អគ្គមេបញ្ជាការទ័ព អរគុណអាមេរិកដែលបើកឡើងវិញការបណ្ដុះបណ្ដាលជំនាញដល់កងទ័ពកម្ពុជា

អគ្គមេបញ្ជាការនៃកងយោធពលខេមរភូមិន្ទ បានអរគុណសហរដ្ឋអាមេរិកដែលបានបើកឱ្យមានឡើងវិញនូវការបណ្ដុះបណ្ដាលជំនាញដល់កងទ័ពកម្ពុជា ពិសេសលើជំនាញសន្តិសុខ និងភាសាអង់គ្លេស។

ក្នុងឱកាសទទួលជួបជាមួយលោកវរសេនីយ៍ឯក ថាំង ជេគី លី អនុព័ន្ធយោធាសហរដ្ឋអាមេរិកប្រចាំកម្ពុជា នាថ្ងៃទី៤ ខែមេសា ឆ្នាំ២០២៤ លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបង្ហាញការ កត់សម្គាល់ពីទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ដែលពីមួយថ្ងៃទៅមួយថ្ងៃកាន់តែរីកចម្រើន តាម រយៈការបំពេញទស្សនកិច្ច ការផ្ដល់ជំនួយ ក៏ដូចជាសកម្មភាពនានារបស់អាមេរិកជួយដល់កងយោធពលខេមរភូមិន្ទ។

លោកនាយឧត្តមសេនីយ៍ វង្ស ពិសេន ចាត់ទុកថា តាមរយៈនេះបានបង្ហាញយ៉ាងច្បាស់នូវទំនាក់ទំនងដ៏ល្អរវាងកម្ពុជា និងសហរដ្ឋអាមេរិក។

លោកនាយឧត្តមសេនីយ៍ វង្ស​ ពិសេន បានអរគុណសហរដ្ឋអាមេរិក ដែលបានយកចិត្តទុកដាក់បើកឱ្យមានឡើងវិញនូវការបណ្ដុះបណ្ដាលធនធានមនុស្សក្នុងកងយោធពលខេមរភូមិន្ទ ផ្នែកជំនាញសន្តិសុខ និងភាសាអង់គ្លេស ហើយលោក បញ្ជាក់ថា កម្ពុជា ក៏នឹងបន្តកិច្ចសហប្រតិបត្តិការក្នុងការស្វែងរកអដ្ឋិធាតុទាហានអាមេរិកបាត់ខ្លួនក្នុងសម័យសង្គ្រាមដែលនៅសេសសល់ផងដែរ។

ថ្មីម្ដងទៀត លោកនាយឧត្តមសេនីយ៍ អគ្គមេបញ្ជាការ បានវាយតម្លៃខ្ពស់ចំពោះទំនាក់ទំនងមិត្តភាពជាមួយអាមេរិក ហើយជឿជាក់យ៉ាងមុតមាំថា ទៅថ្ងៃខាងមុខ ទំនាក់ទំនងដ៏ជិតស្និទ្ធ និងកិច្ចសហប្រតិបត្តិការល្អរវាងប្រជាជាតិទាំងពីរ កម្ពុជា និងអាមេរិក នឹងត្រូវបានលើកកម្ពស់បន្ថែមទៀត៕