ព័ត៌មានជាតិ

ត្រីមាសទី ១ ឆ្នាំនេះ ក្រសួងការងារ ស្វែងរកការងារធ្វើជូនដល់យុវជនបានជាង ១ ៦០០ នាក់

បានផុស

១២ ខែ មុន

នៅ

ថ្ងៃសៅរ៍ ៦ មេសា ២០២៤

ដោយ

នៅត្រីមាសទី ១ ឆ្នាំ ២០២៤ នេះ ក្រសួងការងារ និងបណ្ដុះបណ្ដាលវិជ្ជាជីវៈ បានស្វែងរកការងារជូនដល់យុវជនឱ្យមានការងារធ្វើបានប្រមាណជាង ១ ៦០០ នាក់ ក្នុងចំណោមអ្នកចុះឈ្មោះរកការងារធ្វើជាង ៨ ០០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ៦ មេសា នេះថា រយៈពេល ៣ ខែ ឆ្នាំ ២០២៤ នេះ មានអ្នកចុះឈ្មោះរកការងារធ្វើចំនួន ៨ ១១៤ នាក់ ក្នុងនោះមានអ្នកទទួលបានការងារធ្វើចំនួន ១ ៦៤០ នាក់។

ជាមួយគ្នានេះដែរ ក្រសួង បានប្រមូលព័ត៌មានជ្រើសរើសកម្លាំងពលកម្មចំនួន ៩៦ ៥៦៤ កន្លែង ផ្គូផ្គង និងបញ្ជូនអ្នកស្វែងរកការងារធ្វើទៅឱ្យនិយោជកចំនួន ៨ ២០០ នាក់ អ្នកទទួលបានកន្លែងកម្មសិក្សាការងារចំនួន ៥៣ នាក់ ផ្តល់ការណែនាំ និងប្រឹក្សាយោបល់អំពីអាជីពការងារ និងវិជ្ជាជីវៈដល់អ្នកស្វែងរកការងារ សិស្ស និស្សិត ចំនួន ១៧ ៣៧៥ នាក់ រៀបចំវេទិកាការងារពិព័រណ៍ការងារថ្នាក់ជាតិខេត្តបានចំនួន ៤២ លើក ដែលមានអ្នកចូលរួមចំនួន ៥ ០៥៩ នាក់ មានអ្នកប្រើប្រាស់គេហទំព័រការងារចំនួន ៨៣៩ ១៣៤ លើក អ្នកទទួលការងារតាមរយៈទំព័រហ្វេសប៊ុកចំនួន ១២៣ ៨៦៩ នាក់ និងអ្នកប្រើប្រាស់សេវាតាមរយៈកម្មវិធីស្វែងរកការងារលើទូរស័ព្ទវៃឆ្លាតចំនួន ៤ ១៩១ នាក់។

លោក កត្តា អ៊ន បានបន្តទៀតថា តួលេខ ៣ ខែនេះ បើធៀបទៅនឹង ៣ ខែដូចគ្នា ឆ្នាំ ២០២៣ កន្លងទៅ ឃើញថា មានការកើនឡើងគួរឱ្យកត់សម្គាល់ ក្នុងនោះអ្នកចុះឈ្មោះរកការងារធ្វើមានត្រឹមចំនួន ២ ៦១៦ នាក់ ក្នុងនោះមានអ្នកទទួលបានការងារធ្វើចំនួន ៥៧២ នាក់។ ប្រមូលព័ត៌មានជ្រើសរើសកម្លាំងពលកម្មចំនួន ២៥ ៥៧៣ កន្លែង ផ្គូផ្គង និងបញ្ជូនអ្នកស្វែងរកការងារធ្វើទៅឱ្យនិយោជកចំនួន ៥ ៣២៩ នាក់ អ្នកទទួលបានកន្លែងកម្មសិក្សាការងារចំនួន ៤១ នាក់ ផ្តល់ការណែនាំ និងប្រឹក្សាយោបល់អំពីអាជីពការងារ និងវិជ្ជាជីវៈដល់អ្នកស្វែងរកការងារ សិស្ស និស្សិត ចំនួន ៨ ៣៤៥ នាក់ រៀបចំវេទិកាការងារពិព័រណ៍ការងារថ្នាក់ជាតិខេត្តបានចំនួន ១៧ លើក ដែលមានអ្នកចូលរួមចំនួន ១ ៣៩៤ នាក់ មានអ្នកប្រើប្រាស់គេហទំព័រការងារចំនួន ១៦៨ ២៨៤ លើក អ្នកទទួលការងារតាមរយៈទំព័រហ្វេសប៊ុកចំនួន ២៨ ៩៥៣ នាក់ និងអ្នកប្រើប្រាស់សេវាតាមរយៈកម្មវិធីស្វែងរកការងារលើទូរស័ព្ទវៃឆ្លាតចំនួន ៦៣១ នាក់៕

អត្ថបទ ៖ សំអឿន