សមត្ថកិច្ចខេត្តព្រះវិហារ បង្ក្រាបទំនិញខូចគុណភាពជិត ៤ពាន់ដប យកមកដុតបំផ្លាញចោល

កម្លាំងនគរបាលសេដ្ឋកិច្ចនៃស្នងការដ្ឋាននគរបាលខេត្តព្រះវិហារ ដោយមានការសម្របសម្រួលនីតិវិធីពី លោក ស្រេង វុទ្ធា ព្រះរាជអាជ្ញារងអមសាលាដំបូងខេត្តព្រះវិហារ បានធ្វើការបង្រ្កាបទំនិញខូចគុណភាពជាច្រើនមុខជិត ៤ពាន់ដប យកមកធ្វើការដុតបំផ្លាញចោល នៅចំណុចច្រករបៀងអានសេះ។

លោកវរសេនីយ៍ឯក ឈួរ ម៉ាឌី ស្នងការរងទទួលផែនប្រឆាំងបទល្មើសសេដ្ឋកិច្ច នៅថ្ងៃទី៤ ខែមេសា ឆ្នាំ២០២៤ នេះ បានឱ្យដឹងថា ទំនិញខូចគុណភាពចំនួន ៣ ៩៤៦ដប ដែលក្រុមឈ្មួញនាំចូលតាមច្រករបៀងដោយខុសច្បាប់ ត្រូវបានសមត្ថកិច្ចធ្វើការត្រួតពិនិត្យឃើញថា ហួសសុពលភាព ខូចគុណភាព នាំឱ្យប្រជាពលរដ្ឋអ្នកប្រើប្រាសប៉ះពាល់ដល់សុខភាព ទើបកម្លាំងសមត្ថកិច្ចចាប់យកមកដុតកម្ទេចចោលតែម្ដង។

លោកបន្តថា តាមការណែនាំចង្អុរបង្ហាញរបស់លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ បានឱ្យកម្លាំងជំនាញយកចិត្តទុកដាក់តាមដានស៊ើបអង្កេតរាល់បទល្មើសសេដ្ឋកិច្ចទាំងអស់ ដែលបានធ្វើចរាចរណ៍នៅក្នុងដែនដីសមត្ថកិច្ចរបស់ខ្លួន ឱ្យមានប្រសិទ្ធភាពខ្ពស់បំផុត ដើម្បីការពារសុខុមាលភាពប្រជាពលរដ្ឋ៕

ដោយ៖ ជុន កុសល