នៅថ្ងៃទី១៣ មេសា រមណីយដ្ឋានទឹកឆា នឹង ធ្វើសង្ក្រាន្តដ៏ធំសម្រាប់ឆ្នាំនេះ

រមណីយដ្ឋានទឹកឆា កំពុងត្រៀមខ្លួនរៀបចំសង្ក្រាន្ត ដោយយកថ្ងៃទី១៣ ខែមេសា ជាថ្ងៃរៀបចំសង្ក្រាន្ត ហើយនៅពេលនេះ កំពុងតុបតែងកែលម្អឱ្យមានភាពទាក់ទាញ ដើម្បីទទួលភ្ញៀវទេសចរណ៍ឱ្យមកលេងកម្សាន្ត ក្នុងឱកាសបុណ្យចូលឆ្នាំថ្មីប្រពៃណីខ្មែរ ខាងមុខនេះ។

លោក ឃុន បូរិន តំណាងអ្នកវិនិយោគរមណីយដ្ឋានទឹកឆា បានបញ្ជាក់ថា ក្នុងនាមជាអ្នកគ្រប់គ្រងតំបន់នេះ លោកបានធ្វើការផ្សព្វផ្សាយ និងស្នើឱ្យម្ចាស់អាហារដ្ឋានទាំងអស់ចូលរួមរក្សាតម្លៃ និងថែរក្សាសម្អាតបរិស្ថានជុំវិញឱ្យស្អាត។ លោកបញ្ជាក់ទៀតថា ពិធីបុណ្យចូលឆ្នាំប្រពៃណីជាតិខ្មែរខាងមុខនេះ សម្រាប់រមណីយដ្ឋានទឹកឆា បានបង្កើតសង្ក្រាន្តទឹកឆា ដោយយកថ្ងៃទី១៣ ខែមេសា ជាថ្ងៃប្រារព្ធពិធីលេងល្បែងប្រជាប្រិយខ្មែរ និងរាំលេងកម្សាន្ត។

សម្រាប់សង្ក្រានឆ្នាំថ្មី ឆ្នាំរោង ថ្ងៃទី១៣ ខែមេសា ឆ្នាំ២០២៤ ខាងមុខនេះ រមណីយដ្ឋានក្បាលទឹក ឬហៅរមណីយដ្ឋានទឹកឆា ក្នុងស្រុកព្រៃឈរ នឹងរៀបចំបង្កើតកម្មវិធីសប្បាយៗ ជាច្រើនដូចជា លេងល្បែងប្រជាប្រិយខ្មែរ រាំលេងកម្សាន្ត និងមានតុបតែងច្នៃជាក្លោងទ្វារច្រកចូលតុបតែងប្លែកបែបស្រុកស្រែ អមដោយឧបករណ៍នេសាទបុរាណ និងថែមរៀបចំផ្ទាល់ថតរូបប្លែកៗគួរឱ្យទាក់ទាញផងដែរ៕

អត្ថបទ និង រូបភាព ៖ ឡេក ចាន់ពេជ្រ