ព័ត៌មានជាតិ

«ស្វាយ ១០០គីឡូ ខុសស្តង់ដា ២០ គីឡូ» រោងចក្រនៅខេត្តកំពង់ស្ពឺ ជួយកសិករទិញស្វាយខុសស្តង់ដា

បានផុស

១២ ខែ មុន

នៅ

ថ្ងៃអង្គារ ២ មេសា ២០២៤

ដោយ

អ្នកគ្រប់គ្រងជាន់ខ្ពស់ផ្នែកអភិវឌ្ឍន៍ធនធានមនុស្សនៃរោងចក្រកែច្នៃស្វាយមួយកន្លែងនៅខេត្តកំពង់ស្ពឹបានឲ្យ «កម្ពុជាថ្មី» ដឹងថា បច្ចុប្បន្នរោងចក្រកំពុងពង្រីកបន្ថែមទីតាំងអគារ ដើម្បីប្រមូលទិញស្វាយពីប្រជាកសិករដែលមិនស្របតាមស្តង់ដារបច្ចេកទេសក្នុងការនាំចេញ យកមកកែច្នៃបន្ថែមសំដៅជួយសម្រួលនិងកាត់បន្ថយការខាតបង់របស់ពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគ្រប់គ្រងជាន់ខ្ពស់ផ្នែកធនធានមនុស្សនៃរោងចក្រកែច្នៃ «គិរីរម្យ ហ្វូដ ប្រដាក់សិន» បានឲ្យដឹងថា ដោយមើលឃើញពីបញ្ហាផ្សេងៗរបស់ពលរដ្ឋ ជាពិសេសនៅក្នុងការប្រមូលផលផ្លែស្វាយកែវរមៀត ព្រោះតែស្វាយខ្លះដាំដុះមិនបានត្រឹមត្រូវស្របតាមស្តង់ដារសម្រាប់នាំចេញទៅលក់នៅទីផ្សារអន្តរជាតិ ជាហេតុធ្វើឲ្យប្រជាកសិករត្រូវបោះស្វាយទាំងនោះចោល ដោយក្នុងស្វាយ ១០០គីឡូ កសិករអាចថាត្រូវបោះចោលស្វាយដែលមិនត្រូវតាមស្តង់ដារប្រមាណ ២០គីឡូទៅហើយ ដូច្នេះជាហេតុមួយដែលធ្វើឲ្យពលរដ្ឋខាតបង់ក្នុងរដូវប្រមូលផល។

អ្នកគ្រប់គ្រងសុំមិនបញ្ចេញឈ្មោះរូបនេះបានគូសបញ្ជាក់ថា «ស្វាយមួយដើមពេលដល់រដូវប្រមូលផលតែងមាន ១០% ទៅ ២០% បាត់ទៅហើយ ដែលមិនត្រូវតាមស្តង់ដារ ជាស្វាយតូច ជាស្វាយក្ដៀប ហើយនៅពេលប្រមូលផលយកទៅលក់ចេញក្រៅ ឬយកចូលក្នុងរោងចក្រគឺគេមិនយកទេ ដូច្នេះកសិករត្រូវបោះចោល មានន័យថាស្វាយ ១០០គីឡូ គឺកសិករត្រូវបោះចោលស្វាយដែលមិនត្រូវតាមស្តង់ដារ ២០គីឡូទៅហើយ នៅគរចោលតាមចម្ការ ដែលធ្វើឲ្យពួកគាត់ខាតច្រើន»។

ហេតុដូចនេះ ដើម្បីជាចំណែកមួយក្នុងការជួយសម្រួលដល់ការខាតបង់នេះ បច្ចុប្បន្ន ក្រុមហ៊ុន «គិរីរម្យ ហ្វូដ ប្រដាក់សិន» មានផែនការក្នុងការពង្រីកបន្ថែមនៅការកែច្នៃស្វាយក្នុងរោងចក្រ ដោយប្រមូលទិញស្វាយដែលមិនត្រូវតាមស្តង់ដារនៃការនាំចេញ យកមកផលិតជាផលិតផលសម្រេចនានាដើម្បីជួយដល់កសិករ។