លោកថា ក្នុងយុគសម័យនេះ អាចទាញយកអត្ថប្រយោជន៍យ៉ាងច្រើនពីប្រព័ន្ធព័ត៌មាន និងបច្ចេកវិទ្យាសម្រាប់ការងារប្រចាំថ្ងៃរបស់ ជាពិសេស នៅក្នុងផ្នែកនៃបច្ចេកវិទ្យា GNSS ចុងក្រោយបង្អស់ ដែលត្រូវបានបម្រើយ៉ាងល្អបំផុតសម្រាប់ស្ទើរតែគ្រប់វិស័យ។

ក្រសួងផែនការ បានដាក់ពង្រាយបច្ចេកវិទ្យា ឧបករណ៍ និងកម្មវិធីចុងក្រោយបង្អស់ ដើម្បីគាំទ្រដល់ការធ្វើជំរឿន និងការអង្កេត ដូចជាការប្រមូលទិន្នន័យតាមរយៈ ឧបករណ៍ឆ្លាតវៃជាច្រើនឆ្នាំកន្លងមក។ ការប្រើប្រាស់បច្ចេកវិទ្យាមួយចំនួន ដូចជាការប្រើប្រាស់ ArchGIS, Cloud Computing Storage, Big Data, Data Hub, Caminto និង Demographic Mapping ជាដើម។ ការចែករំលែកចំណេះដឹង បទពិសោធន៍ជាក់ស្តែង និងការកសាងបណ្តាញក្នុងវិស័យវាស់វែងសុរិយោដី CORS ដីធ្លី ការគ្រប់គ្រងការធ្វើផែនទី ភូមិសាស្ត្រ ទិន្នន័យធំ កម្មវិធីប្រមូលទិន្នន័យ GIS ហេដ្ឋារចនាសម្ព័ន្ធ សំណង់ កសិដ្ឋានឆ្លាតវៃ និងប្រព័ន្ធដឹកជញ្ជូន។ ការធ្វើបទបង្ហាញពីអ្នកជំនាញសំខាន់ៗ និងវាគ្មិន មកពីជុំវិញពិភពលោកនឹងបង្ហាញពីគោលគំនិតសំខាន់ៗ ដើម្បីជួយសម្រួលដល់ការដោះស្រាយបញ្ជា ប្រឈម និងប្រសិទ្ធភាពយន្តការនិងដំណោះស្រាយ។

លោកបញ្ជាក់ថា ការចែករំលែក ចំណេះដឹងនេះនឹងបង្កើតនូវវប្បធម៌នៃការចែករំលែក និងការបង្រួបបង្រួម លើកកម្ពស់សន្តិភាពទាំង នៅលើឆាកជាតិ និងអន្តរជាតិ និងឈានឆ្ពោះទៅអនាគតរុងរឿងសម្រាប់ទាំងអស់គ្នា។ វេទិកានេះ នឹងក្លាយជាវេទិកាអំណោយផល និងផ្លូវវារឆ្ពោះទៅរកដើម្បីផ្សារភ្ជាប់អ្នកប្រាជ្ញ មកពីមជ្ឈដ្ឋានផ្សេងៗគ្នាផ្លាស់ប្តូរ និងចែករំលែកជំនាញជាមួយអ្នកចូលរួមនៅឆ្នាំនេះ និងឆ្នាំបន្ទាប់។ លោកថា កម្ពុជាក្នុងនាមជាប្រទេសម្ចាស់ផ្ទះនៅឆ្នាំនេះ បានត្រៀមខ្លួនជាស្រេចក្នុងការសហការ និងសហការ ជាមួយប្រទេសដ៏មានតម្លៃផ្សេងទៀត ដើម្បីរៀបចំព្រឹត្តិការណ៍នានានៅព្រះរាជាណាចក្រកម្ពុជា។ លោកមានជឿជាក់យ៉ាងមុតមាំថា អ្នកចូលរួមទាំងអស់នឹងរួមចំណែកនូវចំណេះដឹង និងជំនាញដ៏ល្អ បំផុតនូវ បច្ចេកវិទ្យាទំនើប និងបង្ហាញផលិតផលទំនើបចុងក្រោយបំផុតទៅកាន់ភាគីពាក់ព័ន្ធ៕

អត្ថបទ៖ គឿន វេត