ព័ត៌មានជាតិ

ដើមរដូវ ទុរេនកំពតពូជឪខាក់លក់បានតម្លៃចន្លោះពី ២-៣ម៉ឺនរៀល ក្នុង ១គីឡូ

បានផុស

១២ ខែ មុន

នៅ

ថ្ងៃចន្ទ ៨ មេសា ២០២៤

ដោយ

លោក តេង វ៉ាន់ធឿន ប្រធានការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្មខេត្តកំពត បានឲ្យ «កម្ពុជាថ្មី» ដឹងនៅព្រឹកថ្ងៃទី០៨ ខែមេសា ឆ្នាំ២០២៤ នេះថា នៅដើមខែមេសានេះ ដែលជាដើមរដូវនៃការប្រមូលផលទុរេន ទុរេនកំពតអាចប្រមូលផលបានតិចតួចបំផុត ដោយក្នុងនោះពូជឪខាក់ អាចលក់បានក្នុងតម្លៃចន្លោះពី ២ម៉ឺន ៧ពាន់រៀល ទៅ ៣ម៉ឺនរៀលក្នុងមួយគីឡូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅដើមខែមេសានេះ ទុរេនខេត្តកំពតពិតជាមានការប្រមូលផលមែនប៉ុន្តែបានតិចតួចប៉ុណ្ណោះ ដោយប្រជាកសិករអាចប្រមូលផលបានសម្រាប់តែពូជឪខាក់មួយប្រភេទប៉ុណ្ណោះ។ ជាក់ស្តែង សម្រាប់ការប្រមូលផលទុរេនពូជឪខាក់ គឺមានចំនួនតិចតួចបំផុតនៅមិនទាន់បាន ១%ផង នៃទិន្នផលទុរេនសរុបដែលបានដាំដុះក្នុងឆ្នាំនេះ។ នេះបើតាមលោក តេង វ៉ាន់ធឿន។

លោកបញ្ជាក់ថា «សម្រាប់ពូជឪខាក់ ដែលយើងមានទុំនេះ ពេលខ្លះក៏មានអ្នកស្គាល់គ្នាក្នុងខេត្តទៅទិញដល់ចម្ការផ្ទាល់ ហើយក៏មានឈ្មួញមកទិញដល់ចម្ការដើម្បីនាំចេញមកកាន់ទីផ្សារភ្នំពេញ ប៉ុន្តែនិយាយទៅការប្រមូលផល គឺមានចំនួនតិចតួចបំផុត មិនមានច្រើនទេ»។

ចំពោះផ្ទៃដីដាំទុរេនក្នុងខេត្តកំពត ដោយយោងតាមការចុះស្រង់ស្ថិតិផ្ទៃដីដាំដុះកាលពីចុងឆ្នាំ២០២៣ មានប្រមាណ ២៣៤៥ហិតា។ សម្រាប់ការប្រមូលផលពូជឪខាក់នៅដើមរដូវ ប្រជាកសិករអាចលក់បានក្នុងតម្លៃចន្លោះពី ២ម៉ឺន ៧ពាន់រៀល ទៅ ៣ម៉ឺនរៀលក្នុងមួយគីឡូ។

លោក តេង វ៉ាន់ធឿន បានគូសបញ្ជាក់ថា ពូជទុរេនឪខាក់ អាចប្រមូលផលបានពេញល្អក្នុងកំឡុងចុងខែមេសា និងនៅដើម-ពាក់កណ្ដាល ខែឧសភា។ ដោយឡែកចំពោះពូជ ទុរេន ម៉ន-ថង អាចមានក្នុងដើមខែមិថុនា រៀងយូរក្រោយគេបន្តិចព្រោះជាពូជធ្ងន់៕