ព័ត៌មានជាតិ

ក្រសួងការងារ ចេញយុទ្ធនាការគោះទ្វារតាមខ្នងផ្ទះផ្សព្វផ្សាយពីកម្មវិធីបណ្ដុះបណ្ដាលជំនាញបច្ចេកទេស និងវិជ្ជាជីវៈ ដោយឥតគិតថ្លៃ វគ្គទី ២

បានផុស

១១ ខែ មុន

នៅ

ថ្ងៃអង្គារ ៩ មេសា ២០២៤

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានបន្តយុទ្ធនាការផ្សព្វផ្សាយអំពីកម្មវិធីបណ្ដុះបណ្ដាលជំនាញបច្ចេកទេស និងវិជ្ជាជីវៈ វគ្គទី ២ ទៅដល់យុវជនក្រុមគោលដៅតាមសហគមន៍ ដើម្បីផ្តល់ព័ត៌មានអំពីការសិក្សាដោយឥតគិតថ្លៃ និងទទួលបានប្រាក់ឧបត្ថម្ភប្រចាំខែ។ យុទ្ធនាការផ្សព្វផ្សាយនេះ បានចាប់ផ្ដើមតាំងពីដើមខែមីនា ឆ្នាំ ២០២៤ ដើម្បីបន្តជ្រើសរើសយុវជនមកពីគ្រួសារក្រីក្រ និងងាយរងហានិភ័យ បានចូលសិក្សានៅវគ្គទី ២ ខណៈវគ្គទី ១ នឹងបញ្ចប់នៅខែឧសភា ឆ្នាំ ២០២៤ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីកម្មវិធីបណ្ដុះបណ្ដាលជំនាញបច្ចេកទេស និងវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ ត្រូវបានបើកបវេសនកាល កាលពីថ្ងៃទី ១៥ ខែមីនា ឆ្នាំ ២០២៤ កន្លងទៅ សិក្ខាកាម បាននិងកំពុងសិក្សាជំនាញវិជ្ជាជីវៈវគ្គទី ១ បានជាង ៣ ខែ ដោយរលូន លើវិស័យចំនួន ១០ និង ៣៨ មុខជំនាញ ព្រមទាំងបាននិងកំពុងចុះកម្មសិក្សាតាមរោងចក្រ សហគ្រាស ដើម្បីអនុវត្តការងារជាក់ស្ដែងបន្ថែមលើមេរៀនដែលបានសិក្សា។

សូមរំលឹកថា កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសឱ្យអនុវត្តកម្មវិធីបណ្ដុះបណ្ដាលជំនាញបច្ចេកទេសវិជ្ជាជីវៈដល់យុវជនមកពីគ្រួសារក្រីក្រ និងងាយរងហានិភ័យចំនួន ១.៥ លាននាក់ ដើម្បីផ្តល់ជំនាញបច្ចេកទេសវិជ្ជាជីវៈដល់យុវជនកម្ពុជាឱ្យមានការងារសមរម្យ ដើម្បីលើកកម្ពស់ជីវភាពគ្រួសារឱ្យកាន់តែប្រសើរបន្ថែមទៀត។ យន្តការនេះ ក៏ជាយុទ្ធសាស្ត្រដើម្បីប្រែក្លាយកម្ពុជាទៅប្រជាប្រទេសដែលមានសេដ្ឋកិច្ចពឹងផ្អែកលើកម្លាំងការងារមានជំនាញ៕