ចាប់ក្រុមភ្ជាប់បណ្តាញខ្សែកាបជាង​៧០០​ម៉ែត្រចូលកម្ពុជា ដើម្បីដំណើរការល្បែងភ្នាល់​អន​ឡាញ​

តាមសេចក្ដីរាយការណ៍របស់ MCOT នៅថ្ងៃទី០២ ខែមេសា បានឱ្យដឹងថា សមត្ថកិច្ចនគរបាលភូមិភាគ២ថៃ សហការ​ជាមួយកងកំលាំងប្រចាំទិសបូព៌ា និងការិយាល័យស៊ើបអង្កេតកណ្តាលបានបើកប្រតិបត្តិការចុះចាប់និងកាត់ផ្តាច់បណ្តាញខ្សែកាបអ៊ីធឺណិតឆ្លងព្រំដែនជាង៧០០ម៉ែត្រដែលក្រុមឧក្រិដ្ឋជនឆបោកតាមអនឡាញបានតភ្ជាប់ឆ្លងដែនចូលទៅខាងទឹកដីកម្ពុជាសម្រាប់ដំណើរការល្បែងភ្នាល់​អន​ឡាញ។

កម្លាំងសមត្ថកិច្ចបានបានឆ្មក់ចូល​ឆែកឆេរអគារការិយាល័យ​លក់​ខុនដូមួយកន្លែងដែលពួកក្រុមឧក្រិដ្ឋជនឆបោកបោះបង់ចោល​នៅ​ស្រុក​អារញ្ញ​ខេត្ត​ស្រះកែវ និង​បាន​រកឃើញថា មានក្រុមហ៊ុនមួយ​នៅក្រុង​បាងកកជា​អ្នកបង់ប្រាក់ថ្លៃជួលសេវាអ៊ីធឺណិតនៅអគារខុនដូរទាំងនេះ ទើបសមត្ថកិច្ចចូលឆែកឆេរ​ក្រុមហ៊ុនបម្រើសេវា​អ៊ី​ន​ធឺ​ណេ​ត​ និងបាន​រកឃើញ​ឧបករណ៍​អេឡិចត្រូនិក​ពាក់ព័ន្ធ​ចំនួន៩គ្រឿង​។

តាមការសាកសួរជនសង្ស័យបានសារភាពថា ខ្លួនត្រូវបានគេជួលមកឱ្យដំឡើងបណ្តាញអ៊ីនធឺណិត។ ដំបូង​ឡើយ ក្រុមហ៊ុនទាំងនេះ​គ្រប់គ្រងដោយជនជាតិថៃនៅកម្ពុជា ដែលសមត្ថកិច្ចដាក់ការចោទប្រកាន់ថាជាបទល្មើសស្តីពីច្បាប់អាជីវកម្មទូរគមនាគមន៍ដោយ​គ្មានការ​អនុញ្ញាត បង្កើត​ល្បែងស៊ីសងអនឡាញតាមប្រព័ន្ធ​អ៊ីនធឺណិត     ឆបោកប្រជាជន រួមដៃជាមួយក្រុមឧក្រិដ្ឋកម្មឆ្លងដែន និងបទល្មើសលាងលុយកខ្វក់ដែលត្រូវមានទោសធ្ងន់ធ្ងរ៕

ប្រែសម្រួលដោយ សំអាន