ព័ត៌មានជាតិ
ជាប្រធានព្រឹទ្ធសភា សម្ដេចតេជោ មានសិទ្ធិ និងភារកិច្ចអ្វីខ្លះ?
ព្រឹទ្ធសភាបានបើកនីតិកាលថ្មីរបស់ខ្លួនហើយនៅថ្ងៃទី០៣ ខែមេសា ឆ្នាំ២០២៤ ដែលជានីតិកាលទី៥នៃព្រឹទ្ធសភា។ សម្រាប់តំណែងជាប្រធានព្រឹទ្ធសភា ត្រូវធ្លាក់ទៅលើដៃរបស់សម្ដេចតេជោ ហ៊ុន សែន។ តើក្នុងតំណែងជាប្រធានព្រឹទ្ធសភា សម្ដេចតេជោ នឹងមានសិទ្ធិអំណាច និងភារកិច្ចលើកិច្ចការអ្វីខ្លះ?
![](https://www.kampucheathmey.com/wp-content/uploads/2024/04/image-241-1024x682.png)
យោងតាមរដ្ឋធម្មនុញ្ញនៃកម្ពុជា មាត្រា១១ថ្មី បានចែងថា ប្រធានព្រឹទ្ធសភា នឹងក្លាយជាប្រមុខរដ្ឋជំនួសព្រះមហាក្សត្រក្នុងឋានៈជាព្រះរាជានុសិទ្ធិ ក្នុងករណីមានការបញ្ជាក់ពីក្រុមគ្រូពេទ្យជំនាញថា ព្រះមហាក្សត្រទ្រង់ប្រឈួនជាទម្ងន់មិនអាចបំពេញព្រះរាជភារៈជាព្រះប្រមុខរដ្ឋដូចធម្មតា។
ចំណែកមាត្រា១២ថ្មី នៃរដ្ឋធម្មនុញ្ញ បានចែងថា នៅពេលព្រះមហាក្សត្រទ្រង់ចូលទីវង្គត ប្រធានព្រឹទ្ធសភាទទួលភារកិច្ចជាប្រមុខរដ្ឋស្ដីទីក្នុងឋានៈជាព្រះរាជានុសិទ្ធិនៃព្រះរាជាណាចក្រកម្ពុជា។ បន្ថែមពីនេះ ប្រធានព្រឹទ្ធសភា ក៏ជាសមាសភាពមួយ ក្នុងចំណោមសមាសភាពក្រុមប្រឹក្សារាជសម្បត្តិដែលដើរតួនាទីជាអ្នកជ្រើសរើសព្រះមហាក្សត្រថ្មី បន្ទាប់ពីរយៈពេល៧ថ្ងៃក្រោយ ព្រះមហាក្សត្រសោយទីវង្គត។ រីឯរដ្ឋធម្មនុញ្ញមាត្រា៣០ថ្មី បានកំណត់ថា ប្រធានព្រឹទ្ធសភា ក៏មានភារកិច្ចជាប្រមុខរដ្ឋស្ដីទី ក្នុងពេលព្រះមហាក្សត្រទ្រង់អវត្តមាន។
![](https://www.kampucheathmey.com/wp-content/uploads/2024/04/image-244-682x1024.png)
មួយវិញទៀត តាមការអះអាងរបស់សម្ដេចតេជោផ្ទាល់កាលពីថ្ងៃទី០១ ខែមេសា ក្នុងតំណែងជាប្រធានព្រឹទ្ធសភា គឺមានសិទ្ធិចុះហត្ថលេខា ដើម្បីរៀបចំក្បាលម៉ាស៊ីនរដ្ឋសភាកម្ពុជាឡើងវិញ។
ដោយឡែកមាត្រា១១០ថ្មី នៃរដ្ឋធម្មនុញ្ញ បានកំណត់ថា ប្រធានព្រឹទ្ធសភាមានភារកិច្ច ដឹកនាំអង្គប្រជុំរបស់ព្រឹទ្ធសភា ទទួលអាញត្តិច្បាប់ និងសេចក្ដីសម្រេចចិត្តទាំងឡាយដែលព្រឹទ្ធសភាបានអនុម័ត រ៉ាប់រងការអនុម័តបទបញ្ជាផ្ទៃក្នុងរបស់ព្រឹទ្ធសភា និងចាត់ចែងការទាក់ទងអន្តរជាតិទាំងឡាយរបស់ព្រឹទ្ធសភា។ ឯមាត្រា១១១ ថ្មីពីរ បានចែងថា ប្រធានព្រឹទ្ធសភាអាចស្នើសុំឱ្យមានការរៀបចំកិច្ចប្រជុំព្រឹទ្ធសភាជាសម្ងាត់បាន។
![](https://www.kampucheathmey.com/wp-content/uploads/2024/04/image-242-1024x682.png)
រីឯ បទបញ្ជាផ្ទៃក្នុងព្រឹទ្ធសភានៃកម្ពុជាវិញ ជំពូក៣ ប្រការ១១ថ្មី បានចែងថា ប្រធានព្រឹទ្ធសភាមានភារកិច្ចធានាការប្រព្រឹត្តទៅនៃព្រឹទ្ធសភាឱ្យបានត្រឹមត្រូវតាមរដ្ឋធម្មនុញ្ញ ដឹកនាំអង្គប្រជុំនៃព្រឹទ្ធសភា និងគណៈកម្មាធិការអចិន្ត្រៃយ៍ ធានាដឹកនាំការបោះឆ្នោតជ្រើសរើសសមាជិកគណកម្មការនានារបស់ព្រឹទ្ធសភា និងការបោះឆ្នោតជ្រើសតាំងឥស្សរជនសម្រាប់មុខតំណែងផ្សេងៗ ដែលកំណត់ដោយច្បាប់។ ចាត់ចែងបញ្ជូនសេចក្តីព្រាងច្បាប់ ឬសេចក្តីស្នើច្បាប់ ឬបញ្ហា ទាំងពួងដែលបានទទួលទៅគណៈកម្មការ ដើម្បីពិនិត្យ សិក្សា និងរាយការណ៍ជូនគណៈកម្មាធិការអចិន្ត្រៃយ៍ និង អង្គប្រជុំព្រឹទ្ធសភា។
ប្រធានព្រឹទ្ធសភា ក៏មានភារកិច្ចលើកជូនអង្គប្រជុំព្រឹទ្ធសភាសម្រេចអំពីការស្នើសុំចាត់ ទុកជាការប្រញាប់ ឬបើកអង្គប្រជុំ ផ្អាកពេលប្រជុំ ឬលើកពេលប្រជុំព្រឹទ្ធសភា និងគណៈកម្មាធិការអចិន្ត្រៃយ៍។ ចាត់ចែងការពិភាក្សា ហើយចុះហត្ថលេខាលើកំណត់ហេតុ នៃការប្រជុំព្រឹទ្ធសភា និងគណៈកម្មាធិការអចិន្ត្រៃយ៍ ។ញ៉ាំងឱ្យប្រតិបត្តិតាមបទបញ្ជាផ្ទៃក្នុងព្រឹទ្ធសភា សីលធម៌សភារបស់សមាជិកព្រឹទ្ធសភា រក្សាការពារសណ្តាប់ធ្នាប់ក្នុងព្រឹទ្ធសភា។ ប្រធានព្រឹទ្ធសភា ក៏មានភារកិច្ចជាតំណាងព្រឹទ្ធសភា ក្នុងការទាក់ទងជាមួយព្រះមហាក្សត្រ រដ្ឋសភា ឬអាជ្ញាធរសាធារណៈ ទាក់ទងជាមួយប្រធានរដ្ឋសភា ដើម្បីរៀបចំសមាជរដ្ឋសភា និងព្រឹទ្ធសភា ស្របតាមច្បាប់ស្ដីពីការរៀបចំ និងការប្រព្រឹត្តទៅនៃសមាជរដ្ឋសភា និងព្រឹទ្ធសភា។ ប្រធានព្រឹទ្ធសភា មានភារកិច្ចចេញសេចក្ដីសម្រេចចាត់តាំងសមាជិកក្រុមសមាជិកព្រឹទ្ធសភាឱ្យទទួលបន្ទុកកិច្ចការងារផ្សេងៗ ក្រោយពីទទួលបានការឯកភាពពីគណៈកម្មាធិការអចិន្ត្រៃយ៍ព្រឹទ្ធសភា៕
ដោយ៖ ង៉ិល ណារ៉ាត់
![](https://www.kampucheathmey.com/wp-content/uploads/2024/04/image-247-682x1024.png)
![](https://www.kampucheathmey.com/wp-content/uploads/2024/04/image-246-1024x683.png)
![](https://www.kampucheathmey.com/wp-content/uploads/2024/04/image-245-1024x682.png)
![](https://www.kampucheathmey.com/wp-content/uploads/2024/04/image-248-1024x682.png)
![](https://www.kampucheathmey.com/wp-content/uploads/2024/04/image-249-1024x682.png)
![](https://www.kampucheathmey.com/wp-content/uploads/2024/04/image-243-1024x682.png)
![](https://kampucheathmey.com/wp-content/uploads/2020/12/1-01-2-01-1.png)
-
សន្តិសុខសង្គម១ សប្តាហ៍ ago
«ចែមុំបុកល្ហុង» សង្ស័យបង្កប់សេវាកម្មផ្លូវភេទ នគរបាលចុះបង្ក្រាបឃាត់ខ្លួនមនុស្ស១១នាក់
-
បច្ចេកវិទ្យា៤ ថ្ងៃ ago
ទូរស័ព្ទថតរូបក្នុងទឹកដំបូងគេក្នុងប្រទេសកម្ពុជា OPPO Reno13 Series 5G សម្ពោធជាផ្លូវការហើយ និងបំពាក់ដោយ AI ទំនើបៗ
-
ព័ត៌មានជាតិ២ ថ្ងៃ ago
រថយន្តបុកគ្នា ខ្ទាតចេញប្រេងឆាគ្មានម៉ាកយីហោ២០០កាន៖ ពលរដ្ឋខ្លាចប៉ះពាល់សុខភាពអ្នកប្រើប្រាស់
-
ព័ត៌មានជាតិ១ សប្តាហ៍ ago
ករណីលូ១តម្លៃ៤០ដុល្លា៖ អាជ្ញាធរ ថាមិនបានយកលុយពីពលរដ្ឋឡើយ គឺពលរដ្ឋជួលភាគីឯកជនឱ្យដាក់ខ្លួនឯង
-
ជីវិតកម្សាន្ដ៤ ថ្ងៃ ago
G-Devith ៖ បុគ្គលដែលអាចហែកមេឃចេញបាន មានន័យថា អ្នកនោះអាចរួចពីសំណាញ់ច្បាប់ហើយ
-
ព័ត៌មានជាតិ១ សប្តាហ៍ ago
អ្នកស្រុកតំបន់អង្គរ បន្ដធ្វើពិធីចាប់ត្រីរួមគ្នាតាមទំនៀមទម្លាប់ពីដូនតា សម្រាប់ប្រារព្ធពិធីឡើងមាឃ
-
ជីវិតកម្សាន្ដ១ សប្តាហ៍ ago
G-Devith ដាក់បណ្តឹងទៅ UNICEF នៅកម្ពុជា ដើម្បីលុបជាអចិន្ត្រៃយ៍គ្រប់គណនីហ្វេសប៊ុក ដែលប៉ះពាល់សិទ្ធិកុមារ តាមគ្រប់រូបភាព
-
ចរាចរណ៍១ សប្តាហ៍ ago
ផ្លូវ៦០ម៉ែត្រទៀត! រថយន្ដពាក់ស្លាកលេខរដ្ឋ បុករះរថយន្ដ២គ្រឿងកំពុងឈប់ចាំភ្លើងស្តុបរងការខូចខាត