កសិករដាំម្ទេសម្នាក់ ព្រួយបារម្ភយ៉ាងខ្លាំង ខណៈ​ប្រមូលផល តម្លៃមានការធ្លាក់ចុះជាងឆ្នាំមុនៗ

កសិករដាំម្ទេសម្នាក់ ស្ថិតនៅក្នុងស្រុកឯកភ្នំ ខេត្តបាត់ដំបង ​កំពុងព្រួយបារម្ភយ៉ាងខ្លាំង ខណៈប្រមូលផលម្ទេស តម្លៃទីផ្សារមានការធ្លាក់ចុះជាងបណ្ដាឆ្នាំមុនៗ ដោយលោកបានអះអាងថា​ ពេលកន្លងទៅ ម្ទេសអាចលក់ចេញបានក្នុងតម្លៃខ្ពស់សមរម្យ ដែលអាចទប់ទល់ការចំណាយថ្លៃដើមបានយ៉ាងងាយស្រួលជាងឆ្នាំនេះ។

លោក វង្ស ចាន់រិទ្ធ កសិករដាំម្ទេសក្នុងទំហំដីជាង១ហិកតា ស្ថិតក្នុងស្រុកឯកភ្នំ ខេត្តបាត់ដំបង បានប្រា​ប់ឱ្យកម្ពុជាថ្មី ដឹងថា សម្រាប់ឆ្នាំនេះ លោកពិតជាព្រួយបារម្ភខ្លាំង  ចំពោះតម្លៃទីផ្សារម្ទេសទុំ ដែលត្រូវប្រមូលផលបាន ប៉ុន្តែតម្លៃមានការធ្លាក់ចុះយ៉ាងខ្លាំង ដែលមិនអាចទប់ទល់នឹងនឹងការចំណាយថ្លៃដើមផលិត ក្នុងនោះមានដូចជា៖ ថ្លៃប្រេងសម្រាប់បូមទឹក ថ្លៃជី និងថ្លៃកម្លាំងពលកម្ម ជាដើម។

កសិកររូបនេះ បន្ថែមទៀតថា ក្នុងមួយថ្ងៃ លោកអាចប្រមូលផលម្ទេស បានប្រមាណជាង ៣០០ ទៅ ៤០០គីឡូក្រាម ក្នុងទំហំដីជាង១ហិកតា ចំណែកតម្លៃបោះដុំទៅកាន់ទីផ្សារវិញ ម្ទេស១គីឡូក្រាម លក់បានក្នុងតម្លៃ ២៣០០រៀល​ ទៅ ២៤០០រៀល តែប៉ុណ្ណោះ។

លោក វង្ស ចាន់រិទ្ធ បានបន្តទៀតថា បើប្រៀបធ្រៀបទៅបណ្ដាឆ្នាំមុនៗ តម្លៃទីផ្សារម្ទេស មានភាពខុសគ្នាយ៉ាងខ្លាំង ដែលឆ្នាំកន្លងទៅ ម្ទេស១គីឡូក្រាម លក់ចេញទៅកាន់ទីផ្សារបាន ៤៥០០រៀល ទៅ ៥០០០រៀល ពេលខ្លះក៏អាចលក់បានតម្លៃថ្លៃជាងនេះ ក៏មានដែរ។

លោក វង្ស ចាន់រិទ្ធ បានប្រាប់ឱ្យដឹងទៀតថា ក្រោយមានការជួយផ្សព្វផ្សាយពីអ្នកលេងបណ្ដោញសង្គមហ្វេសប៊ុក ចំការម្ទេស របស់លោកមានការចាប់អារម្ម​ណ៍យ៉ាងខ្លាំងពីសំណាក់មហាជនខ្មែរ តែអ្វីដែលលោកនៅតែព្រួយបារម្ភនោះគឺ តម្លៃលក់ចេញនៅតែមានគ្មានទីផ្សារល្អដដែល។

កសិករដាំម្ទេសរូបនេះ ក៏សូមសំណូមពរឱ្យប្រជាពលរដ្ឋខ្មែរទាំងអស់ នាំគ្នាជួយគាំទ្រផលិតផលកសិកម្មខ្មែរ មិនថាម្ទេស ឬដំណាំផ្សេងៗនោះទេ ត្រូវជួយគ្នាទើបកសិករមានកម្លាំងចិត្ត ក្នុងការធ្វើកសិកម្មបន្តទៀត ប្រសិនបើ កសិផលខ្មែរអាចលក់ចេញផលិតផលរបស់ខ្លួនបានក្នុងតម្លៃទីផ្សារល្អ កសិករក៏មានជីវភាពធូរធារ ប្រជាជនខ្មែរក៏រីកចម្រើនដូចគ្នា ផងដែរ៕

អត្ថបទ ៖ សួស សិត