នាយករដ្ឋមន្ត្រី ណែនាំក្រសួងធនធានទឹកបន្តទប់ស្កាត់ការកាប់បំផ្លាញព្រៃលិចទឹកនៅបឹងទន្លេសាប

សម្ដេចនាយករដ្ឋមន្ត្រី បានណែនាំឱ្យក្រសួងធនធានទឹក និងឧតុនិយម ត្រូវបន្តចូលរួមទប់ស្កាត់ការកាប់បំផ្លាញព្រៃលិចទឹកនៅតំបន់៣ ជុំវិញបឹងទន្លេសាប និងពិសេសពន្លឿនការកំណត់ព្រំ និងបោះបង្គោលនៅតំបន់បឹងទន្លេសាបឱ្យឆាប់រហ័ស។

ថ្លែងក្នុងពិធីបិទសន្និបាតប្រចាំឆ្នាំរបស់ក្រសួងធនធានទឹក និងឧតុនិយម នារសៀលថ្ងៃទី១០ ខែមេសា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឱ្យក្រសួងធនធានទឹក និងឧតុនិយម ត្រូវបន្តអនុវត្តតួនាទី ភារកិច្ចរបស់ខ្លួន ដោយសហការជាមួយក្រសួងស្ថាប័នពាក់ព័ន្ធ និងអាជ្ញាធរគ្រប់មូលដ្ឋានរាជធានី-ខេត្ត ក្នុងការទប់ស្កាត់ការកាប់បំផ្លាញព្រៃលិចទឹកក្នុងតំបន់៣ នៅជុំវិញបឹងទន្លេសាប។

ទន្ទឹមនេះ សម្ដេចធិបតី បានណែនាំឱ្យក្រសួងធនធានទឹក ក៏ត្រូវជំរុញបញ្ចប់ការធ្វើបច្ចប្បន្នភាពផែនទីតំបន់១ តំបន់២ និងតំបន់៣ នៃតំបន់បឹងទន្លេសាប និងការបោះបង្គោលព្រំ ព្រមទាំងការទប់ស្កាត់រាល់ការទន្ទ្រានកាន់កាប់ដីអាងស្តុកទឹក ដីព្រៃលិចទឹក ការចាក់ដី និងថ្មចូលកក្នុងទន្លេ ស្ទឹង អូរ បឹង នៅទូទាំងប្រទេស។

ក្នុងករណីនេះ សម្ដេចធិបតីនាយករដ្ឋមន្ត្រី បានរម្លឹកដែរថា កាលពីថ្ងៃទី៣០ ខែមករា ឆ្នាំ២០២៤ កន្លងទៅ ក្នុងឱកាសពិធីបិទសន្និបាតរបស់ក្រសួងកសិកម្ម សម្ដេចបានចេញគោលការណ៍ឱ្យរៀបចំកិច្ចការងារក្នងការគ្រប់គ្រងបឹងទន្លេសាប ដែលកំពុងរងការទន្ទ្រាន និងកាន់កាប់ដោយខុសច្បាប់។ បើតាមការគូសបញ្ជាក់របស់សម្ដេចនាយករដ្ឋមន្ត្រី គឺមកទល់ពេលនេះ គឺក្រុមការងារចម្រុះ ដែលការចូលរួមពីក្រសួងស្ថាប័នជាច្រើន រួមទាំងអាជ្ញាធរមូលដ្ឋាន គឺសម្រេចបានការផ្ទៀងផ្ទាត់ទិន្នន័យកំណត់ព្រំ បានរៀបចំបោះបង្គោលជាបណ្ដើរ ដែលរាជរដ្ឋាភិបាល បានបោះថវិកាប្រមាណ ៤លានដុល្លារ សម្រាប់ជំហានដំបូងក្នុងការបោះបង្គោលព្រំ និងការជំរុញការចុះបញ្ជីក្បាលដីនៅបឹងទ​ន្លេសាប ជាមួយនឹងការចាត់វិធានការក្នុងការទន្ត្រានផ្សេងៗ។

ដូច្នេះ សម្ដេចធិបតី បានណែនាំឱ្យគ្រប់ក្រសួងស្ថាប័នពាក់ព័ន្ធទាំងអស់ ត្រូវបន្តអនុវត្តតាមតួនាទីភារកិច្ចរបស់ខ្លួឱ្យកាន់តែមានប្រសិទ្ធភាពលើកិច្ចការគ្រប់គ្រងតំបន់បឹងទន្លេសាបនេះ ដើម្បីឈានទៅបញ្ចប់ការដោះស្រាយបញ្ហានានានៅក្នុងបឹងទន្លេសាបនាពេលនេះ៕