មន្ទីរពេទ្យឯកជន​នៅ​ខណ្ឌ​ច្បារអំពៅ សហការ​​ទទួល​ព្យាបាល​អ្នក​ឆ្លង​ជំងឺ​កូវីដ-១៩

ស្ថានទូតវៀតណាមប្រចាំកម្ពុជាបានឲ្យដឹងថា មន្ទីរពេទ្យជោរៃភ្នំពេញ នឹង​ចូលរួមសហការជាមួយរាជរដ្ឋាភិបាលកម្ពុជាក្នុងការទទួលយកអ្នកជំងឺកូវីដ-១៩ទៅតាមសំណើររបស់ប្រមុខរដ្ឋាភិបាលកម្ពុជា។

តាមរយៈសារជាសំឡេងកាលពីម្សិលមិញនេះសម្តេច ហ៊ុន សែន បានប្រកាសថា រាជរដ្ឋាភិបាល កម្ពុជាបានជ្រើស​រើស យកមន្ទីរពេទ្យធំៗ និងមានភាពទុកចិត្តពីសាធារណជនចំនួន២ គឺមន្ទីរពេទ្យព្រះកេតុមាលា និងមន្ទីរពេទ្យជោរៃ ភ្នំពេញឲ្យធ្វើជាកន្លែងបម្រុងសម្រាប់ដាក់ទទួលអ្នកជំងឺកូវីដ១៩បន្ថែម ដោយសារមានអ្នកឆ្លងជំងឺនេះកើនឡើងយ៉ាងគំហុក ។

យោងតាមគេហទំព័ររបស់ស្ថានទូតវៀតណាមប្រចាំកម្ពុជាបានឲ្យដឹងថា បន្ទាប់ពីទទួលបានសារសម្តេច ហ៊ុន សែនស្ថានទួតក៏បានពិភាក្សាភ្លាមជាមួយនាយក នៃមន្ទីរពេទ្យជោរៃភ្នំពេញ ហើយបានសម្រេច ធ្វើកិច្ចសហការជាមួយរាជរដ្ឋាភិបាលកម្ពុជាដោយក្តីរីករាយ ដើម្បីត្រៀមទទួលយកអ្នកជំងឺកូវីដ-១៩ ក្នុងគ្រាដែលកម្ពុជាកំពុងរងការវាយប្រហារដោយកូវីដ-១៩ជាថ្មីនេះ។  

ស្ថានទូតវៀតណាមប្រចាំនៅកម្ពុជាបានឲ្យដឹងថា មន្ទីរពេទ្យជោរៃភ្នំពេញ ជាមន្ទីរពេទ្យសហប្រតិបត្តិការអន្តរជាតិ រវាងកម្ពុជានិងវៀតណាម ហើយមន្ទីរពេទ្យពិតជាមានកិត្តិយសយ៉ាងខ្លាំងណាស់ ដោយបានទទួលការវាយតម្លៃយ៉ាងខ្ពស់ និងភាពជឿជាក់លើកំរិតជំនាញផ្នែកវេជ្ជសាស្ត្រ និងសមត្ថភាពព្យាបាល ពីថ្នាក់ដឹកនាំជាន់ខ្ពស់នៃព្រះរាជាណាចក្រកម្ពុជា។

ដោយឡែក មន្ទីរពេទ្យ ព្រះកេតុមាលា ក៍ត្រូវបានសម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិបញ្ជាឲ្យ នាយកមន្ទីរពេទ្យនេះធ្វើការរៀបចំឲ្យបានរួចរាល់ផងដែរ ដើម្បីត្រៀមទទួលព្យាបាលអ្នកឆ្លងជំងឺកូវីដ១៩ ទៅតាមតម្រូវការចាំបាច់។

គួរបញ្ជាក់ថាថា គិតត្រឹមព្រឹកថ្ងៃទី២២ កុម្ភៈនេះមានករណីឆ្លងសហគមន៍២០កុម្ភៈបានកើនឡើងដល់ ៧៦នាក់ហើយក្នុងចំណោម

អ្នកឆ្លងជំងឺកូវីដ១៩សរុបចំនួន៥៦៨នាក់ក្នុងនោះអ្នកព្យាបាលឲ្យជាសះស្បើយមានចំមនួន៤៧៥នាក់និងអ្នកកំពុងបន្តសម្រាកព្យាបាលមានចំនួន៩៣នាក់៕

អត្ថបទ៖ សំអឿន