ឯកឧត្ដម ហ៊ុន ម៉ានី ៖ បន្ទាប់ពីបេសកកម្មដឹកនាំជាតិជាង ៤០ ឆ្នាំ សម្ដេច នឹងបន្តដឹកនាំស្ថាប័ននីតិប្បញ្ញត្តិជាន់ខ្ពស់ ដើម្បីរួមចំណែកកាន់ចង្កូតនាវាកម្ពុជាឲ្យគង់វង្ស

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មុខងារ​សាធារណៈ លើក​ឡើង​ថា «បន្ទាប់ពី​បេសកកម្ម​ដឹកនាំ​ជាតិ​រយៈពេល​ជាង ៤០ ឆ្នាំ ក្នុង​ឋានៈ​ជា នាយករដ្ឋមន្ត្រី សម្ដេច នឹង​បន្ត​ដឹកនាំ​ស្ថាប័ន​នីតិប្បញ្ញត្តិ​ជាន់ខ្ពស់ ដើម្បី​ចូលរួម​ចំណែក​ក្នុង​ការ​កាន់​ចង្កូត​នាវា​កម្ពុជា ឲ្យ​ស្ថិតស្ថេរ គង់វង្ស លើ​មាគ៌ា​សន្តិភាព និង​ការ​អភិវឌ្ឍ»។

នៅ​ថ្ងៃ​ទី ០៣ ខែ​មេសា ឆ្នាំ ២០២៤ នេះ តាមរយៈ​ទំព័រ​ហ្វេសប៊ុក ឯកឧត្ដម ហ៊ុន ម៉ានី ឧបនាយករដ្ឋមន្ត្រី បាន​សរសេរ​ថា ឯកឧត្ដម សូម​គោរព​អបអរសាទរ​ដ៏​ក្លៀវក្លា​បំផុត ជូន​ចំពោះ សម្ដេច​អគ្គ​មហា​សេនា​បតី​តេ​ជោ ហ៊ុន សែន ក្នុង​ឱកាស​ដែល សម្ដេច ត្រូវ​បាន​សម័យប្រជុំ​លើក​ទី ១ ព្រឹទ្ធសភា នីតិកាល​ទី ១ បោះឆ្នោត​ជ្រើសរើស​ជា​ប្រធាន​ព្រឹទ្ធសភា ដោយ​សំឡេង ៦២ លើ ៦២។

ឯកឧត្ដម ហ៊ុន ម៉ានី សរសេរ​បន្ត​ថា ក្នុង​នាម​ជា​អ្នក​ជំនាន់​ក្រោយ ឯកឧត្ដម សូម​សម្ដែង​នូវ​ក្តី​កតញ្ញូ​កតវេទី​ដ៏​ជ្រាលជ្រៅ​បំផុត ចំពោះ​ការ​លះបង់​កម្លាំងកាយ ចិត្ត ធ្វើ​ពលិកម្ម​សព្វបែបយ៉ាង​ដើម្បី​ជាតិ មាតុភូមិ និង​ប្រជាជន​របស់ សម្ដេច។ បន្ទាប់ពី​បេសកកម្ម​ដឹកនាំ​ជាតិ​រយៈពេល​ជាង ៤០ ឆ្នាំ ក្នុង​ឋានៈ​ជា នាយករដ្ឋមន្ត្រី សម្ដេច នឹង​បន្ត​ដឹកនាំ​ស្ថាប័ន​នីតិប្បញ្ញត្តិ​ជាន់ខ្ពស់ ដើម្បី​ចូលរួម​ចំណែក​ក្នុង​ការ​កាន់​ចង្កូត​នាវា​កម្ពុជា ឲ្យ​ស្ថិតស្ថេរ គង់វង្ស លើ​មាគ៌ា​សន្តិភាព និង​ការ​អភិវឌ្ឍ។

ឯកឧត្ដម​ឧបនាយករដ្ឋមន្ត្រី សរសេរ​បញ្ជាក់​ថា ការ​បោះឆ្នោត​ផ្តល់​សេចក្ដី​ទុកចិត្ត​ជូន សម្ដេច​តេ​ជោ ដើម្បី​ដឹកនាំ​ស្ថាប័ន​កំពូល​មួយ​នេះ គឺ​ពិតជា​បង្ហាញ​យ៉ាង​ជាក់ច្បាស់​នូវ​តួនាទី​ដ៏​ឧត្តុង្គ​ឧត្ដម​របស់ សម្ដេច​តេ​ជោ ដែល​ប្រជារាស្ត្រ​ខ្មែរ​ច្រើន​លើសលប់​គោរព ស្រឡាញ់ ដ៏​ជ្រាលជ្រៅ និង​តែងតែ​មាន​ជំនឿ​ចិត្ត​យ៉ាង​មុតមាំ​លើ​គតិបណ្ឌិត និង​ភាព​វៃ​ឆ្លាត​របស់ សម្ដេច​តេ​ជោ ក្នុង​ការ​ដឹកនាំ​ប្រទេសជាតិ។

ជាចុងក្រោយ ឆ្លៀត​ក្នុង​ឱកាស​ដ៏​មហា​នក្ខត្តឫក្ស​នេះ ឯកឧត្ដម​ឧបនាយករដ្ឋមន្ត្រី សូម​គោរព​បួងសួង​ដល់​គុណបុណ្យ​ព្រះ​រតនត្រ័យ កែវ​ទាំង​បី វត្ថុ​ស័ក្ដិសិទ្ធិ​ទាំងឡាយ​ក្នុង​លោក សូម​យាង​បីបាច់​ថែរក្សា​ប្រទាន​ពរជ័យ សិរី​សួស្ដី ជ័យ​មង្គល គ្រប់​ប្រការ​ជូន សម្ដេច​តេ​ជោ និង សូម សម្ដេច សម្រេច​ជោគជ័យ​យ៉ាង​ត្រចះត្រចង់​ក្នុង​ភារកិច្ច​ដឹកនាំ​ព្រឹទ្ធសភា សំដៅ​រួមចំណែក​ថែរក្សា​សុខ​សន្តិភាព ស្ថិរភាព ភាព​សំបូរ​សប្បាយ រុងរឿង និង​ប្រទេស​ជាតិ​មាន​ការ​អភិវឌ្ឍ​លើ​គ្រប់​វិស័យ​ជានិច្ច​និរន្តរ៍​តរៀង​ទៅ។

គួរ​ជម្រាប​ថា បន្ទាប់ពី​ទទួល​ជោគជ័យ​ដ៏​មហាសាល​លើ​បេសកកម្ម​ដឹកនាំ​ជាតិ ពោរពេញ​ដោយ​ក្តី​លំបាក​មិន​អាច​គណនា​រយៈពេល​ជាង ៤០ ឆ្នាំ ក្នុង​ឋានៈ​ជា​នាយករដ្ឋមន្ត្រី​របស់​កម្ពុជា​នោះ នៅ​ពេលនេះ សម្តេច​តេ​ជោ ហ៊ុន សែន បាន​បន្ត​តួនាទី​ភារកិច្ច​ថ្មី​ជា​ប្រធាន​ព្រឹទ្ធសភា ដែល​ជា​ស្ថាប័ន​កំពូល​មួយ​របស់​ជាតិ។

ក្នុង​សម័យ​ប្រជុំ​លើកដំបូង​ព្រឹទ្ធសភា​នីតិកាល​ទី ៥ កាលពី​ព្រឹក​ថ្ងៃ​ពុធ ទី ៣ ខែ​មេសា ឆ្នាំ ២០២៤ នេះ មួយ​ថ្ងៃ​មុន​ខួប ៥៤ ឆ្នាំ នៃ​ការ​ប្រែក្លាយ​ជីវិត​ជា​យុទ្ធជន​ប្រយុទ្ធ​ដណ្តើម​អំណាច ថ្វាយ សម្តេច នរោត្តម សីហនុ នោះ សម្តេច​តេ​ជោ ហ៊ុន សែន ទទួល​បាន​ការ​បោះឆ្នោត​គាំទ្រ​ពី​សមាជិក​ព្រឹទ្ធសភា ៦២ លើ ៦២ សំឡេង ឲ្យ​ធ្វើជា​ប្រធាន​ដឹកនាំ​ព្រឹទ្ធសភា៕

អត្ថបទ ៖ ពិសី