ខេត្តកំពតបើកឱ្យទេសចរ ចូលកម្សាន្តឆ្នេរខ្សាច់ថ្មី ក្នុងឱកាសបុណ្យចូលឆ្នាំ មុនផែនការបញ្ចប់ការសាងសង់

រដ្ឋបាលខេត្តកំពត នឹងបើកឱ្យភ្ញៀវទេសចរចូលលេងកម្សាន្តឆ្នេរខ្សាច់ថ្មីដែលស្ថិតនៅចន្លោះពីស្ពានចាស់ និងស្ពានថ្មី ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ខណៈក្រុមការងារសាងសង់កំពុងពន្លឿនឱ្យបានឆាប់រួចរាល់។

លោក ម៉ៅ ធនិន អភិបាលខេត្តកំពត នៅថ្ងៃទី ០៣ ខែមេសា ឆ្នាំ ២០២៤ បានបន្តចុះពិនិត្យវឌ្ឍនភាពនៃការស្ថាបនាផ្លូវឆ្នេរខ្សាច់កម្សាន្តប្របមាត់ព្រែកកំពង់បាយចាប់ពីស្ពានឥន្ទធនូ (ស្ពានចាស់) រហូតដល់ស្ពានកំពង់បាយ(ស្ពានថ្មី) និងរូបសំណាកសេះសមុទ្រមុខសាលាខេត្តចាស់។

ក្នុងដំណើចុះពិនិត្យវឌ្ឍនភាពនេះ លោកអភិបាលខេត្តបានលើកឡើងថា ដើម្បីពង្រីកវិសាលភាពនៃទីតាំងកម្សាន្តក្នុងក្រុងកំពត រដ្ឋបាលខេត្តនឹងរៀបចំបើកឱ្យភ្ញៀវទេសចរចូលលេងកម្សាន្តឆ្នេរកម្សាន្តចាប់ពីស្ពានចាស់ រហូតដល់ស្ពានថ្មី ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ បើទោះបីជាឆ្នេរនេះមិនទាន់រៀបចំបានរួចរាល់ក៏ដោយ។

លោក ម៉ៅ ធនិនបានបន្តថា ឆ្នេរកម្សាន្តមួយនេះគឺជាបេះដូងនៃខេត្តកំពត ហើយក្រោយស្ថាបនារួចរាល់នឹងមានសោភ័ណភាពស្អាត អាចទាក់ទាញភ្ញៀវទេសចរជាតិ និងអន្តរជាតិមកលេងច្រើន ដោយសារតែទីតាំងនេះអាចបង្ករលក្ខណៈឱ្យភ្ញៀវទេសចរអាចងូតទឹកលេងកម្សាន្តមើលថ្ងៃរៀបលិចពេលល្ងាច។

លោកអភិបាលខេត្ត ក៏បានជំរុញដល់អង្គភាពជំនាញ មន្ទីរជំនាញពាក់ព័ន្ធ ត្រូវយកចិត្តទុកដាក់ក្នុងការពន្លឿនស្ថាបនាផ្លូវឱ្យបានរួចរាល់មុនពេលបុណ្យចូលឆ្នាំមកដល់ រៀបចំអនាម័យ បរិស្ថានឱ្យបានស្អាតល្អ រៀបចំភ្លើងបំភ្លឺ ពិសេសត្រូវសិក្សាដាក់តាំងភ្លើងពណ៌ដើម្បីលម្អនាពេលយប់ឱ្យមានភាពទាក់ទាញ ចាប់ពីគល់ស្ពានឥន្ទធនូ រហូតដល់ស្ពានថ្មថ្មី។

ម្យ៉ាងទៀត ចំពោះរូបសំណាកសេះសមុទ្របាញ់ទឹកដែលមានកម្ពស់ ៨ម៉ែត្រ ក៏ត្រូវរៀបចំឱ្យបានរួចរាល់នៅមុនពេលចូលឆ្នាំថ្មីប្រពៃណីជាតិខ្មែរដូចគ្នា ដោយមានការតុបតែងភ្លើងពណ៌ និងការបាញ់ទឹកឱ្យបានស្អាត៕

អត្ថបទ៖ សឹង រ៉ាត់