លោក ប្រាក់ សុខុន និងលោក អ៊ុច បូររិទ្ធ បានជាប់ជាអនុប្រធានទី១ និងអនុប្រធានទី២ ព្រឹទ្ធសភា

អតីតប្រមុខការទូតកម្ពុជា លោក ប្រាក់ សុខុន និងអតីតទេសរដ្ឋមន្ត្រី លោក អ៊ុច បូររិទ្ធ ត្រូវបានសមាជិក-សមាជិកាព្រឹទ្ធសភា បោះឆ្នោតជ្រើសរើសឱ្យធ្វើជាអនុប្រធានទី១ និងអនុប្រធានទី២ នៃព្រឹទ្ធសភា សម្រាប់នីតិកាលទី៥នេះ។

ក្នុងសម័យប្រជុំដំបូង ព្រឹទ្ធសភា នាព្រឹកថ្ងៃទី០៣ ខែមេសា ឆ្នាំ២០២៤ ដែលដឹកនាំកិច្ចប្រជុំដោយប្រធានបណ្ដោះអាសន្ន គឺលោក សុខ ឥសាន បានធ្វើការបោះឆ្នោតជ្រើសរើសសមាសភាពក្បាលម៉ាស៊ីនព្រឹទ្ធសភា ដែលក្នុងនោះ អតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ត្រូវបានសមាជិក-សមាជិកាព្រឹទ្ធសភាសរុប៦២រូប បោះឆ្នោតឱ្យជាប់ជាប្រធានព្រឹទ្ធសភា សម្រាប់នីតិកាលថ្មីនេះ។

ដោយឡែក​ លោក ប្រាក់ សុខុន ត្រូវបានជ្រើសរើសឱ្យធ្វើជាអនុប្រធានទី១ និងលោក អ៊ុច បូររិទ្ធ ជាអនុប្រធានទី២ សម្រាប់នីតិកាលទី៥នេះ ដោយសំឡេងឆ្នោតគាំទ្រសរុប ៦២លើ៦២ ដូចគ្នា ដោយគ្មានការជំទាស់នោះឡើយ៕