ព័ត៌មានជាតិ

មេដឹកនាំកម្ពុជាឲ្យពលរដ្ឋមានស្មារតីជាតិនិយម គាំទ្រទិញផលិតផលខ្មែរឲ្យបានច្រើនតាមលទ្ធភាព

បានផុស

១០ ខែ មុន

នៅ

ថ្ងៃអង្គារ ២ មេសា ២០២៤

ដោយ

ក្នុងសារចូលរួមអបរសាទរទិវាជាតិលើកកម្ពស់ការប្រើប្រាស់ផលិតផលខ្មែរលើកទី ៧ ប្រារព្ធឡើងក្រោមប្រធានបទ «ផលិតនិង ផ្គត់ផ្គង់ទីផ្សារប្រកបដោយចីរភាព គឺជាចលនាភូមិ១ផលិតផល១» ប្រមុខដឹកនាំកម្ពុជាបានអំពាវនាវដល់ពលរដ្ឋគ្រប់រូបចូលរួមគាំទ្រ និងលើកទឹកចិត្តប្រកបដោយភាពម៉ឺងម៉ាត់ ជួយទិញផលិតផលខ្មែរយកទៅប្រើប្រាស់ឱ្យបានច្រើនតាមដែលអាចធ្វើទៅបាន សំដៅលើកកម្ពស់កិត្យានុភាពជាតិ និងស្មារតីជាតិនិយម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសាររបស់ប្រមុខដឹកនាំសម្តេចធិបតី ហ៊ុន ម៉ាណែត បានផ្តល់អនុសាសន៍ដល់គ្រប់ក្រសួង ស្ថាប័នពាក់ព័ន្ធទាំងអស់ ត្រូវយកចិត្តទុកដាក់ចូលរួមចំណែកលើកកម្ពស់ ជំរុញ និងបំផុស ចលនាដាំដុះចិញ្ចឹមសត្វ ផលិត កែច្នៃ និងអភិវឌ្ឍនូវផលិតផលគ្រប់ប្រភេទតាមគ្រួសារ សហគមន៍ បណ្ដុំអ្នកផលិត ប្រកបដោយគំនិតច្នៃប្រឌិតនិងរស់រវើក ជាពិសេសការកែច្នៃផលិតផលកសិកម្មជាមូលដ្ឋាន ទៅជាម្ហូបអាហារ វត្ថុសិល្បៈ ឬរបស់ប្រើប្រាស់ផ្សេងៗ សម្រាប់ផ្គត់ផ្គង់ទីផ្សារទាំងក្នុងនិងក្រៅប្រទេស ដើម្បីជាការរួមចំណែកលើក កម្ពស់កម្រិតជីវភាពពលរដ្ឋខ្មែរគ្រប់រូបឱ្យកាន់តែល្អប្រសើរឡើង។

សម្តេចបានណែនាំឲ្យគ្រប់ក្រសួង ស្ថាប័នពាក់ព័ន្ធទាំងថ្នាក់ជាតិនិងថ្នាក់ក្រោមជាតិ ក៏ដូចជាដៃគូអភិវឌ្ឍ អង្គការមិនមែនរដ្ឋាភិបាលជាតិ អន្តរជាតិ ផ្នែកឯកជន បន្តកិច្ចសហការជាមួយគណៈកម្មាធិការជាតិជំរុញចលនា ភូមិមួយផលិតផលមួយ ដើម្បីជួយអភិវឌ្ឍផលិតផលខ្មែរ ផលិតផលភូមិ១ផលិតផល១ ឱ្យកាន់តែមានភាពសម្បូរបែប និងមានសក្តានុពលពាណិជ្ជកម្មទាំងលើទីផ្សារជាតិនិងអន្តរជាតិ។

ទាក់ទងការជំរុញចលនាប្រើប្រាស់ផលិតផលក្នុងស្រុក លោក សួង ណយ អនុប្រធានគណៈកម្មាធិការជាតិជំរុញចលនាភូមិមួយផលិតផលមួយនៃទីស្តីការគណៈរដ្ឋមន្រ្តីបានឲ្យកម្ពុជាថ្មីដឹងថា ពលរដ្ឋខ្មែរគ្រប់រូបគួរទិញផលិតផលខ្មែរទើបធ្វើឲ្យប្រជាកសិកម្ម សិប្បកម្ម អាជីវកម្ម សេវាកម្ម សហគ្រាស ផលិតផលខ្មែររីកចម្រើនជឿនលឿន ជាពិសេសកសិករខ្មែរមានជីវភាពធូរធារ។

ចលនាភូមិមួយផលិតផលមួយ មានចរិតជាការអភិវឌ្ឍសេដ្ឋកិច្ចចម្រុះនៅមូលដ្ឋាន។ រយៈពេលប៉ុន្មានឆ្នាំចុងក្រោយ ការជំរុញចលនាភូមិមួយផលិតផល បានសម្រេចបានលទ្ធផលយ៉ាងប្រសើរដែលនាំឲ្យជំរុញការប្រែប្រួលជាវិជ្ជមាននៃផលិតផលខ្មែរទាំងគុណភាព ស្តង់ដាអនាម័យ ការវិចខ្ចប់ ជាពិសេសការដាក់ស្លាកសម្គាល់លើផលិតផលជា «ផលិតផលភូមិមួយផលិតផលមួយ» ដែលមានចំនួន ៥៥៩ គិតត្រឹមឆ្នាំ ២០២៣ នៅទូទាំង ២៥ រាជធានីខេត្ត។

បើតាមលោក សួង ណយ នៅឆ្នាំ ២០២៤ គណៈកម្មាធិការជាតិជំរុញចលនាភូមិមួយផលិតផលគ្រោងចុះបញ្ជីបន្ថែម “ផលិតផលភូមិ ១ ផលិតផល ១» ចំនួន ៣០០ មុខបន្ថែមទៀត នៅទូទាំង ២៥ រាជធានីខេត្ត៕