ព័ត៌មានជាតិ

ត្រឹមឆ្នាំ២០២៣ ទ្រព្យសកម្មក្នុងប្រព័ន្ធធនាគារនៅកម្ពុជាកើនដល់ជាង ៨៤,៣ ប៊ីលានដុល្លារ

បានផុស

១០ ខែ មុន

នៅ

ថ្ងៃពុធ ១០ មេសា ២០២៤

ដោយ

បើតាមសមាគមធនាគារនៅកម្ពុជាបានបញ្ជាក់ថា គិតត្រឹមឆ្នាំ ២០២៣ ទ្រព្យសកម្មក្នុងប្រព័ន្ធធនាគារនៅកម្ពុជាមានទំហំជាង ៨៤,៣ ប៊ីលានដុល្លារអាមេរិក ឬស្មើជាង ២៦៥% នៃផលិតផលក្នុងស្រុកសរុប (GDP)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក រ័ត្ន សោភ័ណ ប្រធានសមាគមធនាគារនៅកម្ពុជា

ថ្លែងនៅក្នុងសន្និសីទក្នុងខួប ៣០ ឆ្នាំនៃសមាគមធនាគារនៅកម្ពុជា លោក រ័ត្ន សោភ័ណ ប្រធានសមាគមធនាគារនៅកម្ពុជាបានគូសបញ្ជាក់ថា ក្នុងរយៈពេល ៣០ ឆ្នាំកន្លងមកនេះ វិស័យធនាគារបានពើបប្រទះកត្តាប្រឈម និងឧបសគ្គជាច្រើនរួមមាន វិបត្តិសេដ្ឋកិច្ចនៅអាស៊ី វិបត្តិហិរញ្ញវត្ថុសកល ជំងឺកូវីដ-១៩ ផលប៉ះពាល់ពីសង្គ្រាម រុស្សី និងអ៊ុយក្រែន ភាពតានតឹងផ្នែកភូមិសាស្រ្តនយោបាយ និងអតិផរណាជាដើម។

យ៉ាងណាមិញ ឆ្លងកាត់វិបត្តិជាបន្តបន្ទាប់ធនាគារនៅកម្ពុជានៅបន្តភាពរឹងមាំ រក្សានូវសិ្ថរភាពនៃប្រព័ន្ធធនាគារ រួមជាមួយនឹងកំណើននៃវិស័យធនាគារ ដែលសម្រេចបានគួរជាទីមោទនៈ។

បើតាមប្រធានសមាគម គិតត្រឹមឆ្នាំ២០២៣ ទ្រព្យសកម្មក្នុងប្រព័ន្ធធនាគារមានទំហំ ៨៤,៣ ប៊ីលានដុល្លារអាមេរិក ឬជាង ២៦៥ % នៃផលិតផលក្នុងស្រុកសរុប (GDP) ខណៈឥណទានអតិថិជនកើនដល់ ៥៧,៦ ប៊ីលានដុល្លារអាមេរិក ឬជាង ១៨០% នៃផលិតផលិតផលក្នុងស្រុកសរុប ដែលមានប្រជាជនប្រើប្រាស់ប្រមាណជា ៣,៨ លាន គណនី។ រីឯប្រាក់បញ្ញើបានកើនឡើងដល់ ៤៧,៩ ប៊ីលានដុល្លារអាមេរិក ដែលមានប្រមាណជា ១៨,៦ លានគណនី។

លោកស្រី ជា សិរី អគ្គទេសាភិបាលធនាគារជាតិនៃកម្ពុជា

ថ្លែងនៅក្នុងកម្មវិធីខួប ៣០ ឆ្នាំនៃការបង្កើតសមាគមធនាគារនៅកម្ពុជា លោកស្រី ជា សិរី អគ្គទេសាភិបាលធនាគារជាតិនៃកម្ពុជាក៏បានថ្លែងកត់សម្គាល់ពីការរីកចម្រើននៃប្រព័ន្ធធនាគារនៅកម្ពុជាក្នុងរយៈពេល ៣ ០ឆ្នាំនេះ ដោយបានបន្តរក្សាបាននូវភាពធន់ និងបោះជំហានទៅមុខជាលំដាប់ ក្នុងការរួមចំណែកជំរុញសកម្មភាពសេដ្ឋកិច្ច។

លោកស្រីអះអាងថា ការបន្តកើនឡើងនូវទ្រព្យសកម្ម ឥណទាន និងប្រាក់បញ្ញើ នៅក្នុងប្រព័ន្ធធនាគារបានបង្ហាញយ៉ាងច្បាស់នូវជំនឿទុកចិត្តរបស់សាធារណជន និងវិនិយោគិនមកលើប្រព័ន្ធធនាគារ និងការងើបឡើងវិញនៃសេដ្ឋកិច្ចនៅកម្ពុជា៕

Related Topics:សមាគមធនាគារនៅកម្ពុជា លោក រ័ត្ន សោភ័ណ