ព័ត៌មានជាតិ

ឯកឧត្ដម ហ៊ុន ម៉ានី ៖ ការងារកែទម្រង់រដ្ឋបាលសាធារណៈមិនមែនជារឿងថ្មី តែទាមទារធ្វើជាប្រចាំ កាន់តែសកម្ម មានប្រសិទ្ធភាព

បានផុស

១០ ខែ មុន

នៅ

ថ្ងៃចន្ទ ៨ មេសា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បញ្ជាក់ថា «ការងារកែទម្រង់រដ្ឋបាលសាធារណៈ មិនមែនជារឿងថ្មី តែទាមទារការធ្វើជាប្រចាំ កាន់តែសកម្ម កាន់តែលម្អិត មានប្រសិទ្ធភាព និងប្រសិទ្ធផល»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃទី ០៨ ខែមេសា ឆ្នាំ ២០២៤ នេះ តាមរយៈទំព័រហ្វេសប៊ុក ឯកឧត្ដម ហ៊ុន ម៉ានី បានសរសេរឲ្យដឹងថា ខណៈពេលដែលរាជរដ្ឋាភិបាលអាណត្តិទី ៧ ក្រោមការដឹកនាំដ៏មុតស្រួចរបស់ សម្ដេចមហាបវរធិបតី នាយករដ្ឋមន្ត្រី បានដាក់ការងារកែទម្រង់រដ្ឋបាលសាធារណៈ ជាកិច្ចការអាទិភាព ក្រសួងមុខងារសាធារណៈ ដើរតួកាន់តែសំខាន់លើការងារនេះ បន្ថែមលើកិច្ចការងារបច្ចេកទេសប្រចាំថ្ងៃ បាន និងកំពុងអនុវត្ត។

ឯកឧត្ដម ហ៊ុន ម៉ានី បានសរសេរឲ្យដឹងបន្តថា ជាក់ស្ដែង ព្រឹកនេះ ថ្នាក់ដឹកនាំថ្នាក់ជាតិរួមមាន ឧបនាយករដ្ឋមន្ត្រី រដ្ឋមន្ត្រី និងតំណាងក្រសួង ស្ថាប័ន រួមទាំងអភិបាល នៃគណៈអភិបាល រាជធានី-ខេត្ត និងមន្ត្រីថ្នាក់ក្រោមជាតិ បានស្តាប់ ចូលរួមពិភាក្សា និងផ្តល់ជូនមតិយោបល់ជាធាតុចូលយ៉ាងផុលផុសលើការរៀបចំវិធានការ និងផែនការសកម្មភាព នៃការកែទម្រង់រដ្ឋបាលសាធារណៈ។

ឯកឧត្ដម ហ៊ុន ម៉ានី សរសេរបញ្ជាក់ថា កិច្ចការកែទម្រង់រដ្ឋបាលសាធារណៈ មិនមែនជារឿងថ្មីនោះទេ ព្រោះការងារនេះ ត្រូវបានធ្វើជាប្រចាំកន្លងមកហើយ។ ពេលនេះ ក្រសួងមុខងារសាធារណៈ បន្តធ្វើការងារនេះឲ្យកាន់តែសកម្ម ធ្វើឲ្យកាន់តែលម្អិត កាន់តែច្បាស់លាស់ ហើយសម្រេចបានជាសមិទ្ធផលជាក់ស្ដែងពិតប្រាកដ ឆ្ពោះទៅកាន់ការអនុវត្តស្របជាមួយគោលការណ៍ដែល សម្ដេចធិបតី ធ្លាប់បានលើកឡើងស្តីអំពី«ការរៀបចំផ្ទះខ្លួនយើងឲ្យបានស្អាត និងមានរបៀបរៀបរយ»។

ឯកឧត្ដមឧបនាយករដ្ឋមន្ត្រី សរសេរបញ្ជាក់បន្ថែមថា ក្នុងនាម ក្រសួងមុខងារសាធារណៈ ក៏ដូចជាក្នុងនាមលេខាធិការដ្ឋាន នៃគណៈកម្មាធិការជាតិជំរុញការអនុវត្តវិធានការណ៍គន្លឹះ ក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាលអាណត្តិទី ៧ នៃរដ្ឋសភា ឯកឧត្ដម សូមថ្លែងអំណរគុណចំពោះការចូលរួមជាមតិយោបល់ ដែលជាធាតុចូលសំខាន់ៗ មិនត្រឹមតែសម្រាប់ការរៀបចំវិធានការ និងផែនការសកម្មភាព ក្នុងការកែទម្រង់រដ្ឋបាលសាធារណៈចំពោះមុខតែប៉ុណ្ណោះទេ តែជាការរៀបចំ កសាង និងតម្រង់ទិសរដ្ឋបាលសាធារណៈរបស់កម្ពុជាក្នុងរយៈពេលយូរអង្វែងនាពេលអនាគត។

ឯកឧត្ដមឧបនាយករដ្ឋមន្ត្រី សរសេរបញ្ជាក់បន្ថែមទៀតថា កិច្ចការកែទម្រង់ច្បាស់ណាស់ថា នឹងមានផលជះដល់ប្រតិបត្តិការណាមួយរបស់បុគ្គល និងស្ថាប័ន តែអ្វីជាគោលដៅសំខាន់ជាងគេបំផុត គឺ ផលប្រយោជន៍សម្រាប់ជាតិ និងប្រជាជនជារួម ដែលទាមទារឲ្យមានចក្ខុវិស័យវែងឆ្ងាយ មានឆន្ទៈនយោបាយ មានការចូលរួម និងមានការលះបង់ទាំងអស់គ្នា៕

អត្ថបទ ៖ ពិសី