ព្រះមហាក្សត្រ៖ ទិវាព្រះពុទ្ធសាសនាអន្តរជាតិ ជាការរម្លឹកពុទ្ធបរិស័ទត្រឡប់ទៅបតិបត្តិឱ្យបានល្អតាមពុទ្ធឱវាទ

ស្ថិតក្នុងឱកាសទិវាព្រះពុទ្ធសាសនាអន្តរជាតិ ថ្ងៃទី៨ ខែមេសា ឆ្នាំ២០២៤នេះ ព្រះមហាក្សត្រនៃកម្ពុជា បានចាត់ទុកទិវាព្រះពុទ្ធសាសនាអន្តរជាតិ ប្រារព្ធឡើងដើម្បីរម្លឹកដាស់តឿនដល់ពុទ្ធបរិស័ទគ្រប់និកាយត្រឡប់ទៅបតិបត្តិឱ្យបានខ្ជាប់ខ្ជួនតាមឱវាទនៃព្រះសម្មាសម្ពុទ្ធ។

ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា តាមរយៈព្រះរាជសារ ប្រទាន​ជូន ជនរួមជាតិ នាថ្ងៃនេះ បានសម្តែងនូវហឫទ័យសោមនស្សរីករាយ និងបានអបអរសាទរជាមួយសម្តេចព្រះមហាសង្ឃរាជទាំងពីរគណៈ សម្តេចព្រះសង្ឃនាយក ព្រះថេរានុត្ថេរៈគ្រប់ព្រះអង្គ និងជនរួមជាតិកម្ពុជាទាំងអស់ នៅក្នុងឱកាសនៃទិវាព្រះពុទ្ធសាសនាអន្តរជាតិ។

ព្រះករុណា ព្រះមហាក្សត្រនៃកម្ពុជា បានមានព្រះរាជបន្ទូលថា ទិវាព្រះពុទ្ធសាសនាអន្តរជាតិនេះ ប្រារព្ធឡើងដើម្បីរម្លឹកដាស់តឿនដល់ពុទ្ធបរិស័ទគ្រប់និកាយត្រឡប់ទៅបតិបត្តិឱ្យបានខ្ជាប់ខ្ជួនតាមឱវាទនៃព្រះសម្មាសម្ពុទ្ធនៃយើង។

ព្រះមហាក្សត្រ មានព្រះរាជបន្ទូលយ៉ាងដូច្នេះថា៖ «ទិវាព្រះពុទ្ធសាសនាអន្តរជាតិ ជាអភិលក្ខិតសម័យមួយទៀត តាមប្រតិទិនសុរិយគតិ ដែលជាឱកាសដ៏វិសេសវិសាលមួយ ប្រារព្ធឡើងដើម្បីឯកភាព និងសាមគ្គីភាពរវាងនិកាយទាំងអស់នៃព្រះពុទ្ធសាសនា និងដឹកនាំពុទ្ធបរិស័ទគ្រប់និកាយ ត្រឡប់ទៅបតិបត្តិឱ្យបានខ្ជាប់ខ្ជួនតាមពាក្យប្រៀនប្រដៅដើមដំបូងរបស់ព្រះសម្មាសម្ពុទ្ធបរមគ្រូនៃយើង»។

ព្រះករុណា ព្រះមហាក្សត្រនៃកម្ពុជា​ ទ្រង់បានបន្តថា ទិវាព្រះពុទ្ធសាសនាអន្តរជាតិនេះ នឹងបន្តផ្សព្វផ្សាយព្រះពុទ្ធឱវាទឱ្យបានទូលំទូលាយ កាន់តែសកម្មផុសផុលឡើង ដើម្បីបុព្វហេតុនៃការរីកចម្រើនព្រះពុទ្ធសាសនា និងការកសាងសន្តិភាពនៅក្នុងសង្គមជាតិខ្មែរផង និងនៅលើសកលលោកទាំងមូលផង៕