ជាប់ឆ្នោតជាប្រធានព្រឹទ្ធសភាបាន២ថ្ងៃ សម្តេច ហ៊ុន សែន ក៏ទទួលភារៈជាប្រមុខរដ្ឋស្តីទី

ក្រោយជាប់ឆ្នោតជាប្រធានព្រឹទ្ធសភា បានរយៈពេល២ថ្ងៃ សម្តេចតេជោ ហ៊ុន សែន បានទទួលសិទ្ធិជាប្រមុខរដ្ឋស្តីទី ជំនួសព្រះមហាក្សត្រនៃកម្ពុជា ដែលព្រះមហាក្សត្រត្រូវស្តេចយាងទៅបំពេញព្រះរាជទស្សនកិច្ចផ្លូវរដ្ឋនៅប្រទេសជប៉ុន។

នៅព្រឹកថ្ងៃទី៥ ខែមេសា ឆ្នាំ២០២៤នេះ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានយាងទៅបំពេញព្រះរាជទស្សនកិច្ចនៅប្រទេសជប៉ុន ចាប់ពីថ្ងៃទី៥ ខែមេសា ឆ្នាំ២០២៤តទៅ។

នៅក្នុងឱកាសព្រះអវត្តមានរបស់ព្រះមហាក្សត្រនៅក្នុងប្រទេស ព្រះអង្គបានប្រគល់ភារកិច្ចជូនសម្តេចតេជោ ហ៊ុន សែន ក្នុងនាមជាប្រធានព្រឹទ្ធសភា ធ្វើជាប្រមុខរដ្ឋស្តីទីនៃកម្ពុជា។ ព្រះរាជសាររបស់ព្រះមហាក្សត្រ បានបញ្ជាក់ដូច្នេះថា «នៅក្នុងឱកាសអវត្តមាននៃទូលព្រះបង្គំ ខ្ញុំព្រះករុណា ខ្ញុំ ខាងលើនេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នឹងទទួលជួយទូលព្រះបង្គំ ខ្ញុំព្រះករុណា ខ្ញុំ ក្នុងឋានៈជាប្រមុខរដ្ឋស្តីទី នៃព្រះរាជាណាចក្រកម្ពុជា»។

សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា ត្រូវបានសម័យប្រជុំលើកដំបូងនៃព្រឹទ្ធសភា នីតិកាលទិ៥ បោះឆ្នោតជ្រើសតាំងជាប្រធានព្រឹទ្ធសភា សម្រាប់នីតិកាលទី៥ កាលពីថ្ងៃទី៣ ខែមេសា ឆ្នាំ២០២៤។ ការក្លាយជាប្រធានព្រឹទ្ធសភាពេលនេះ ត្រូវបានព្រះករុណា ព្រះមហាក្សត្រនៃកម្ពុជា បានចេញព្រះរាជសារអបអរសាទរ និងសម្ដែងព្រះរាជហឫទ័យជឿជាក់លើសម្តេចតេជោ ថា នឹងបន្តដឹកនាំព្រឹទ្ធសភាក្នុងការរៀបចំ និងពិនិត្យច្បាប់ជាតិឱ្យបានគ្រប់គ្រាន់ ត្រឹមត្រូវស្របតាមរដ្ឋធម្មនុញ្ញ។

បច្ចុប្បន្ន បន្ទាប់ពីចុះចេញពីតំណែងនាយករដ្ឋមន្ត្រី សម្តេចតេជោ ហ៊ុន សែន ក៏ត្រូវបានព្រះមហាក្សត្រនៃកម្ពុជា ចេញព្រះរាជក្រឹត្យត្រាស់បង្គាប់តែងតាំងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ផងដែរ៕