ព័ត៌មានជាតិ

លើកទឹកចិត្តដល់សិស្សានុសិស្ស ឈប់ប្រើប្រាស់ថង់ប្លាស្ទិក ១ ថ្ងៃយ៉ាងតិច ក្នុង ១ សប្តាហ៍

បានផុស

១០ ខែ មុន

នៅ

ថ្ងៃចន្ទ ៨ មេសា ២០២៤

ដោយ

លោក អ៊ាង សុផល្លែត រដ្ឋមន្ត្រីក្រសួងបរិស្ថានមានប្រសាសន៍ថា ការចូលរួមអនុវត្តយុទ្ធនាការមិនប្រើថង់ប្លាស្ទិក ដែលចាប់ផ្តើមពីសកម្មភាពសិស្សានុសិស្ស គឺជាកត្តាសំខាន់បំផុតក្នុងការគាំទ្រដល់អាទិភាព និងយុទ្ធសាស្ត្រចក្រារបស់ក្រសួងបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី០៨ ខែមេសា នៅទីស្តីការក្រសួងបរិស្ថាន លោក អ៊ាង សុផល្លែត មានប្រសាសន៍ថា ក្រសួងបរិស្ថាន បានសម្រេចនូវជោគជ័យដ៏ត្រចះត្រចង់ នៃភាពស្អាតនៅកម្ពុជា ដោយសារមានការចូលរួមពីលោកគ្រូ អ្នកគ្រូ និងសិស្សានុសិស្ស ១០០% នៅគ្រប់គ្រឹះស្ថានសិក្សាទូទាំងប្រទេស នៅក្នុងយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ ” ថ្ងៃនេះ ខ្ញុំមិនប្រើថង់ប្លាស្ទិកទេ ” និង ”យើងរួមកម្លាំងគ្នាការពារបរិស្ថានកម្ពុជា”។

ជាក់ស្តែង យុទ្ធនាការនេះបានលើកទឹកចិត្តដល់សិស្សានុសិស្សទាំងអស់ ឈប់ប្រើថង់ប្លាស្ទិកចំនួន ១ ថ្ងៃយ៉ាងតិច ក្នុង១សប្តាហ៍ ហើយសិស្សម្នាក់មិនប្រើថង់ផ្លាស្ទិកជាមធ្យម ៤ ថង់ ក្នុង ១ថ្ងៃ ដែលធានាការគ្រប់គ្រងសំរាម ថែរក្សាអនាម័យបរិស្ថាន និង សុខុមាលភាពប្រជាពលរដ្ឋ បានល្អប្រសើរ។

លោករដ្ឋមន្ត្រី អះអាងថា «យុទ្ធនាការកាត់បន្ថយការប្រើប្រាស់ប្លាស្ទិក បានចាប់ផ្តើមពីសកម្មភាព និងការចូលរួមចេញពីបេះដូងរបស់សិស្សានុសិស្សនាពេលនេះ គឺជាកត្តាសំខាន់បំផុត ក្នុងការគាំទ្រដល់យុទ្ធសាស្រ្តចក្រារបស់ក្រសួងបរិស្ថាន ដែលមានមុំ ៣សំខាន់ គឺស្អាត បៃតង និងចីរភាព។

ជាពិសេស យុទ្ធសាស្ត្រដែលដាក់ចេញដោយក្រសួងបរិស្ថាននេះ គឺមានគោលដៅសំខាន់ធ្វើឱ្យកម្ពុជាដែលជាផ្ទះយើងទាំងអស់គ្នាស្អាត ស្រស់បំព្រង គ្មានការបំពុល និងឈានទៅការលុបបំបាត់សំរាម សំណល់ប្លាស្ទិក បន្តិចម្តងៗឱ្យអស់ពីកម្ពុជា ក្នុងពេលអនាគតដ៏ខ្លី៕

Related Topics:លោក អ៊ាង សុផល្លែត